ປະທານາທິບໍດີສະຫະລັດ ທ່ານ Barack Obama ຈະເນັ້ນໜັກບັນຫາດ້ານເສດຖະກິດ ໃນຂະນະທີ່ທ່ານພົບປະກັບບັນດາຜູ້ນຳ Greek ໃນວັນອັງຄານມື້ນີ້ ຢູ່ບ່ອນຢຸດແວ່ແຫ່ງທຳອິດ ຂອງແຜນການເດີນທາງໄປຕ່າງປະເທດເທື່ອສຸດ ທ້າຍ ໃນການເປັນປະທານາທິບໍດີຂອງທ່ານ.
ບັນດາເຈົ້າໜ້າທີ່ທຳນຽບຂາວຄາດວ່າ ປະທານາທິບໍດີ Obama ແລະ ນາຍົກລັດຖະມົນຕີ Greek ທ່ານ Alexis Tsipras ຈະສົນທະນາກັນກ່ຽວກັບຄວາມຈຳເປັນທີ່ຈະສືບຕໍ່ການປະຕິຮູບເສດຖະກິດ ຮວມທັງຄວາມໂປ່ງໃສແລະສະສາງພາກສ່ວນການເງິນຂອງປະເທດ ໃນຂະນະທີ່ຮັບຮູ້ເຖິງການເສຍສະຫຼະຂອງປະ ຊາຊົນ Greek ທີ່ໄດ້ປະຕິບັດຕາມ ເພື່ອໃຫ້ຖືກຕ້ອງກັບຂໍ້ຕົກລົງກອບກູ້ເສດຖະ ກິດຂອງສາກົນ.
ທ່ານ Obama ແລະທ່ານ Tsipras ມີກຳນົດທີ່ຈະຈັດການຖະແຫຼງຂ່າວຮ່ວມ ກັນຫລັງຈາກການປະຊຸມຂອງພວກທ່ານ. ນອກນັ້ນ ທ່ານ Obama ຍັງຈະໄດ້ຫາລືກັບປະທານາທິບໍດີ Greek ທ່ານ Prokopis Paviopoulos ແລະເຂົ້າຮ່ວມງານຮັບປະທານອາຄານຄ່ຳຢ່າງເປັນທາງການຂອງລັດຖະບານກຣີສ.
ຮອງທີ່ປຶກສາຄວາມໝັ້ນຄົງແຫ່ງຊາດສະຫະລັດ ທ່ານ Ben Rhodes ກ່າວວ່າ ທ່ານຄາດວ່າ ປະທານາທິບໍດີຖືກເລືອກໃໝ່ ທ່ານ Donald Trump ຈະເປັນຫົວຂໍ້ສຳຄັນໃນການສົນທະນາຕະຫຼອດການເດີນທາງຂອງທ່ານ Obama ທີ່ຍັງຈະຮວມທັງການຢຸດແວ່ຢູ່ປະເທດເຢຍຣະມັນ ແລະເປຣູ.
ການກ່າວຄຳປາໄສທີ່ສຳຄັນທີ່ຢູ່ໃນລາຍການຂອງປະທານາທິບໍດີ ຄືໃນວັນພຸດມື້ອຶ່ນນີ້ຢູ່ທີ່ Greece ບ່ອນທີ່ທ່ານຄາດວ່າ ຈະຖະແຫລງ ກ່ຽວກັບວຽກງານທີ່ຍັງຄ້າງຄາ ເພື່ອແກ້ໄຂບັນຫາທ້າທາຍທາງດ້ານເສດຖະກິດຢູ່ທີ່ນັ້ນ ແລະໃນແຫ່ງອື່ນໆຢູ່ໃນໂລກ ໃນຂະນະທີ່ສົ່ງເສີມ ການເຕີບໂຕຮ່ວມກັນ ແລະຕໍ່ສູ້ກັບຄວາມບໍ່ສະເໝີພາບ.
ໃນວັນພະຫັດ ນາຍົກລັດຖະມົນຕີເຢຍຣະມັນ ທ່ານນາງ Angela Merkel ຈະເປັນເຈົ້າພາບຈັດການປະຊຸມກັບປະທານາທິບໍດີ Obama. ທ່ານ Rhodes ໄດ້ກ່າວຢ້ຳເຖິງຄວາມສຳຄັນໃນຄວາມສຳພັນຂອງພວກທ່ານ ໂດຍຮ້ອງທ່ານນາງ Merkel ວ່າ “ເປັນພາຄີທີ່ໃກ້ຊິດທີ່ສຸດຂອງປະທານາທິບໍດີຕະຫລອດໄລຍະການເປັນປະທານາທິບໍດີຂອງທ່ານ.”
ບັນດາຜູ້ນຳອັງກິດ ຝຣັ່ງ ອີຕາລີ ແລະສະເປນ ກໍຈະໄປນະຄອນ Berlin ເພື່ອເຂົ້າຮ່ວມກອງປະຊຸມໃນວັນສຸກຈະມາເຖິງນີ້ ທີ່ຄາດວ່າຈະຮວມທັງການຕໍ່ສູ້ຕ້ານກຸ່ມລັດອິສລາມທີ່ຍັງດຳເນີນຢູ່ຕມາ ບັນຫາທີ່ພົວພັນກັບພວກຍົກຍ້າຍຖິ່ນຖານ ສະຖານະການໃນ Ukraine ແລະການເລືອກຕັ້ງຂອງສະຫະລັດອາທິດແລ້ວນີ້.
