ລິ້ງ ສຳຫລັບເຂົ້າຫາ

ໂອບາມາຂໍຮ້ອງສະພາ ໃຫ້ອະນຸມັດ ຮ່າງຍັດຕິ ການຂົນສົ່ງ ແລະເງິນກູ້ຢືມຂອງນັກສຶກສາ (ວີດີໂອ)

  • ທອງປານ ເທບວົງສາ

ທ່ານ ບາຣັກ ​ໂອ​ບາ​ມາ ປະທານາທິບໍດີ​ສະຫະລັດ ​ໄດ້​ຮຽກຮ້ອງ​ໃຫ້​ສະພາ ຄອງ​ແກຣສ ຈົ່ງ​ບັນລຸ​ຂໍ້​ຕົກລົງ​ກັນກ່ຽວກັບຮ່າງ​ຍັດຕິ​ກ່ຽວກັບ​ການ​ຂົນ​ສົ່ງ ​ແລະໃຫ້​ເລິ່ມລົງມື​ປະຕິບັດ​ການ ​ເພື່ອ​ຮັກສາ​ອັດຕາ​ດອກ​ເບ້ຍ​ເງິນ​ກູ້​ຍືມສໍາ ລັບການ​ສຶກສາຂອງພວກນັກຮຽນໄວ້ ບໍ່​ໃຫ້​ສູງ​ຂຶ້ນ​ໄປອີກເປັນ​ສອງ​ເທົ່າຕົວ​ນັ້ນ.

​ໃນຄໍາປາໄສຂອງທ່ານທາງ​ວິ​ທະ​ຍຸ​ແລະ​ອິນ​ເທີ​ແນັ​ດຕໍ່​ປະ​ເທດ​ຊາດ​ ປະຈໍາ​ ອາທິດ​ນັ້ນ ທ່ານ​ໂອ​ບາ​ມາ​ກ່າວ​ວ່າ ຄົນ​ງານຫຼາຍພັນ​ຄົນ​ອາດ​ຖືກບັງຄັບ​ໃຫ້​ອອກ​ຈາກ​ງານ ​ແລະ​ນັກ​ສຶກສາຫຼາຍລ້ານ​ຄົນ​ອາດ​ປະ​ເຊີນ​ກັບການ​ຊໍາລະ​ເງິນ​ກູ້​ຢືມ​ທີ່​ແພງ​ຂຶ້ນ ຖ້າ​ຫາກ​ວ່າ​ສະພາ​ຄອງ​ແກ​ຣສບໍ່​ຕົກລົງກັນ​ໄດ້​ໃນ​ອາທິດ​ໜ້າ​ນີ້.

ຂະນະ​ນີ້​ບັນດາ​ຜູ້ຕໍ່​ຮອງ​ກັນຂອງ​ສະພາ ກໍາລັງ​ເຈລະ​ຈາກັນເຮັດຂໍ້ຕົກລົງ​ເພື່ອ​ຈະ​ຮັກສາ​ອັດຕາ​ດອກ​ເບ້​ຍ​ເງິນ​ກູ້​ຢືມ​ສໍາລັບການ​ສຶກສາໄວ້ ​ບໍ່​ໃຫ້ຖີບ​ຂຶ້ນ​ເປັນສອງ​ເທົ່າ​ຕົວ ​ໃນ​ວັນ​ທີ່ 1 ​ກໍ​ລະ​ກົດ ​ເດືອນໜ້າ​ນີ້. ແລະບັນດາ​ສະມາຊິກ​ສະພາ ກໍກໍາລັງ​ເຈລະຈາ​ຕໍ່​ຮອງ​ກັນ​ກ່ຽວ​ກັບ​ມາດ​ຕະການ​ນຶ່ງອີກ ເພື່ອອະນຸມັດງົບປະມານ​ດ້ານ​ການຂົນ​ສົ່ງ​ຂອງລັດຖະບານ.

ຄໍາປາໄສຕອບຂອງຝ່າຍຣີພັບບລິກັນ:

​ໃນ​ຄໍາປາໄສຕອບຂອງ​ຝ່າຍຣີພັບ​ບລິ​ກັນນັ້ນ ສະມາຊິກ​ສະພາຕໍ່າຈາກ​ລັດ​ຫລຸຍ​ເຊຍ​ນາ ທ່ານ Bill Cassidy ກ່າວ​ວ່າ ສະພາ​ຄອງ​ແກຣສຄວນ​ຈະ​ຍົກ​ເລີກ​ກົດ​ໝາຍຮັກສາ​ສຸຂະພາບ​ຂອງລັດຖະບານ​ໂອ​ບາ​ມາ ຖ້າຫາກ​ວ່າ​ ​ສານ​ສູງ​ສຸດບໍ່ຕັດສິນ ຄັດຄ້ານຕໍ່ມາດຕະການດັ່ງກ່າວ.

ສະມາຊິກ​ສະພາຕໍ່າ Cassidy ຊຶ່ງ​ເປັນ​ນາຍ​ແພດນັ້ນ ກ່າວ​ວ່າ ມາດ​ຕະ ການດັ່ງກ່າວ​ເຮັດ​ໃຫ້​ຄ່າ​ໃຊ້​ຈ່າຍ​ການ​ຮັກສາ​ສຸຂະພາບ​ສູງ​ຂຶ້ນ​ໄປ​ອີກ ​ແລະ​ເຮັດໃຫ້​ວົງ​ການ​ທຸລະ​ກິດ​ລາຍ​ນ້ອຍໆ ມີ​ຄວາ​ມລໍາບາກຫຼາຍຂຶ້ນ ໃນການ​ທີ່​ຈະ​ວ່າ​ຈ້າງ​ຄົນ​ງານ.

ຄາດ​ວ່າ ສານ​ສູງ​ສຸດ ຈະ​ຕັນສິນ​ໃນ​ບໍ່​ຊ້າ​ນີ້ ກ່ຽວ​ກັບຄວາມຖືກຕ້ອງຕາມ ກົດໝາຍລັດຖະທໍາມະນູນ ຂອງມາດຕະການດັ່ງກ່າວ.

XS
SM
MD
LG