ລິ້ງ ສຳຫລັບເຂົ້າຫາ

ເກົາຫຼີເໜືອ ທົດລອງ ຍິງລູກສອນໄຟ ຈາກ ເຮືອດຳນຳ້


ປະຊາຊົນເບິ່ງລາຍການຂ່າວທາງໂທລະພາບ ສະແດງໃຫ້ເຫັນຮູບພາບຂອງການຍິງລູກສອນໄຟຂີປະນາວຸດຂອງ ເກົາຫຼີເໜືອ, ທີ່ ເກົາຫຼີເໜືອ ອ້າງວ່າໄດ້ຍິງຂຶ້ນຈາກໃຕ້ນ້ຳ, ທີ່ສະຖານີລົດໄຟ ໂຊລ, ເກົາຫຼີໃຕ້. 24 ສິງຫາ, 2016.

ປະຊາຊົນເບິ່ງລາຍການຂ່າວທາງໂທລະພາບ ສະແດງໃຫ້ເຫັນຮູບພາບຂອງການຍິງລູກສອນໄຟຂີປະນາວຸດຂອງ ເກົາຫຼີເໜືອ, ທີ່ ເກົາຫຼີເໜືອ ອ້າງວ່າໄດ້ຍິງຂຶ້ນຈາກໃຕ້ນ້ຳ, ທີ່ສະຖານີລົດໄຟ ໂຊລ, ເກົາຫຼີໃຕ້. 24 ສິງຫາ, 2016.

ຫຼັງຈາກ ເກົາຫຼີ​ເໜືອ ໄດ້ຍິງລູກສອນໄຟຂີປະນາວຸດຈາກເຮືອດຳນ້ຳ ຢູ່ນອກຊາຍຝັ່ງທາງ ພາກຕາເວັນອອກຂອງຕົນໃນຕອນເຊົ້າຂອງວັນພຸດມື້ນີ້, ບັນດາຜູ້ນຳໃນພາກພື້ນ ແລະ ສະຫະລັດ ໄດ້ກ່າວປະນາມຕໍ່ການທົດລອງດັ່ງກ່າວ, ພ້ອມກັບນາຍົກລັດຖະມົນຕີ ຍີ່ປຸ່ນ ເອີ້ນມັນວ່າ “ບໍ່ສາມາດຍົກໂທດໃຫ້ໄດ້.”

ລູກສອນໄຟດັ່ງກ່າວ, ເຊິ່ງໄດ້ຖືກຍິງ ​ໃກ້ໆເມືອງ Sinpo ໃນເວລາປະມານ 5:30 ຕອນ ເຊົ້າຕາມເວລາໃນທ້ອງຖິ່ນໃນວັນພຸດມື້ນີ້, ​ເຊິ່ງໄດ້ບິນໄປໄກ ປະມານ 500 ກິໂລແມັດ ຂ້າມ ແລະ ເຂົ້າໄປໃນທະເລຍີ່ປຸ່ນ. ມັນແມ່ນການຍິງລູກສອນໄຟຄັ້ງຫຼ້າສຸດ ທີ່​ມີມາ​ເປັນ​ລຳດັບ ໃນການລະ​ເມີດຕໍ່ມາດຕະການລົງໂທດຂອງສະພາຄວາມໝັ້ນຄົງອົງການ ສະຫະ ປະຊາຊາດ.

ນາຍົກລັດຖະມົນຕີ ຍີ່ປຸ່ນ ທ່ານ Shinzo Abe ໄດ້ກ່າວວ່າ, ທຳອິດ, ລູກສອນໄຟດັ່ງກ່າວ ໄດ້ບິນເຂົ້າ​ໄປໃນເຂດຄວບຄຸມ ການປ້ອງກັນທາງອາກາດຂອງ ຍີ່ປຸ່ນ.

ທ່ານ Abe ໄດ້ກ່າວວ່າ “ສິ່ງດັ່ງກ່າວນີ້ແມ່ນ​ເປັນໄພຂົ່ມຂູ່ອັນຮ້າຍແຮງຕໍ່ຄວາມປອດໄພ ຂອງ ຍີ່ປຸ່ນ ແລະ ມັນກໍເປັນການກະທຳທີ່ບໍ່ສາມາດໃຫ້ອະໄພໄດ້ ທີ່ໄດ້ສ້າງຄວາມເສຍ ຫາຍຕໍ່ສັນຕິພາບ ແລະສະຖຽນ​ລະ ພາບໃນພາກພື້ນຢ່າງຍິ່ງ.” ທ່ານໄດ້ກ່າວເພີ່ມເຕີມ ວ່າ ໂຕກຽວ ໄດ້ວາງແຜນທີ່ຈະປະທ້ວງຕໍ່ ເກົາຫຼີເໜືອ.

ຮູບການທົດລອງຍິງລູກສອນໄຟຂີປະນາວຸດຈາກເຮືອດຳນ້ຳ ເປີດເຜີຍໂດຍອົງການສູນກາງຂ່າວ ເກົາຫຼີ ຂອງ ເກົາຫຼີເໜືອ ໃນນະຄອນຫຼວງ ພຽງຢາງ. 24 ເມສາ, 2016.

ຮູບການທົດລອງຍິງລູກສອນໄຟຂີປະນາວຸດຈາກເຮືອດຳນ້ຳ ເປີດເຜີຍໂດຍອົງການສູນກາງຂ່າວ ເກົາຫຼີ ຂອງ ເກົາຫຼີເໜືອ ໃນນະຄອນຫຼວງ ພຽງຢາງ. 24 ເມສາ, 2016.

ກອງບັນຊາການຍຸດທະສາດ ສະຫະລັດ ຫຼື USSTRATCOM ໄດ້ກ່າວໃນຖະແຫຼງການ ສະບັບໜຶ່ງວ່າ ພວກເຂົາເຈົ້າຈັບໄດ້ການເຄື່ອນ ໄຫວຂອງ "ລູກສອນໄຟຂີປະນາວຸດທີ່ ຄາດວ່າເປັນລູກສອນໄຟ KN-11 ຖືກຍິງຈາກເຮືອດຳນ້ຳ” ແລະ ໄດ້ກ່າວເພີ່ມເຕີມວ່າ “ພວກ ເຮົາຂໍປະນາມຢ່າງ​ແຮງ​ຕໍ່ການຍິງ​ໃນຄັ້ງນີ້ ແລະ ການທົດລອງຍິງລູກສອນໄຟ ຄັ້ງອື່ນໆ ເມື່ອບໍ່ດົນມານີ້ຂອງ ເກົາຫຼີເໜືອ, ເຊິ່ງມັນໄດ້ລະເມີດມະຕິຂອງສະພາຄວາມ ໝັ້ນຄົງ ອົງການສະຫະປະຊາຊາດ ຢ່າງ​ເປັນ​ການ ​ເປີດແຜນ​ທີ່​ໄດ້ຫ້າມບໍ່​ໃຫ້ ​ເກົາຫຼີ​ເໜືອ ຍິງທົດ​ລອງ​ເທັກໂນໂລຈີລູກສອນໄຟຂີປະນາວຸດນັ້ນ.”

ໃນຕອນເຊົ້າຂອງວັນອັງຄານວານນີ້, ກອງບັນຊາການ ສະຫະປະຊາຊາດ ໄດ້ກ່າວວ່າ ເກົາຫຼີເໜືອ ໄດ້ວາງລະເບີດຝັງດິນຊຸດໃໝ່ ໃສ່ເຂດຊາຍແດນຕິດກັບ ເກົາຫຼີໃຕ້ ທີ່ມີການ ປ້ອງກັນຢ່າງໜາແໜ້ນໃນຟາກຂອງພວກເຂົາເຈົ້າ.

ທະຫານເກົາຫຼີເໜືອ ຫຼາຍຄົນໄດ້ຖືກພົບເຫັນວາງລະເບີດຝັງດິນຕໍ່ຕ້ານ ບຸກຄົນໃສ່ສົ້ນ ຂົວ ໃນຟາກຂອງຕົນທີ່ເອີ້ນວ່າ “ຂົວແຫ່ງການບໍ່ມີວັນໄດ້ເດີນທາງກັບ, ເຊິ່ງເປັນ ຂົວຂ້າມແມ່ ນ້ຳແຫ່ງໜຶ່ງຢູ່ໃກ້ກັບບ້ານສະຫງົບເສິກ Panmunjom.”

ກອງບັນຊາການ UN ເຊິ່ງຄວບຄຸມການຢຸດຍິງ ທີ່ໄດ້ສິ້ນສຸດສົງຄາມ ເກົາຫຼີ ໃນປີ 1950- 1953, ໄດ້ກ່າວປະນາມ ພຽງຢາງ ໃນຖະແຫຼງ ການສະບັບໜຶ່ງ ທີ່​ນຳ​ອອກ​ເຜີຍ​ແຜ່ໃນວັນ ອັງຄານວານນີ້ ໂດຍກ່າວວ່າ ມັນ “ໄດ້ເປັນອັນຕະລາຍຢ່າງຮ້າຍແຮງ ຕໍ່ຄວາມປອດໄພ ຂອງປະຊາ ຊົນທັງສອງຟາກ” ຂອງເຂດປອດທະຫານ.

ອ່ານຂ່າວນີ້ຕື່ມເປັນພາສາອັງກິດ

ສະແດງຄວາມເຫັນໃຫ້ເບິ່ງ

XS
SM
MD
LG