ລິ້ງ ສຳຫລັບເຂົ້າຫາ

​ເກົາຫຼີ​ເໜືອ ​ຍົກ​ເລີກ ຂໍ້ຫ້າມ ເດີນທາງເຂົ້າປະເທດ ຂອງພວກນັກທ່ອງທ່ຽວ ຍ້ອນໂຣກອີໂບລາແລ້ວ


ພວກໂດຍສານ ກຳລັງຕຽມຂຶ້ນເຮືອບິນ Koryo ໃນ ພຽງຢາງ ເກົາຫຼີເໜືອ

ພວກໂດຍສານ ກຳລັງຕຽມຂຶ້ນເຮືອບິນ Koryo ໃນ ພຽງຢາງ ເກົາຫຼີເໜືອ

ເກົາຫຼີ​ເໜືອ ​ໄດ້​ຍົກ​ເລີກລະບຽບການຈຳນວນນຶ່ງສຳ​ຫຼັບ​ບັນດາ
​ນັກ​ທ່ອງ​ທ່ຽວ​ຊາວ​ຕ່າງ​ຊາດ ທີ່​ມີ​ຜົນ​ບັງຄັບ​ໃຊ້ ​ເພື່ອປ້ອງກັນ​ການ
​ແຜ່​ລະບາດຂອງ​ໂຣກອີ​ໂບລາ ທີ່​ຮ້າຍ​ແຮງ​ເຖິງ​ຕາຍ​ນັ້ນ.

ພຽງ​ຢາງ​ໄດ້​ປິດ​ຊາຍ​ແດນ​ຂອງ​ຕົນ​ ຕໍ່​ຊາວ​ຕ່າງ​ຊາດ​ໃນ​ເດືອນ​
ຕຸລາ​ປີ​ກາຍ​ນີ້ ​ແລະ​ບັງຄັບໃຫ້​ພວກ​ທີ່​ເຂົ້າ​ປະ​ເທດທັງໝົດ ທຳການ
​ກັກ​ບໍລິ​ເວນຢ່າງເຄັ່ງ​ຄັດເປັນເວລາ 21 ມື້​.

ມີ​ຢ່າງ​ນ້ອຍ​ 2 ບໍລິສັດ​ທ່ອງ​ທ່ຽວ​ໄດ້​ລາຍ​ງານ​ໃນ​ວັນ​ອັງຄານ​ມື້​ນີ້ວ່າ
ຕົນໄດ້ຖືກແຈ້ງຈາກ​ພຽງ​ຢາງ ວ່າສ່ວນ​ໃຫຍ່​ຂອງ​ລະບຽບການ​ຕ່າງ​ໆ ທີ່ຫ້າມກ່ຽວກັບການເດີນທາງ​ນັ້ນ ​ໄດ້ຖືກ​ຍົກ​ເລີກ​ແລ້ວ.

​ແຕ່​ວ່າການ​ກັກ​ບໍລິ​ເວນຍັງຈະ​ມີ​ຜົນ​ບັງຄັບ​ໃຊ້​ຕໍ່ໄປສຳ​ຫຼັບ​ນັກ​ທ່ອງ​ທ່ຽວ​ທີ່​ມາ​ຈາກ Guinea, Liberia, Sierra Leone ​ແລະ​ບັນດາ​ປະ​ເທດ ​ທີ່​ໄດ້​ມີ​ການ​ລະບາດຂອງ​ໂຣກອີ​ໂບລາໃນ​ອາ​ຟຣິກາ​ຕາ​ເວັນ​ຕົກ ອິງ​ຕາມ​ແຫຼ່ງ​ຂ່າວ​ທາງ​ການ​ທູດ​ຂອງ​ພຽງ​ຢາງ.

ຫຼາຍໆ​ປະ​ເທດ​ໄດ້​ວາງຂໍ້ຈຳກັດກ່ຽວກັບການ​ເດີນທາງຕໍ່​ພວກ​ນັກ​ທ່ອງ​ທ່ຽວ​ຈາກ​ປະ​ເທດ​ແຖບ
ອາ​ຟຣິກາ​ຕາ​ເວັນ​ຕົກ ຫຼັງຈາກ​ທີ່​ໄດ້ມີ​ການ​ແຜ່​ລະບາດ​ຂອງ​ໂຣ​ກອີ​ໂບລາ ທີ່​ໄດ້​ເອົາ​ຊີວິດ​ຜູ້​ຄົນ​ໄປແລ້ວ 9 ພັນ 500 ຄົນ ນັບ​ຕັ້ງ​ແຕ່ ​ເດືອນ​ທັນວາ ປີ 2013 ​ເປັນ​ຕົ້ນ​ມາ.

​ເກົາຫຼີ​ເໜືອ ​ແມ່ນ​ນຶ່ງ​ໃນ​ບັນດາ​ປະ​ເທດ​ທີ່​ໂດດດ່ຽວທີ່ສຸດໃນໂລກ ​ແລະ​ບໍ່​ມີ​ລາຍ​ງານ​ກ່ຽວ​ກັບກໍລະນີ​ລະບາດຂອງ​ໂຣກອີ​ໂບລາ ​ໃດ​ໆ​ເລີຍ ຈຶ່ງ​ພາ​ໃຫ້​ມີ​ຄຳ​ຖາມ​ກ່ຽວ​ກັບ​ວ່າ ​ເປັນ​ຫຍັງ ຈຶ່ງ​ມີ​ວາງຂໍ້ຈຳກັດທີ່​ວ່າ​ນີ້.

ສື່​ຂອງ​ທາງ​ການ​ເກົາຫຼີ​ເໜືອ ທີ່​ໄດ້​ພິມ​ເຜີຍ​ແຜ່​ເລື້​ອຍໆ​ໃນ​ທຳນອງ​ແບບ​ໂກດແຄ້ນ ​ແລະເວົ້າ ໂຍກເກີນຄວາມເປັນຈິງ​ໃນບົດ​ບັນ​ນາ​ທິການກ່ຽວ​ກັບ​ສະຫະລັດ ທີ່​ໄດ້​ລາຍ​ງານ​ວ່າ ​ໄວຣັສນີ້​ແມ່ນ​ເປັນອາວຸດຊີວະພາບ ທີ່​ວໍ​ຊີງ​ຕັນ​ໄດ້ສ້າງ​ຂຶ້ນ.

XS
SM
MD
LG