ເກົາຫລີເໜືອກຳລັງປະສົບກັບໄພແຫ້ງແລ້ງທີ່ຮ້າຍແຮງສຸດໃນ
ສັດຕະວັດອິງຕາມລາຍງານຂ່າວລັດຖະບານ ເຮັດໃຫ້ສະພາບ
ການຂາດແຄນອາຫານຢ່າງໜັກໜ່ວງທີ່ມີຢູ່ແລ້ວໃນປະເທດທີ່
ທຸກຍາກດັ່ງກ່າວ ຊຸດໂຊມລົງຕື່ມ.
ອົງການຂ່າວສູນກາງຂອງເກົາຫລີເໜືອຫລື KCNA ລາຍງານ
ໃນວັນອັງຄານວານນີ້ ໂດຍໃຊ້ຊື່ຫຍໍ້ຢ່າງເປັນທາງການ ຂອງ
ປະເທດວ່າ “ໄພແຫ້ງແລ້ງທີ່ຮ້າຍແຮງສຸດໃນຮອບ 100 ປີ ຍັງ
ດຳເນີນຕໍ່ໄປໃນ ສປປ ເກົາຫຼີໂດຍໄດ້ສ້າງຄວາມເສຍຫາຍໃຫຍ່ຫຼວງທີ່ສຸດ.”
ອົງການຂ່າວ KCNA ກ່າວວ່າ ທົ່ງນາໄດ້ແຫ້ງແລ້ງ ຢູ່ໃນແຂວງ ປູກເຂົ້າທີ່ສຳຄັນໆຮວມ
ທັງ Hwanghae ແລະ Pyongan ເພາະວ່າ ເກືອບໍ່ມີຝົນຕົກເລີຍ.
ເກົາຫລີເໜືອ ໄດ້ປະສົບກັບໄພອຶດຢາກທີ່ຮ້າຍແຮງ ໃນຊຸມປີ 1990 ເຮັດໃຫ້ຫລາຍຮ້ອຍ
ພັນຄົນເສຍຊີວິດ. ນັບແຕ່ນັ້ນມາ ໄດ້ເກີດການຂາດແຄນອາຫານມາເປັນປະຈຳ ໂດຍເຮັດ
ໃຫ້ສະພາບການໜັກຂື້ນຍ້ອນນນ້ຳຖ້ວມ ໄພແຫ້ງແລ້ງ ແລະຄວາມຜິດພາດດ້ານການ
ບໍລິຫານງານ.
ສະຫະປະຊາຊາດ ກ່າວວ່າ 70 ເປີເຊັນຂອງປະຊາກອນ ຫລື ຊາວເກົາຫລີເໜືອ 18 ລ້ານ
ຄົນ ຂາດແຄນອາຫານ ແລະຂາດແຮ່ທາດຕ່າງໆ. ສະພາບຂາດແຄນອາຫານແມ່ນສູງ
ຫຼາຍ ໂດຍມີເດັກນ້ອຍ 27.9 ເປີເຊັນ ທີ່ອາຍຸຕ່ຳກວ່າຫ້າປີ ແມ່ນຂາດອາຫານການກິນ
ແບບຊຳເຮື້ອ.
ໃນເດືອນເມສາຜ່ານມາ ສະຫະປະຊາຊາດ ໄດ້ເລີ້ມຮ້ອງຂໍເງິນ 111 ລ້ານໂດລາເພື່ອເປັນ
ທຶນສະໜັບສະໜຸນ ໃຫ້ແກ່ຫ້າອົງການຊ່ວຍເຫລືອ ທີ່ປະຕິບັດງານຢູ່ປະເທດດັ່ງກ່າວ ສືບ
ຕໍ່ສະໜອງເກົາຫລີເໜືອ ດ້ວຍອາຫານການກິນ ນຳ້ສະອາດ ແລະປັດໄຈທີ່ຈຳເປັນຕ່າງໆ
ໃນປີ 2015.
ເກົາຫລີໃຕ້ ຊຶ່ງໄດ້ປະສົບກັບສະພາບແຫ້ງແລ້ງບໍ່ມີຝົນຕົກເຊັ່ນກັນ ຍັງບໍ່ທັນໄດ້ໃດໆກ່ຽວ
ກັບລາຍງານຂອງອົງການຂ່າວ KCNA. ແຕ່ຫວ່າງມໍ່ໆມານີ້ໄດ້ເຕືອນ ວ່າ ການຜະລິດ
ພືດຜົນຂອງເກົາຫລີເໜືອອາດຈະຫຼຸດລົງເຖິງ 20 ເປີເຊັນຈາກ ລະດັບປີກາຍນີ້ ຖ້າຫາກ
ໄພແຫ້ງແລ້ງຍັງດຳເນີນຢູ່ອີກຕໍ່ໄປ.
