ລິ້ງ ສຳຫລັບເຂົ້າຫາ

ເກົາຫລີເໜືອ ຕຽມຈັດພິທີ ສົ່ງສະການ ມື້ລາງ ຜູ້ນໍາປະເທດ

  • ສິງ ບູຣົມມະວົງ

ທະຫານເກົາຫລີເໜືອກໍາລັງວາງພວງມາລາໄວ້ອາໄລນໍາອະດີດ ຜູ້ນໍາປະເທດ ທ່ານກິມຈົງອີລ. ວັນທີ 27 ທັນວາ 2011

ເກົາຫລີ​ເໜືອ​ກໍາລັງ​ກະກຽມ​ພິທີ​ສັ່ງ​ລາ​ຫລື​ສົ່ງສະການ​ໃນ​ວັນ​ພຸດ​ມື້​ອື່ນ ຕໍ່ທ່ານ​ກິມ
ຈົງ​ອີລ ມື້​ລາງ​ຜູ້​ນໍາ​ໃນ​ຂະນະ​ທີ່​ປະຊາຊົນ​ຢູ່​ໃນ​ທົ່ວ​ໂລກ​ສິ້ງ​ຊອມ​ເບິ່ງ​ຮ່ອງຮອຍ​ຕ່າງໆ
​ສໍາລັບ​ພວກ​ກໍາ​ອໍາ​ນາດ​ຊຸດ​ໃໝ່​ໃນ​ອະນາຄົດ​ໃນ​ປະ​ເທດ​ທີ່ປິດ​ລັບ​ແລະ​ມີ​ອາວຸດ​ນີວ
​ເຄລຍນັ້ນ.

ມາ​ຮອດ​ປັດຈຸບັນ​ນີ້ ສື່​ມວນ​ຊົນ​ທາງ​ການ​ກຸງ​ພຽງ​ຢ້າງບໍ່​ໄດ້ແຈ້ງ​ລາຍ​ລະອຽດ​ໃດໆ
​ໃຫ້​ຊາບ​ກ່ຽວ​ກັບ​ພີ​ທີ​ທີ່​ໄດ້ວາງ​ແຜນ​ໄວ້ ​ແລະ​ມີ​ການ​ເກືອດ​ຫ້າມ​ຊາວ​ຕ່າງປະ​ເທດ
​ເຂົ້າ​ໄປນັ້ນ ​ແຕ່​ບັນດາ​ນັກວິ​ເຄາະ​ເຫດການ ຄາດ​ວ່າ ພິທີ​ດັ່ງກ່າວ​ຈະ​ດໍາ​ເນີນ​ໄປ​
ຄ້າຍຄື​ກັນກັບພິທີ​ຂອງ​ມື້​ລາງ​ບິດາ​ຂອງທ່ານ​ກິມ​ແລະ​ມື້​ລາງ​ປະທານ​ປະ​ເທດກິ​ມ
ອີລຊຸງ ຜູ້​ກໍ່​ຕັ້ງ​ປະ​ເທດ ຊຶ່ງ​ໄດ້ສະ​ແດງ​ເຖິງ​ຈຸດ​ເດັ່ນ​ຕ່າງໆ​ຂອງ​ການ​ປົກຄອງ​ປະ​ເທດ
​ຂອງ​ທ່ານ ​ແລະ​ເພີ່ມ​ຄວາມ​ຈົງ​ຮັກ​ພັກດີ​ທີ່​ເຂັ້ມ​ແຂງຂຶ້ນ​ສໍາລັບ​ຜູ້​ສືບ​ທອດອໍານາດ
​ຂອງ​ທ່ານ​ນັ້ນ.

ສື່​ມວນ​ຊົນ​ທາງ​ການ​ເກົາຫລີ​ເໜືອ​ໄດ້​ສືບ​ຕໍ່​ສ້າງ​ຫລັກ​ຖານ​ຄວາມ​ໄວ້​ວາງ​ໃຈ​ໃນ​ການ​ນໍາພາ​
ຂອງ​ທ່ານ​ກິມຈົງ​ອຸນ ຜູ້​ນໍາ​ຄົນ​ໃໝ່ ​ໂດຍ​ປະກາດ​ໃຫ້​ຮູ້ໃນ​ວັນ​ຈັນ​ວານ​ນີ້​ວ່າ ທ່ານ​ກິມ​ໄດ້​ຖືກ​
ແຕ່ງ​ຕັ້ງ​ໃຫ້​ດໍາລົງ​ຕໍາ​ແໜ່​ງສູງ​ສຸດໃນ​ພັກ​ຄອມ​ມີ​ວນີດ. ຜູ້​ນໍາ​ຄົນ​ໃໝ່​ທີ່ຍັງ​ໜຸ່ມຢູ່ທ່ານ​ນີ້ ​ໄດ້
ພົບ​ປະ​ໃນ​ວັນ​ຈັນ​ວານ​ນີ້​ໃນ​ກຸງ​ພຽງ​ຢ້າງ​ກັບ​ຄະນະ​ນໍາພາ​ເອກະ​ຊົນ​ເກົາຫລີ​ໃຕ້​ທີ່ມີ​ຊື່​ສຽງ​
ຈຸ​ນຶ່ງ ​ໃນການ​ປາກົດ​ໂຕຄັ້ງ​ທໍາ​ອິດ​ຕໍ່​ສາທາລະນະຂອງ​ທ່ານກັບ​ແຂກ​ຕ່າງປະ​ເທດ​ນັບ​ແຕ່​
ບິດາ​ຂອງ​ທ່ານ​ໄດ້​ເຖິງ​ແກ່​ມໍລະນະ​ກໍາ​ໄປ​ທີ່​ປະກາດ​ໃຫ້​ຮູ້​ໃນສັບປະດາ​ຜ່ານ​ມາ​ນີ້.

ພວກ​ລັດຖະບານ​ຕ່າງປະ​ເທດກໍາລັງ​ຈັບ​ຕາ​ເບິ່ງ​ເຫດການ​ຕ່າງໆ​ໃນກຸງ​ພຽງ​ຢ້າງ​ຢ່າງ​ໃກ້ຊິດ
ຍ້ອນ​ຄວາມ​ເປັນ​ຫ່ວງ​ກັງວົນ​ກ່ຽວ​ກັບ​ການ​ຂຶ້ນດໍາລົງ​ຕໍາ​ແໜ່​ງຂອງ​ທ່ານ​ກິ​ມຈົງ​ອຸນທີ່​ຍັງ​ໜຸ່ມ
ໃນ​ປະ​ເທດ​ທີ່​ກໍາລັງ​ດໍາ​ເນີນໂຄງການຜະລິດ​ອາວຸດ​ນີວ​ເຄລຍ ກອງທັບ​ທີ່​ໃຫຍ່​ຫລວງ ​ແລະ
ປະວັດ​ສາ​ດມີ​ຄວາມ​ກຽດ​ຊັງ​ຢ່າງ​ເລິກ​ເຊິ່ງຕໍ່​ພວກ​ປະ​ເທດ​ເພື່ອນ​ບ້ານ​ນັ້ນ.

XS
SM
MD
LG