ຕຳຫລວດ ໄນຈີເຣຍ ກ່າວວ່າ ຜູ້ວາງລະເບີດສະລະຊີບຄົນນຶ່ງ
ໄດ້ສັງຫານຢ່າງໜ້ອຍເຈັດຄົນ ຢູ່ທີ່ບ່ອນຖອນເງິນ ATM ທາງ
ຕາເວັນອອກສຽງເໜືອຂອງປະເທດ.
ຕຳຫລວດກ່າວວ່າ ເຂົາເຈົ້າເຊື່ອວ່າຜູ້ຍິງທີ່ວາງລະເບີດສະລະ
ຊີບຄົນນີ້ ໄດ້ທຳການໂຈມຕີ ໃນວັນສຸກວານນີ້ ແລະ ກ່າວວ່າ
ເຂົາເຈົ້າໄດ້ຈັບຜູ້ຕ້ອງສົງໄສສີ່ຄົນ.
ໂຄສົກຕຳຫຼວດ ທ່ານ Muhammad Haruna ກ່າວວ່າ ຢ່າງ
ໜ້ອຍ 10 ຄົນ ໄດ້ຮັບບາດເຈັບ ຈາກການໂຈມຕີດັ່ງກ່າວ ທີ່
ໄດ້ລະເບີດຂື້ນຢູ່ສາຂານຶ່ງຂອງທະນາຄານ First Bank ຂອງໄນຈີເຣຍ ທີ່ເມືອງ Azare
ໃນລັດ Bauchi.
ກ່ອນໜ້ານັ້ນ ກໍມີລາຍງານວ່າ ພົນລະເຮືອນຢ່າງໜ້ອຍ 16 ຄົນ ແລະ ພວກຫົວຮຸນແຮງ
ຫຼາຍສິບຄົນ ໄດ້ເສຍຊີວິດຢູ່ໃນຂົງເຂດດຽວກັນ ຫຼັງຈາກເກີດການປະທະກັນ ລະຫວ່າງ
ພວກທະຫານ ແລະກຸ່ມຫົວຮຸນແຮງ Boko Haram.
ພວກທີ່ເຫັນເຫດການ ກ່າວຕໍ່ ວີໂອເອ ວ່າ ພວກນັກລົບ Boko Haram ໄດ້ບຸກໂຈມຕີ
ເມືອງ Malum Fatori ໃນວັນພຸດທີ່ຜ່ານມາ ໂດຍໄດ້ສູ້ລົບກັນຢ່າງໜັກ ເປັນເວລາດົນ
ກວ່າ 12 ຊົ່ວໂມງ.
ທ່ານ Modu Bukara ພໍ່ຄ້າຢູ່ໃນເມືອງດັ່ງກ່າວ ເວົ້າວ່າ ຫລັງຈາກນັ້ນທ່ານໄດ້ນັບວ່າມີ ຊາວເມືອງ 16 ຄົນໄດ້ເສຍຊີວິດ. ທ່ານກ່າວວ່າ ພວກຫົວຮຸນແຮງຫລາຍສິບຄົນໄດ້ຖືກ
ສັງຫານໃນການສູ້ລົບ ແລະຈາກການໂຈມຕີທາງອາກາດ.
