ລິ້ງ ສຳຫລັບເຂົ້າຫາ

ສະພາ ໄນຈີເຣຍ ບໍ່ອະນຸມັດ ໃຫ້ຕໍ່ອາຍຸ ພາວະສຸກເສີນ ຢູ່ໃນ 3 ລັດ


ເຈົ້າໜ້າທີ່ຮັກສາຄວາມປອດໄພ ຢືນຍາມ ປະຕູ ທາງເຂົ້າ ລັດຖະສະພາໃນເມືອງ Abuja ປະເທດໄນຈີເຣຍ. ວັນພະຫັດທີ 20 ພະຈິກ 2014.

ສະພາ​ຕ່ຳ​ຂອງ​ໄນ​ຈີ​ເຣຍ ​ໄດ້​ປະຕິ​ເສດ ຕໍ່ການ​ຮ້ອງ​ຂໍຂອງ​ປະ
ທານາທິບໍດີ Goodluck Jonathan ເພື່ອຢາກຕໍ່ອາຍຸພາວະ
ສຸກເສີນ ຢູ່ໃນ 3 ລັດ​ທາງ​ພາກ​ຕາ​ເວັນ​ອອກສຽງ​ເໜືອ ຂອງ​
ປະ​ເທດ ຊຶ່ງ​ເປັນບ່ອນ​ທີ່​ກອງທັບ ​ພວມທຳການ​ຕໍ່ສູ້ ​ກັບ​ພວກ
ກຸ່ມ​ຫົວ​ຮຸນ​ແຮງ​ໂບ​ໂກ​ ຮາຣາມນັ້ນ.

ພັກ​ຝ່າຍ​ຄ້ານທີ່​ໃຫຍ່ສຸດ​ຂອງ​ປະ​ເທດ ກ່າວ​ໃນ​ວັນ​ພະຫັດ​ວາ​ນນີ້
ວ່າ ​ອຳນາດ​ພິ​ເສດນັ້ນ ​ແມ່ນໄດ້ປະສົບກັບ ຄວາມຫລົ້ມ​ແຫລວ
ຢ່າງ​ສິ້ນ​ເຊີງ ​ໃນ​ການ​ຫລຸດຜ່ອນ ​ການກໍ່ຄວາມ​ວຸ້ນວາຍ ຂອງພວກ
​ຫົວຮຸນແຮງອິສລາມ ຢູ່​ໃນ​ຂົງ​ເຂດ ​ແລະ​ໄດ້​ໝົດ​ກຳນົດໄປແລ້ວ.
​ແຕ່​ຢ່າງ​ໃດ​ກໍ​ຕາມ ປະທານາ ທິບໍດີ ຍັງ​ຄົງ​ມີ​ອຳນາດ​ ທີ່​ຈະ​ສົ່ງກອງ​
ທະຫານ ​ໄປຍັງເຂດ​ຕ່າງໆ​ທີ່​ມີ​ບັນຫາຂອງ​ປະ​ເທດໄດ້.

ກອງກຳລັງ​ຮັກສາຄວາມປອດ​ໄພ ​ໄດ້​ຍິງ​ແກັສນ້ຳຕາ​ເຂົ້າ​ໄປ​ໃນ​ສະພາ ​ເມື່ອ​ວັນ​ພະຫັດ​ວານ​ນີ້ ​ໃນ​ການ​ປະ​ທະ​ກັນ​ກັບ ພວກ​ສະ​ໜັບສະ​ໜຸນ ປະທານ​ສະພາຕ່ຳ ທ່ານ Aminu Tambuwal ຢ່າງ​ນ້ອຍ ຈຳນວນ 200 ຄົນ ຜູ້​ທີ່​ຕຳຫລວດຫາທາງຂັດຂວາງບໍ່ໃຫ້ພວກ​ເຂົາ​ເຈົ້າ ເຂົ້າ​ໄປ ອອກສຽງ​ໃນ​ສະພາ. ຄົນຜູ້​ນຶ່ງ ຢູ່​ໃນ​ສະຖານ​ທີ່​ແຫ່ງ​ນັ້ນ ກ່າວ​ວ່າ ຢູ່​ທີ່ ຫ້ອງຮັບຮອງຂອງສະພາ ນອກຫ້ອງ​ປະຊຸມນັ້ນ ​ແມ່ນ​ເຕັມ​ໄປ​ດ້ວຍ​ຄວັນ​ແກັສນ້ຳຕາ ​ໃນ​ຂະ​ນະ​ທີ່​ຫລາຍໆ ຄົນ ຫາຍ​ໃຈ​ບໍ່​ໄດ້ ​ແລະ ຊອກ​ຫາ​ທາງ​ອອກ​ໄປ​ຂ້າງ​ນອກ.

​ໃນ​ທີ່​ສຸດ ກອງ​ປະຊຸມ​ແບ​ບປິດ​ລັບ ຂອງ​ສະມາຊິກສະພາ​ບາງ​ສ່ວນ ​ໄດ້​ມີຂຶ້ນກັບ​ປະທານ​ສະພາ​ຕ່ຳ ​ແລະກໍໄດ້ມີການ​ຕັດສິນໃຈ​ວ່າ ຈະ​ບໍ່​ຕໍ່ອາຍຸ ພາວະສຸກເສີນ ທີ່ຮ້ອງ​ຂໍ​ໂດຍ
ປະທານາທິບໍດີ​ນັ້ນ ​ແຕ່ບໍ່​ໄດ້​ມີ​ການ​ລົງ​ຄະ​ແນນ​ສຽງ​ໃດໆ​ເລີຍ.

XS
SM
MD
LG