ປະທານາທິບໍດີ ໄນຈີເຣຍ ທ່ານ Goodluck Jonathan ໄດ້ອອກມາປະກາດວ່າ ລັຖບານ
ຈະຕັດລາຄານໍ້າມັນລົງ ຫລັງຈາກທີ່ມີການນັດຢຸດງານປະທ້ວງທົ່ວປະເທດມາເປັນເວລານຶ່ງ
ອາທິດ ເພາະລາຄານໍ້າມັນໄດ້ແພງສູງເກີນໄປ.
ທ່ານ Jonathan ກ່າວຜ່ານທາງໂທລະພາບໃນວັນຈັນມື້ນີ້ວ່າ “ຕໍ່ໜ້າສະພາບການທີ່ວ່າ
ປະຊາຊົນໄນຈີເຣຍພາກັນໄດ້ຮັບຄວາມຍາກລໍາບາກໃນເວລານີ້” ລາຄານໍ້າມັນຈະລຸດລົງມາ
ປະມານ 60 ເຊັນຕໍ່ນຶ່ງລິດ ຊຶ່ງເປັນການຕັດລົງມາປະມານ 35 ເປີເຊັນ ແຕ່ລາຄານໍ້າມັນກໍ
ຍັງແພງກວ່າ 45 ເຊັນຕໍ່ລິດ ທີ່ຊາວ ໄນຈີເຣຍເຄີຍຊື້ກ່ອນໜ້າລັດຖະບານຢຸດໃຫ້ການຊ່ວຍ
ເຫລືອເກື້ອກຸນລາຄານໍ້າມັນໃນມື້ຂຶ້ນປີໃໝ່.
ປະທານາທິບໍດີກ່າວຕື່ມອີກວ່າ ການປະທ້ວງໄດ້ຖືກສວຍໂອກາດ ໂດຍພວກທີ່ພະຍາຍາມ
ສົ່ງເສີມໃຫ້ມີການຂັດແຍ້ງ ສ້າງຄວາມວຸ້ນວາຍ ແລະຄວາມບໍ່ປອດໄພ.
ໄດ້ມີການສົ່ງທະຫານອອກປະຈໍາການຢູ່ຕາມບ່ອນຕ່າງໆ ທີ່ໄດ້ມີການໂຮມຊຸມນຸມ
ປະທ້ວງ ໃນໄລຍະສອງອາທິດຜ່ານມາ ໂຮມທັງໃນນະຄອນພານິດ Lagos ທີ່ມີພວກ
ປະທ້ວງຫລາຍນ້ອຍຄົນໄປຊຸມນຸມກັນຢູ່. ພວກທະຫານຍັງໄດ້ຈັດຕັ້ງສິ່ງກີດຂວາງຂຶ້ນ
ຕັນຖະໜົນຫລາຍໆສາຍໃນເມືອງດັ່ງກ່າວ ແລະກວດຄົ້ນລົດຢູ່ຕາມດ່ານຕັນຫົນທາງນັ້ນ.
ກ່ອນໜ້ານີ້ ພວກຜູ້ນໍາກໍາມະບານໄດ້ປະຕິຍານວ່າ ເຂົາເຈົ້າຈະສືບຕໍ່ການນັດຢຸດງານ
ປະທ້ວງໃນວັນຈັນນີ້ ຫລັງຈາກໄດ້ທໍາການເຈລະຈາກັນກັບ ທ່ານ Jonathan ໃນຕອນ
ເດິກວັນອາທິດວານນີ້ ແຕ່ໄດ້ກ່າວໃນເວລາຕໍ່ມາວ່າ ພວກເຂົາເຈົ້າໄດ້ລົບລ້າງການປະທ້ວງ
ຍ້ອນຄວາມເປັນຫ່ວງທາງດ້ານຄວາມປອດໄພ.
