ພວກສະໜັບສະໜູນພັກທີ່ນິຍົມລັດທິເມົາເຈີຕຸງ ຊຶ່ງເປນພັກຝ່າຍຄ້ານຂອງເນປາລ ໄດ້ພາກັນອອກໄປ ເຕົ້າໂຮມກັນຢ່າງແອອັດຢູ່ຕາມຖະໜົນຫົນທາງ ຂອງນະຄອນຫລວງກາທມັນດູ ໃນວັນອາທິດມື້ນີ້ໃນການນັດຢຸດງານປະທ້ວງ ເພື່ອບີບບັງຄັບໃຫ້ນາຍົກລັດຖະມົນຕີ Madhav Kumar Nepal ລາອອກຈາກຕຳ ແໜ່ງນາຍົກລັດຖະມົນຕີໂດຍທັນທີ.
ການປະທ້ວງໄດ້ປິດການຂົນສົ່ງ ໂຮງຮຽນ ແລະຕະຫລາດໃນທົ່ວປະເທດເນປາລ.
ສະມາຊິກພັກນິຍົມເມົາເຈີຕຸງ ແລະພວກສະໜັບສະໜູນເຂົາເຈົ້າຈຳນວນຫລາຍໝື່ນຄົນ ໄດ້ເລີ່ມພາກັນເດີນຂະບວນຜ່ານເມືອງຫລວງຂອງເນປາລ ເມື່ອວັນເສົາວານນີ້ ເພື່ອຮຽກຮ້ອງໃຫ້ນາຍົກລັດຖະມົນຕີລາ ອອກຈາກຕຳແໜ່ງນັ້ນ.
ແຕ່ນາຍົກເນປາລ ກ່າວວ່າ ທ່ານບໍ່ມີແຜນການທີ່ຈະລາອອກ ແລະວ່າລັດຖະບານຈະບໍ່ຍອມກົ້ມຫົວໃຫ້ແກ່ການນາບຂູ່ ການສ້າງຄວາມຮຸນ ແຮງ ແລະການຢຸດງານປະທ້ວງນັ້ນ.
ສ່ວນຜູ້ນຳພັກນິຍົມເມົາເຈີຕຸງ ອະດີດນາຍົກລັດຖະມົນຕີເນປາລ ທ່ານ Pushpa Kamal Dahal ຫລືທີ່ຮູ້ກັນດີໃນອີກຊື່ນຶ່ງ ວ່າ Prachan-da ນັ້ນ ໄດ້ທຳນາຍວ່າ ລັດຖະບານເນປາລຈະພັງທະລາຍລົງ ພາຍ ໃນບໍ່ເທົ່າໃດມື້ຂ້າງໜ້ານີ້ ແລະທ່ານກໍຈະຂື້ນເປັນນາຍົກລັດຖະມົນຕີຄົນຕໍ່ໄປຂອງເນປາລ.