ລິ້ງ ສຳຫລັບເຂົ້າຫາ

ເນໂຕ້ ປະຊຸມສຸດຍອດກັນ ຢູ່ Chicago ສະຫະລັດ (ວີດີໂອ)

  • ສິງ ບູຣົມມະວົງ

ປະທານາທິບໍດີ ບາຣັກ ໂອບາມາ ແລະສັດຕີໝາຍເລກນຶ່ງ Michelle Obama ເດີນທາງໄປຮອດສະໜາມບິນລະຫວ່າງຊາດ O'Hare ນະຄອນ Chicago ເພື່ອເຂົ້າຮ່ວມກອງປະຊຸມສຸດຍອດກຸ່ມເນໂຕ້.
ວັນທີ 19 ພຶດສະພາ 2012.

ປະທານາທິບໍດີ ບາຣັກ ໂອບາມາ ແລະສັດຕີໝາຍເລກນຶ່ງ Michelle Obama ເດີນທາງໄປຮອດສະໜາມບິນລະຫວ່າງຊາດ O'Hare ນະຄອນ Chicago ເພື່ອເຂົ້າຮ່ວມກອງປະຊຸມສຸດຍອດກຸ່ມເນໂຕ້. ວັນທີ 19 ພຶດສະພາ 2012.

ບັນດາ​ເຈົ້າ​ໜ້າ​ທີ່​ ​ຈາກ​ຫຼາຍ​ກວ່າ 50 ປະ​ເທດ​ ກໍາລັງ​ເຕົ້າ​ໂຮມ​ກັນຢູ່​ທີ່ ​ນະຄອນ Chicago ລັດ Illinois ຂອງ​ສະຫະລັດ​ ໃນ​ວັນ​ອາທິດມື້​ນີ້​ ເພື່ອ​ເຂົ້າ​ຮ່ວມ​ກອງ​ປະຊຸມ​ສຸດ​ຍອດ​ 2 ມື້​ ຂອງ​ກຸ່ມ​ເນໂຕ້​ ເພື່ອ​ທໍາ​ການ​ໂອ້​ລົມ​ສົນທະນາ​ກັນກ່ຽວ​ກັບ​ຫລາຍໆ​ບັນຫາ ​ທີ່​ກໍາລັງ​ສົ່ງ​ຜົນ​ກະທົບ​ຕໍ່​ອະນາຄົດ​ຂອງ​ພັນທະ​ມິດ​ດັ່ງກ່າວ.

ຄາດ​ກັນ​ວ່າ​ເລື້ອງ​ອັຟກາ​ນິສຖານ​ຈະ​ເປັນບັນຫາຄອບ​ງໍາການ​ຫາລື​ໃນ​ກອງ​ປະຊຸມ ທີ່​ທ່ານ​ບາຣັກ ​ໂອ​ບາ​ມາ ປະທານາທິບໍດີ​ສະຫະລັດ​ເປັນ​ເຈົ້າພາບ​ຈັດ​ຂຶ້ນ​ນັ້ນ.

ກຸ່ມ​ເນ​ໂຕ້​ກໍາລັງ​ວາງ​ແຜນ​ທີ່​ຈະ​ໂອນ​ການ​ຄວບ​ຄຸມດ້ານ​ຄວາມ​ປອດ​ໄພ​ເທື່ອ​ລະ​ຂັ້ນໆ​ໄປ​ໃຫ້ກອງກໍາລັງ​ຂອງ​ອັຟການິສຖານ ​ແລະ​ແຜ້ວທາງ​ສໍາລັບ​ການ​ຖອນ​ທະຫານຂອງ​ກຸ່ມ​ເນ​ໂຕ້ ຈໍານວນປະມານ 130 ພັນ​ຄົນອອກ​ຈາກ​ອັຟກາ​ນິສຖານ ​ພາຍ​ໃນ​ທ້າຍ​ປີ 2014 ນັ້ນ.

ທ່ານ Anders Fogh Rasmussen ຫົວໜ້າ​ກຸ່ມ​ເນ​ໂຕ້​ໄດ້​ກ່າວ​ວ່າ ປາ​ກິ​ສຖານ​ມີ​ບົດບາດ​ສໍາຄັນ​ໃນ​ແຜນການ​ດັ່ງກ່າວ ​ແລະ​ໄດ້​ເຊື້ອເຊີນ​ ປະທານາທິບໍດີ Asif Ali Zardari ​ແຫ່ງ​ປາ​ກິ​ສຖານ ​ມາ​ຮ່ວມກອງປະຊຸມ​ສຸດ​ຍອດ​ຄັ້ງ​ນີ້ນໍາ. ໃນ​ສັບປະດາ​ຜ່ານ​ມາ​ນີ້ ​ປາ​ກິ​ສຖານໄດ້​ຕົກລົງ​ທີ່​ຈະ​ໄຂ​ເສ້ນ​ທາງ​ລໍາ​ລຽງທີ່​ສໍາຄັນ​ຂອງ​ກຸ່ມ​ເນ​ໂຕ້ ທີ່​ແລ່ນ​ຜ່ານ​ດິນ​ແດນ​ຂອງຕົນ​ໄປ​ຍັງ​ອັຟກາ​ນິສຖານ​ນັ້ນ.

ກຸງ​ອິສລາມາ​ບັດ​ໄດ້​ອັດ​ເສ້ນ​ທາງ​ລໍາລຽງ​ດັ່ງກ່າວ ​ປະມານ 6 ​ເດືອນຜ່ານ​ມາ ​ເວລາ​ການ​ໂຈມ​ຕີ​ທາງ​ອາກາດ​ພາຍ​ໃຕ້​ການ​ນໍາພາ​ຂອງ​ສະຫະລັດໄດ້ສັງຫານ​ທະຫານ​ປາ​ກິ​ສຖານ 24 ຄົນ​ ​ໃນ​ເຂດ​ຊາຍ​ແດນທີ່​ຕິດ​ກັບ​ອັຟກາ​ນິຖານ​ນັ້ນ.

ມີການ​ຮັກສາ​ຄວາມ​ປອດ​ໄພຢ່າງ​ເຄ່ງ​ຄັດ ​ໃນ​ນະຄອນ Chicago ຂະນະທີ່​ຄາດ​ກັນ​ວ່າ ປະຊາຊົນ​ຫຼາຍ​ພັນ​ຄົນ​ຈະ​ພາກັນທໍາ​ການ​ປະ​ທ້ວງ​ ຢູ່​ຕາມ​ຖະໜົນ​ຫົນທາງ​ໃນ​ວັນ​ອາທິດ​ມື້​ນີ້.

ພວກ​ປະ​ທ້ວງ 3 ຄົນ​ໄດ້​ຖືກ​ຈັບ​ກຸມ​ກ່ອນ​ກອງ​ປະ​ຊຸມ​ສຸດ​ຍອດ​ຂອງກຸ່ມ​ເນ​ໂຕ້​ໄຂ​ຂຶ້ນ ​ແລະ​ຖືກ​ກ່າວ​ຫາໃນ​ຖານ​ກໍ່​ການ​ຮ້າຍ ຍ້ອນ​ມີວັດຖຸ​ລະ​ເບີດ​ຢູ່​ໃນ​ຄວາມ​ຄອບ​ຄອງ.

ການປະທ້ວງຕໍ່ຕ້ານກອງປະຊຸມຂອງກຸ່ມເນໂຕ້ ຢູ່ຊິຄາໂກ:

XS
SM
MD
LG