ລິ້ງ ສຳຫລັບເຂົ້າຫາ

ອົງການ NASA ຄົ້ນພົບ ຫຼັກຖານ ທີ່ສຳຄັນວ່າ ມີນ້ຳ ຢູ່ເທິງ ດາວອັງຄານ


ເສັ້ນລາຍສີເຂັ້ມ ແມ່ນເສັ້ນ ສາຍແຮ່ຍາວ 100 ແມັດນີ້ ຂອງເຈີ້ຍພູທີ່ເກີດຂຶ້ນຊ້ຳຫຼາຍເທື່ອ ໄຫຼລົງສາຍພູຢູ່ເທິງ ດາວອັງຄານ ສັນນິຖານວ່າເຄີຍເກີດຂຶ້ນໂດຍສະແສນ້ຳ ໃນເວລາດຽວກັນ.

ບັນດາ​ນັກວິທະຍາ​ສາດ​ຂອງ​ອົງການອະວະກາດສະຫະລັດຫຼື NASA ​ໄດ້​ຄົ້ນ​ພົບ​ຫຼັກ​ຖານ​ທີ່​ສຳຄັນ ​ກ່ຽວ​ກັບ​ກະ​ແສ​ນ້ຳ​ເຄັມ ຢູ່​ເທິງດາວ​ອັງຄານ, ຢ່າງ​ໜ້ອຍ​ໃນ​ລະຫວ່າງ​ລະ​ດູຮ້ອນ​ຂອງ​ດາວ​ເຄາະ​ສີ​ແດງ​ໜ່ວຍ​ນີ້, ​ເຊິ່ງອົງການ​ອາ​ວະ​ກາດ ສະຫະລັດ ​ໄດ້​ປະກາດ​ໃນ​ວັນ​ຈັນ​ວານ​ນີ້.

​ກະແສ​ຂອງ “ສານ​ປະກອບ​ດ້ວຍ​ນ້ຳ” ​ເຊິ່ງ​ເປັນ​ທາດ​ເກືອ​ແຮ່​ໄດ້​ຖືກ​ຄົ້ນ​ພົບ ແມ່ນຈະ​ຕ້ອງ​ມີນ້ຳສຳລັບ​ການ​ສ້າງ​ກະ​ແສ​ນ້ຳ​ເຄັມ​ດັ່ງກ່າວ ​ແລະ ສຳລັບ​ບ່ອນ​ທີ່​ມີ​ນ້ຳ, ບ່ອນ​ນັ້ນກໍ​ອາດ​ຈະ​ມີ​ສິ່ງ​ທີ່​ມີ​ຊີວິດ, ​ເຖິງ​ແມ່ນ​ວ່າ​ຈະ​ເປັນ​ໃນ​ຮູບ​ແບບ​ຂອງ​ຈຸລິນ​ຊີກໍຕາມ.

ທ່ານ Jim Green ອຳນວຍການ​ດ້ານ​ວິ​ທະ​ຍາ​ສາດ​ກ່ຽວ​ກັບ​ດາວ​ເຄາະ ທີ່​ສຳ​ນັກ​ງານໃຫຍ່​ອົງ​ການ​ NASA ​ໄດ້​ກ່າວ​ໃນ​ລະຫວ່າງ​ກອງປະຊຸມ​ຖະ​ແຫຼ​ງຂ່າວ​ເປີດ​ເຜີຍ​ກ່ຽວ​ກັບ​ການ​ຄົ້ນ​ພົບ​ວ່າ “ມື້​ນີ້​ພວກ​ເຮົາ​ໄດ້​ມີ​ການ​ປ່ຽນ​ແປງ​ຂະໜານໃຫຍ່​ໃນ​ຄວາມ​ເຂົ້າ​ໃຈ​ຂອງ​ພວກ​ເຮົາ​ກ່ຽວ​ກັບ​ດາວ​ເຄາະ​ໜ່ວຍ​ນີ້.”

ຖ້າມກາງ​ການ​ຄາດ​ຄະ​ເນ​ກ່ອນ​ການ​ປະກາດວ, ທ່ານ Doug McCuistion ອະ​ດີດ​ຫົວໜ້າ ໂຄງການ​ດາວ​ອັງຄານຂອງ NASA ​ໄດ້​ກ່າວ​ຕໍ່​ໜັງສືພິມ Boston Herald ວ່າ “ຖ້າ​ພວກ​ເຂົາ​ເຈົ້າ​ປະກາດ​ວ່າ ພວກ​ເຂົາ​ເຈົ້າ​ໄດ້​ຄົ້ນ​ພົບ​ທີ່​ສາມາດເຂົ້າເຖິງໄດ້ຢ່າງງ່າຍ​ດາຍ, ການ​ຫຼັ່ງໄຫຼ​ຂອງ​ຂອງແຫຼ​ວ​ເຊັ່ນ​ນ້ຳ​ຢູ່​ໃຕ້​ພື້ນ​ດິນ, ເຊິ່ງ​ແມ່ນ​ໜຶ່ງ​ໃນ​ທິດ​ສະ​ດີ​ທີ່​ພວກ​ເຮົາ​ເຄີ​ຍ​ໄດ້ຍິນ​ມາ​ຫຼາຍ ​ແລະ ຫຼາ​ຍປີແລ້ວ, ການ​ຄົ້ນ​ພົບນັ້ນ​ມີ​ການ​ກ່ຽວ​ພັນ​ຢ່າງ​ໃຫຍ່​ຫຼວງ​ສຳລັບ​ຄວາມ​ເປັນ​ໄປ​ໄດ້​ຂອງ​ສິ່ງ​ທີ່​ມີ​ຊີວິດຢູ່​ເທິງ​ດາວ ເຄາະນັ້ນ ​ແລະ ຄວາມ​ຍືຍຍົງຂອງ​ມະນຸດ.”

ອົງການ NASA ​ເຄີຍ​ຄົ້ນ​ພົບ​ຫຼັກ​ຖານທີ່​ເປັນ​ນ້ຳ​ຢູ່​ເທິງ​ດາວອັງຄານ ​ໃນ​ເມື່ອ​ກ່ອນ. ​ໃນ​ເດືອນ​ມີນາປີກາຍ, NASA ​ໄດ້​ກ່າວ​ວ່າ ຄັ້ງ​ໜຶ່ງ​ນ້ຳ​ຢູ່​ເທິງ​ດາວ​ອັງຄານ ​ແມ່ນ​ມີ​ຫຼາຍ​ກວ່າ ນ້ຳ​ໃນ​ມະຫາ​ສະໝຸດ ອາກຕິກ ຂອງ​ໂລກ​ເຮົາ.

ບັນ​ດາ​ນັກ​ຄົ້ນຄວ້າ​ຂອງອົງການ NASA ​ໄດ້​ຂຽນ​ລົງໃນ​ວາລະສານ​ວິທະຍາ​ສາດ​ວ່າ ພວກ​ເຂົາ​ເຈົ້າ​ປຽບ​ທຽບ​ ອັດຕາ​ສ່ວນ​ຂອງ​ນ້ຳ​ສອງ​ຊະນິດ​ທີ່​ໄດ້​ຖືກ​ຄົ້ນ​ພົບ ​ໃນ​ບັນຍາກາດ​ຂອງ​ດາວ​ອັງຄານ ກັບ​ອັດຕາ​ສ່ວນ​ຂອງນ້ຳ ​ທີ່​ໄດ້​ຖືກ​ກັກ​ຂັງ​ໃນ​ຫີນ​ດາວ​ຕົກ​ຂອງ​ດາວ​ອັງຄານ ຢ້ອນກັບ​ຄືນ​ເມື່ອ 4.5 ຕື້​ປີ​ກ່ອນ.

ພວກ​ເຂົາ​ເຈົ້າ​ກ່າວ​ວ່າ​ຫຼາຍ​ກວ່າ 4 ຕື້​ປີ​ທີ່​ຜ່ານ​ມາ, ດາວ​ອັງ​ຄານ​ແມ່ນ​ໄດ້​ຖືກ​ປົກ​ຄຸມ​ໂດຍ​ນ້ຳ​ເລິກ 137 ແມັດ ​ແລະ ວ່າ​ນ້ຳ​ເກືອບ​ທັງໝົດ​ ຕັ້ງ​ແຕ່​ນັ້ນ​ມາ ​ໄດ້​ລະ​ເຫີ​ຍເປັນ​ອາຍ​ຂຶ້ນສູ່​ອາ​ວະ​ກາດ​.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG