ລິ້ງ ສຳຫລັບເຂົ້າຫາ

ສື່ຂອງລັດມຽນມາ ຖິ້ມໂທດ ໃສ່ພວກນັກສຶກສາ ວ່າເປັນຕົ້ນເຫດ ຂອງຄວາມຮຸນແຮງ


ສື່​ຂອງ​ລັດພາກັນ​ຖິ້ມ​ໂທດໃສ່​ພວກ​ນັກ​ສຶກສາ ວ່າ​ເປັນ​ຕົ້ນ​ເຫດ​
ຂອງ​ຄວາມ​ຮຸນ​ແຮງ ທີ່​ໄດ້​ລະ​ເບີດ​ຂຶ້ນ​ເມື່ອ​ວັນ​ອັງຄານ​ວານ​ນີ້
​ເວລາ​ຕຳຫຼວດ​ເຂົ້າ​ໄປ​ຂັບ​ໄລ່​ພວກ​ນັກ​ສຶກສາ​ກຸ່ມ​ໜຶ່ງໃຫ້​ສະ
ຫຼາຍຕົວ ຊຶ່ງ​ພວກ​ເຂົາ​ເຈົ້າ​ພາກັນ​ເດີນ​ຂະ​ບວນ ​ຮຽກຮ້ອງ​ໃຫ້
​ລັດຖະບານ​ລົບ​ລ້າງ​ກົດໝາຍປະຕິ​ຮູບການ​ສຶກສາ​ນັ້ນ.

ພວກ​ເຈົ້າ​ໜ້າ​ທີ່​ຕຳຫຼວດ​ທຳ​ການໂຈມ​ຕີ​ພວກ​ນັກ​ສຶກສາ​ ຢູ່​
ເມືອງ Letpadan ທາງ​ພາກ​ກາງຂອງ​ປະ​ເທດ ຫຼັງ​ຈາກ​ພວກ
​ນັກ​ສຶກສາພະຍາຍາມ​ທີ່ຈະ​ບຸກຜ່ານ​ເຄື່ອງ​ກີ​ດກັນ​ຂອງ​ຕຳຫຼວດ​.
ຮູບ​ແລະ​ພາບ​ວີ​ດີ​ໂອ​ສະ​ແດງ​ໃຫ້​ເຫັນ ຕຳຫຼວດແລ່ນໄລ່​ພວກ​
ປະ​ທ້ວງ ​ທັງ​ເຕະຖີບ​ແລະ​ທຸບ​ຕີ ​ກ່ອນ​ຈະ​ຈັບ​ພວກ​ເຂົາ​ເຈົ້າ
ໂຍນເຂົ້າ​ໄປ​ໃນ​ລົດ​ບັນທຸກ.

ໜັງສືພິມ​ລາຍ​ວັນ Golobal New Light of Myanmar ຂອງລັດຖະບານ ກ່າວ​ຊີ້​ແນະ
ໃນ​ວັນ​ພຸດ​ມື້​ນີ້​ວ່າ ​ເປັນຄວາມ​ຜິດ​ຂອງ​ພວກ​ປະ​ທ້ວງ​ທີ່​ພະຍາຍາມ​ຈະ​ຜ່າອອກ​ມາ​ຈາກ​ວົງ​ລ້ອມຂອງຕຳຫຼວດ ຊຶ່ງ​ພາ​ໃຫ້​ເກີດ​ຄວາມ​ຮຸນ​ແຮງ​ຂຶ້ນ.

ມີພວກນັກສຶກສາ​ຫຼາຍ​ກວ່າ 120 ຄົນຖືກ​ຈັບ​ກຸມ ​ແລະ​ຫຼາຍ​ຄົນ​ໄດ້​ຮັບ​ບາດ​ເຈັບ​ໃນ​ການ​ປະ​ທະ​ກັນ ຊຶ່ງ​ໄດ້​ກໍ່ໃຫ້​ເກີດ​ຄວາມ​ເປັນ​ຫ່ວງ​ຄັ້ງ​ໃໝ່ວ່າ​ການ​ປະຕິ​ຮູບ​ໄປ​ສູ່​ລະບອບ​ປະຊາ
ທິປະ​ໄຕ​ໃນ​ຫວ່າງໄວໆຜ່ານມາກຳລັງ ຖືກ​ຕ່າວ​ປີ້ນຢູ່ໃນ​ປະ​ເທດ​ໃນ​ເອເຊຍ​ຕາ​ເວັນ​ອອກ
ສຽງໃຕ້ ​ແຫ່ງ​ນີ້.

ພັກ​ສັນນິບາດ​ແຫ່ງ​ຊາດ​ເພື່ອ​ປະຊາທິປະ​ໄຕ ຝ່າຍ​ຄ້ານ​ທີ່​ນຳພາ​ໂດ​ຍ ທ່ານນາງ ອ່ອງຊານ ຊູ​ຈີ ​ໄດ້​ປະນາມ​ການ​ກະທຳ​ຂອງ​ຕຳຫຼວດວ່າ ຜິດ​ກົດ​ໝາຍ​ ແລະ​ຮຽກຮ້ອງ​ໃຫ້​ມີ​ການ​ສ້າງ​ຕັ້ງ​ຄະນະ​ກຳມະການ​ສອບ​ສວນ​ຂຶ້ນ.

​ໃນ​ການ​ຖະ​ແຫຼ​ງຂ່າວປະຈຳ​ວັນ​ທີ່​ນະຄອນຫຼວງ​ວໍ​ຊິງ​ຕັນນັ້ນ ທ່ານ​ນາງ Jen Psaki ​ໂຄ
ສົກ​ກະຊວງ​ການ​ຕ່າງປະ​ເທດ​ສະຫະລັດ ​ໄດ້​ປະນາມ​ການ​ໃຊ້​ກຳລັງ​ ​ຕໍ່​ພວກ​ນັກ​ສຶກສາ​.

ທ່ານ​ນາງ Psaki ກ່າວ​ໃນ​ວັນ​ອັງຄານ​ວານ​ນີ້​ວ່າ “ພວກ​ເຮົາ​ຂໍ​ຮຽກຮ້ອງ ໃຫ້ລັດຖະ
ບານ​ມຽນມາ ​ເຄົາລົບ​ນັບຖື​ສິດທິ​ຂອງ​ພວກ​ປະ​ທ້ວງໃນ​ການ ໂຮມ​ຊຸມນຸມ​ກັນ​ຢ່າງ​ສັນຕິ ​ໃນ​ຖານະ​ເປັນ​ຊ່ອງ​ທາງ​ນຶ່ງ​ຂອງ​ການສະ ແດງ​ອອກເຖິງຄວາມ​ຄິດເຫັນ​ຂອງ​ເຂົາ​ເຈົ້າ”
​ແລະ​ກ່າວ​ຕໍ່​ໄປ​ວ່າ “​ເສລີ​ພາບ​ໃນ​ການ​ໂຮມ​ຊຸມ​ຊຸມ ​ເປັນ​ສ່ວນ​ປະກອບ​ທີ່​ສຳຄັນ​ອັນ​ນຶ່ງ​ຂອງທຸກໆ​ສັງຄົມປະຊາທິປະໄຕໃດ.”

ສະຫະພາບ​ຢູ​ໂຣບ ​ກໍໄດ້ຮຽກຮ້ອງ​ໃຫ້​ມີ​ການ​ສືບສວນ​ສອບ​ສວນ​ຢ່າງ​ເປັນ​ທາງ​ການ ​ແລະ​ກ່າວ​ຕື່ມ​ວ່າ ຕົນ​ມີ “ຄວາມ​ເປັນ​ຫ່ວງ​ຢ່າງ​ເລິກ​ເຊິ່ງ” ​ນຳ​ເຫດການ​ດັ່ງກ່າວ.

ກຸ່ມ​ປົກ​ປ້ອງ​ສິດທິ​ມະນຸດ Human Rights Watch ກໍ​ໄດ້​ຮຽກຮ້ອງ​ເຊັ່ນ​ກັນ​ ໃຫ້​ມຽນມາ​ຢຸດ​ການ​ປາບ​ປາມ​ ການ​ປະ​ທ້ວງ​ຂອງ​ພວກ​ນັກ​ສຶກສາ​ ​ແລະ “​ໃຫ້​ທຳ​ການ​ສືບສວນ​ສອບ​ສວນ​ພວກ​ເຈົ້າ​ໜ້າທີ່​ຕຳຫຼວດ​ທີ່​ຮັບຜິດຊອບ​ໃນການ​ໃຊ້​ກຳລັງ​ເກີນ​ຂອບ​ເຂດ ຕໍ່​ພວກ​ປະ​ທ້ວງ​ນັ້ນ.”

XS
SM
MD
LG