ລິ້ງ ສຳຫລັບເຂົ້າຫາ

ຂໍມອບເພງ ບຸນຄຸນຂອງແມ່ ຂອງ ວຽງຄຳ ໄຊຍະຈັກ ເພື່ອສະຫຼອງວັນແມ່


ພາບວາດໂດຍ ສົມປຣະເສີດ ຈຸນລະມະນີ ທີ່ສະແດງອອກ
ເຖິງການເອົາໃຈໃສ່ ທີ່ແມ່ມີຕໍ່ລູກ.

ພາບວາດໂດຍ ສົມປຣະເສີດ ຈຸນລະມະນີ ທີ່ສະແດງອອກ ເຖິງການເອົາໃຈໃສ່ ທີ່ແມ່ມີຕໍ່ລູກ.

ສະບາຍດີ​ທ່ານ​ຜູ້ຟັງ​ທີ່​ເຄົາຣົບ​ແລະ​ຍິນ​ດີ​ຕ້ອນຮັບ​ທ່ານ​ຜູ້​ຟັງ​ເຂົ້າ​ສູ່ລາຍການ​ສຽງ​ເພງ​ຈາກ​ແດນ​ໄກຂອງ VOA ຄ່ຳ​ຄືນ​ນີ້ພິ​ເສດ​ແດ່​ ​ເພາະວ່າເປັນວັນ​ແມ່ ​ໃນ​ສະຫະລັດ​ ຊຶ່ງ​ກົງກັບ​ວັນ​ອາທິດ​ ທີ 2 ຂອງ​ເດືອນ​ພຶດສ​ະພາຂອງ​ທຸກ​ປີ ເພາະສະ​ນັ້ນ ວັນນະ​ສອນ ​ຈຶ່ງ​ຂໍ​ນໍາ​ສະ​ເໜີ​ເພງເພື່ອ​ສະດຸດ​ດີ​ໃຫ້​ແກ່​ບັນດາ​ແມ່ ທຸກ​ຜູ້​ທຸກຄົນ​ໃນ​ສາກົນ​ລະ​ໂລກ​ນີ້ ຊຶ່ງ​ຂໍ​ເລີ້ມ​ຕົ້ນ​ດ້ວຍ​ເພງ ບຸນຄຸນ​ຂອງ​ແມ່ ຊຶ່ງ​ເປັນ​ບົດ​ປະພັນ​ຂອງທ່ານ ລະດົມ ຕະວິນ​ຍານ ​ແລະຂັບ​ຮ້ອງ​ໂດຍ ວຽງ​ຄຳ ​ໄຊຍະ​ຈັກ ​ສິນລະປິນສາວຈາກ ອອສ​ເຕຣ​ເລ​ຍ ຊຶ່ງ​ເພງ​ນີ້ ຄົງ​ສົ່ງ​ຄວາມ​ໝາຍ​ທີ່​ດີ​ແທນ​ຄຳ​ຂອບຄຸນ ຈາກ​ພວກ​ລູກໆ ​ຂໍ​ເຊີນ​ໄປ​ຟັງ​ພ້ອມໆ​ກັນ…

ເພງ ​ແມ່ຄື​ແຮງ​ໃຈ ​ທີ່ວັນນະ​ສອນ ຫາ​ພົບ​ໃນ youtube ຊຶ່ງ​ວັນນະ​ສອນ​ ຄຶດ​ແລະ​ຕຶກ​ຕອງ​ແລ້ວ​ວ່າ ​ເພງ​ນີ້​ດີ​ແລະ​ມີ​ຄວາມ​ໝາຍ​ດີ ອີກຢ່າງ​ກໍ​ເປັນ​ການ​ສະໜັບ​ສະໜຸນ ສິນລະປິນ​ໜ້າ​ໃໝ່ ພໍວັນນະ​ສອນ​ໄດ້​ຮັບ​ຟັງ​ເພງ​ນີ້ ຈຶ່ງ​ຄຶດ​ວ່າ ຄວນ​ຈະ​ມີ​ການ​ນຳ​ເພງ​ນີ້ມາແບ່ງປັນ​ໃຫ້​ທ່ານ​ຜູ້​ຟັງ ​ໄດ້ຮັບ​ຟັງ​ກັນ ຂໍ​ສັນລະ​ເສີນ​ແລະ​ຂໍ​ໃຫ້​ສືບ​ຕໍ່ສ່າ​ງຜົນງານ​ດີ​ໆ ຕໍ່​ໄປ.​ວັນນະ​ສອນ ວ່າ ຈະ​ຮ້ອງ​ເພງ​ນັບ​ຮ້ອຍ ນັບ​ພັນ ກໍຈະ​ບໍ່​ສາມາດ​ທົດ​ແທນ​ບຸນຄຸນ​ຂອງແມ່​ໄດ້ ຊຶ່ງ​ເພິ່ນ​ໄດ້​ອົດທົນ​ອູ້ມ​ລູກ​ຢູ່​ໃນ​ທ້ອງ​ເຖິງ 9 ​ເດືອນ​ຈົນ​ຄອດ​ອອກ​ມາ ​ທັງ​ຍັງ​ພະຍາຍາມລ້ຽງດູ ​ພວກ​ລູກໆ​ຈົນ​ໃຫ້​ເຕີບ​ໃຫຍ່​ ​ເພື່ອ​ໃຫ້ເປັນ​ຄົນ​ທີ່​ມີ​ຄວາມ​ຮູ້ ຄວາມ​ສາມາດ ​ເປັນ​ຄົນ​ດີ​ແລະ​ມີ​ຄຸນ ຄ່າ​ຂອງ​ຄອບຄົວ​ແລະ​ສັງຄົມ…​ວັນນະ​ສອນ ​ຄິດ​ວ່າສິ່ງ​ທີ່​ພວກ​ລູກໆ​ສາມາດ​ກະທໍາ​ໄດ້​ໃນ​ຕອນ​ນີ້ ກໍ​ຄືຕອນ​ທີ່ທ່ານ​ຍັງ​ມີ​ຊີວິດ​ຢູ່​ນັ້ນ ​ເພາະ​ວັນນະ​ສອນ​ ບໍ່​ໄດ້​ມີໂອກາດ​ນັ້ນ ອີກ​ຕໍ່ໄປ​ແລ້ວ ເພາະສະ​ນັ້ນ​ສິ່ງ​ທີ່​ດີ​ທີ່​ສຸດກໍ​ຄື​ເຮັດທຸກ​ສິ່ງ​ຢ່າງ​ເພື່ອ​ທົດ​ແທນ​ບຸນຄຸນ​ແມ່​ ​ໃຫ້​ສົມ​ກັບ​ທີ່​ເພິ່ນ​ໄດ້​ຖະໜອມ​ລ້ຽງ​ດູ​ເຮົາ​ມາ​ ແລະ​ກໍ​ຢ່າ​ລືມ​ບອກ​ແມ່​ວ່າ… “ຮັກ, ຍັງຮັກ,ແລະ​ຈະ​ຮັກ ​ແມ່​ຕະຫຼອດ​ໄປ.” ຂໍ​ມອບ​ເພງ ແມ່ຄື​ແຮງ​ໃຈ ທີ່ຂັບຮ້ອງໂດຍ Manly Mlex ຂໍເຊີນໄປຟັງ ພ້ອມໆ ກັນເລີຍ.


ເພງ​ສຸດ​ທ້າຍ​ - ຈົດໝາຍ​ຈາກ​ແມ່ ເປັນ​ເພງ​ນຶ່ງ​ທີ່ວັນນະ​ສອນ ປະ​ທັບ​ໃຈ​ເປັນ​ທີ່​ສຸດ
ເພາະ​ເປັນ​ເພງ​ທີ່​ໄດ້​ບັນ​ລະ​ຍາຍ​ເຖິງ​ຄວາມ​ຮູ້ສຶກ​ຂອງ​ແມ່​ທີ່ ມີ​ຕໍ່​ລູກໆ...ວັນນະ​ສອນ ຂໍ​ສົ່ງ​
ເພງ​ນີ້​ເປັນ​ກຳລັງ​ໃຈ​ໃຫ້​ພວກ​ລູກໆທີ່​ຕັ້ງໜ້າ​ຕັ້ງ​ຕາ​ຮຽນ ຫຼື​ແມ້ນ​ແຕ່​ໄປ​ເຮັດ​ວຽກ​ເຮັດ​ການ​
ຢູ່​ໃນ​ຕ່າງ​ແດນ ​ເພາະວ່າ​ເພງ​ນີ້ ຈະ​ໄດ້​ຍ້ຳ​ເຕື່ອນ​ໃຫ້ ພວກລູກໆໄດ້ຕະນັກເຖິງຄວາມ
ພາກພຽນພະຍາຍາມ ເອົາໃຈໃສ່ ສົ່ງເສຍພວກລູກໆໃຫ້ໄດ້ຮຽນສູງໆ ເຖີງແມ່ຈະບໍ່ໄດ້
ຮຽນສູງ ແຕ່ກໍພະຍາຍາມຕັ້ງໃຈຂຽນຈົດໝາຍເຖິງລູກ ເທົ່າທີ່ໄດ້ຮ່ຳຮຽນມາ ພຽງ​ເພື່ອ​ຈະ​ໄດ້​ຖາມ​ໄຖ່ ສະບາຍດີ​ລູກ​ຮັກ. ຂໍຂອບໃຈບົດ​ເພງ​ນີ້…ຕ້ອງ​ຂໍອະ​ໄພ​ຫຼາຍໆ​ທີ່​ບໍ່​ໄດ້​ຊາບ​ຊື່ຂອງ​ສິນລະປິນ​ແລະ​ນັກ​ປະພັນ​ເພງ​ນີ້ ຜູ້​ໃດ​ຮູ້​ວ່າ​ແມ່ນ​ໃຜ​ເປັນ​ຄົນ​ຮ້ອງ​ເພງ​ນີ້ ກໍ​ກະລຸນາ ຂຽນ​ເຂົ້າ​ມາບ​ອກກັນ​ແດ່ ​ເຈົ້າ. ພົບ​ກັນໃຫມ່​ໃນ​ສັບປະດາ​ຫນ້າ...Happy Mother’s Day.

ສະແດງຄວາມເຫັນໃຫ້ເບິ່ງ

XS
SM
MD
LG