ຂະບວນລົດຊ່ອຍເຫຼືອອີກຮອບນຶ່ງ ໄດ້ລຳລຽງເຄື່ອງໄປຍັງ 3 ເມືອງ
ຂອງຊີເຣຍ ທີ່ຖືກປິດລ້ອມ ໃນວັນພະຫັດມື້ນີ້ ຫຼັງຈາກໄດ້ມີີການ
ຈັດສົ່ງເຂົ້າປາອາຫານ ແລະຢຸກຢາທີ່ມີຄວາມຈຳເປັນ ຮອບທຳອິດ
ໄປໃຫ້ ໃນຕົ້ນສັບປະດານີ້.
ອົງການສະພາກາແດງນາໆຊາດ ຮ່ວມກັນກັບອົງການສະຫະ
ປະຊາຊາດ ແລະສະພາກາແດງແຫ່ງຊີເຣຍ ໄດ້ກ່າວວ່າ ພວກລົດ
ບັນທຸກທັງຫຼາຍ ແມ່ນລຳລຽງສຳພາລະໄປຍັງເມືອງ Madaya,
Foua ແລະ Kefraya. ຂະບວນລົດຊ່ອຍເຫຼືອ ໄດ້ໄປຮອດເມືອງ
ທັງ 3 ດັ່ງກ່າວ ໃນແລງວັນຈັນຜ່ານມານີ້.
ພວກຕໍ່ຕ້ານປະທານາທິບໍດີຊີເຣຍ ທ່ານ Bashar al-Assad ຄວບຄຸມເມືອງ Madaya ຊຶ່ງມີປະຊາກອນປະມານ 42 ພັນຄົນ ທີ່ຕັ້ງຢູ່ໃກ້ໆກັບເຂດຊາຍແດນ Lebanone ຊຶ່ງກອງກຳລັງລັດຖະບານໄດ້ປິດລ້ອມມາເປັນເວລາຫຼາຍເດືອນແລ້ວນັ້ນ. ຂະນະດຽວກັນພວກຕໍ່ຕ້ານລັດຖະບານ ກຳລັງປິດລ້ອມເມືອງ Foua ແລະ Kefraya.
ອົງການສະຫະປະຊາຊາດ ແລະອົງການອື່ນໆ ກ່າວວ່າ ພວກຜູ້ຄົນໃນເມືອງ Madaya
ໄດ້ລົ້ມຕາຍຍ້ອນຄວາມອຶດຫີວ ຊຶ່ງທາງເອກອັກຄະລັດຖະທູດຊີເຣຍປະຈຳອົງການສະຫະປະຊາຊາດໄດ້ປະຕິເສດ. ຫົວໜ້າອົງການມະນຸດສະທຳສະຫະປະຊາຊາດທ່ານ Stephen
O’Brien ໄດ້ກ່າວໃນວັນຈັນຜ່ານມານີ້ວ່າ ມີປະມານ 400 ຄົນ ກຳລັງປະເຊີນກັບການລົ້ມຕາຍ ນອກເສຍຈາກວ່າ ພວກເຂົາເຈົ້າໄດ້ຖືກຍົກຍ້າຍອອກໄປເພື່ອຮັບການປິ່ນປົວ ຮັກສາພະຍາບານ ແລະໂຄສົກຂອງອົງການສະພາກາແດງນາໆຊາດ ໄດ້ເອີ້ນສະຖານະການນີ້ວ່າ ເປັນທີ່ “ເສົ້າສະຫລົດໃຈ.”
ອົງການສະຫະປະຊາຊາດ ກ່າວວ່າ ຊາວຊີເຣຍຈຳນວນ 13 ລ້ານ 5 ແສນຄົນ ຕ້ອງການ
ຄວາມຊ່ອຍເຫຼືອທາງດ້ານມະນຸດສະທຳ ແລະຕົນກຳລັງຊອກຫາເງິນຈຳນວນ 7 ພັນ 730 ລ້ານໂດລ່າ ໃນງົບປະມານໃໝ່ປີ 2016 ເພື່ອທີ່ຈະຊ່ອຍເຫຼືອພວກອົບພະຍົບທີ່ພາກັນຫລົບໜີອອກຈາກຊິເຣຍນັ້ນ ມີຈຳນວນຫຼວງຫຼາຍພາກັນຫລົບໜີໄປຍັງບັນດາປະເທດເພື່ອນບ້ານ ແລະກໍຍັງມີພວກອົບພະຍົບຫລົບໄພພາຍໃນປະເທດນຳ.
