ລິ້ງ ສຳຫລັບເຂົ້າຫາ

15 ຄົນ ເສຍຊີວິດ ຍ້ອນການສູ້ລົບ ຢູ່ພາກໃຕ້ ຟີລິບປິນ


ແຜນທີ່ ຟີລິບປິນ
ບັນດາ​ເຈົ້າ​ໜ້າ​ທີ່ຟິລິບ​ປີນ ກ່າວ​ວ່າ ຢ່າງໜ້ອຍ 15 ຄົນ​ໄດ້
ເສຍ​ຊີວິດ ​ໃນ​ຂະນະ ​ທີ່​ມີ​ການ​ສູ້​ລົບ​ກັນ ​ລະຫວ່າງທະຫານ
ລັດ​ຖະບານ ​ແລະ​ກຸ່ມ​ຫົວ​ຮຸນ​ແຮງ​ອິສລາມ ຢູ່ເຂດພາກໃຕ້ ທີ່ສອກຫລີກຫ່າງໄກຂອງປະເທດ.

ການ​ສູ້​ລົບກັນ ​ໄດ້​ເລີ​ມຂຶ້ນໃນ​ວັນ​ອັງຄານ ​ແລະ​ໄດ້​ດຳ​ເນີນ
​ຢູ່ຕໍ່ມາຈົນເຖິງ​ຕອນ​ເຊົ້າ​ວັນ​ພຸດ​ມື້​ນີ້ທີ່​ເມືອງ Patikul ໃນ
​ແຂວງ Sulu ຊຶ່ງເປັນເກາະດອນອັນເປັນ ທີ່​ໝັ້ນ​ຂອງກຸ່ມ
​ຫົວ​ຮຸນ​ແຮງ Abu Sayyaf.

ທະຫານ ​ກ່າວ​ວ່າ ການ​ສູ້​ລົບກັນ​ໄດ້​ລະເບີດຂຶ້ນ​ ເວລານັກ​
ລົບຂອງກຸ່ມ Abu Sayyaf​ໄດ້​ພະຍາຍາມ​ຈະ​ຍຶດ​ເອົາ​ຄ້າຍແຫ່ງນຶ່ງ ​ທີ່​ຕັ້ງ​ຢູ່​ໃນ​ປ່າຂອງ
ຕົນຄືນ ຊຶ່ງໄດ້ຖືກທະຫານລັດຖະບານເຂົ້າຍຶດເອົາໃນ​ວັນ​ຈັນ​ທີ່​ຜ່ານ​ມານີ້.

ບັນດາ​ເຈົ້າ​ໜ້າ​ທີ່ກ່າວ​ວ່າ ການບຸກໂຈມຕີ​ຂອງ​ກຸ່ມ​ອິສລາມຫົວຮຸນແຮງໄດ້ຖືກຕີໂຕ້ໃຫ້ ລ່າຖອຍໄປ ​ເຖິງ​ແມ່ນ​ວ່າ​ ມີີທະຫານຢ່າງໜ້ອຍຄົນນຶ່ງໄດ້​ເສຍ​ຊີວິດໃນການ​ປະ​ທະກັນ
ຄັ້ງນີ້.

ເປັນ​ທີ່​ເຊື່ອ​ກັນວ່າ ກຸ່ມ​ຫົວ​ຮຸນ​ແຮງ​ອິສລາມດັ່ງກ່າວ ເປັນເຄືອຂ່າຍກັບ​ພວກ​ນັກ​ລົບ
al-Qaida ​ແລະ​ໄດ້ມີການຖິ້ມໂທດໃສ່ວ່າ ເປັນຜູ້ຮັບຜິດຊອບໃນ​ການໂຈມ​ຕີທີ່ມີມາ
ເປັນລຳດັບ​ ​ແລະ​ລັກພາ​ໂຕ ​ຢູ່​ໃນຟີ​ລິບ​ປີນ.

ພວກໂຕປະກັນບາງ​ຄັ້ງນັ້ນ ໄດ້ຖືກ​ເກັບ​ຮັກສາ​ໄວ້​ຢູ່​ຄ້າຍກາງ​ປ່າ ດັ່ງ​ຄ້າຍທີ່​ຖືກ​ພວກ
ທະຫານຍຶດ​ເອົາ​ໃນ​ວັນ​ຈັນ​ທີ່​ຜ່ານ​ມາ. ແຕ່ແນວໃດກໍຕາມບໍ່​ມີ​ລາຍ​ງານ​ວ່າໄດ້ພົບເຫັນ ​ໂຕປະກັນເລີຍຢູ່ໃນຄ້າຍດັ່ງກ່າວ.

Abu Sayyaf ແມ່ນ​ຮວມໃນບັນດາກຸ່ມ​ອິສລາມນ້ອຍໆ ໃນພາກ​ໃຕ້​ຂອງຟິລິບ​ປິນ ​ທີ່
ໄດ້ຄັດຄ້ານຕໍ່ຂໍ້ຕົກລົງ​ສັນຕິພາບ ລະຫວ່າງລັດຖະບານຟີລິບປິນ ​ແລະ ກຸ່ມ​ແນວໂຮມ
ປົດປ່ອຍສາສະໜາອິສລາມ​ໂມ​ໂຣ.
XS
SM
MD
LG