ລິ້ງ ສຳຫລັບເຂົ້າຫາ

ຮັງກາຣີ ອະນຸຍາດໃຫ້ ອົບພະຍົບ ເຂົ້າໄປສະຖານີລົດໄຟ ແຕ່ບໍ່ໃຫ້ເດີນທາງ ໄປຢູໂຣບຕາເວັນຕົກ


ພວກອົບພະຍົບ ທີ່ຫວັງວ່າຢາກຈະເດີນທາງ ໄປຍັງພາກຕາ
ເວັນຕົກ ໄດ້ພາກັນອັ່ງອໍເຕັມສະຖານີລົດໄຟທີ່ນະຄອນຫຼວງ
Budapest ຫຼັງຈາກຕຳຫຼວດໄດ້ເປີດສະຖານີລົດໄຟດັ່ງກ່າວ
ຄືນອີກ ແຕ່ເຈົ້າໜ້າທີ່ຮັງກາຣີກ່າວວ່າ ຈະບໍ່ມີລົດໄຟແລ່ນໄປ
ຢູໂຣບຕາເວັນຕົກ.

ຕຳຫຼວດໄດ້ອອກໜີໄປຈາກສະຖານີລົດໄຟ Keleti ໃນວັນພະ
ຫັດມື້ນີ້ຫຼັງຈາກໄດ້ປະເຊີນໜ້າເປັນເວລາ 2 ມື້ກັບພວກອົບພະ
ຍົບ ທີ່ຫວັງວ່າຈະໄດ້ພາກັນຂຶ້ນ ລົດໄຟໄປເຢຍຣະມັນ ບ່ອນທີ່ ພວກເຂົາເຈົ້າວາງແຜນໄວ້ວ່າຈະຂໍລີ້ໄພຢູ່ທີ່ນັ້ນ.

ແຕ່ໃນຂະນະທີ່ພວກອົບພະຍົບໄດ້ຮັບອະນຸຍາດໃຫ້ເຂົ້າໄປໃນສະຖານີລົດໄຟໄດ້ນັ້ນ ຍັງ
ບໍ່ທັນເປັນທີ່ຈະແຈ້ງວ່າ ພວກເຂົາເຈົ້າຈະເດີນທາງໄປໃສແທ້ ໂດຍປາສະຈາກທາງເລືອກ
ໃນການເດີນທາງໄປຢູໂຣບຕາເວັນຕົກ.

ເຈົ້າໜ້າທີ່ຮັງກາຣີໄດ້ອະນຸຍາດໃຫ້ຜູ້ຄົນເດີນທາງໄປຢູໂຣບຕາເວັນຕົກໄດ້ຈາກສະຖານີ
ລົດໄຟ Keleti ໂດຍບໍ່ຕ້ອງມີວີຊ່າ ຂອງສະຫະພາບຢູໂຣບ ໃນມື້ວັນຈັນແລ້ວ ຫລັງຈາກ
ເຢຍຣະມັນປະກາດວ່າ ຕົນຈະຮັບເອົາຄຳຮ້ອງ ຂອງພວກອົບພະຍົບ ແຕ່ໃນວັນອັງຄານ ເຈົ້າໜ້າທີ່ຮັງກາຣີ ໄດ້ເລີ້ມໃນທັນທີທັນໃດ ບໍ່ໃຫ້ຜູ້ຄົນເດີນທາງໄດ້ໂດຍປາສະຈາກວີຊ່າ.

ນາຍົກລັດຖະມົນຕີຮັງກາຣີ ທ່ານ Viktor Orban ກ່າວໃນວັນພະຫັດມື້ນີ້ວ່າ ບັນຫາອົບ ພະຍົບຢູ່ເຂດຊາຍແດນຂອງຮັງກາຣີບໍ່ແມ່ນບັນຫາຂອງຢູໂຣບແຕ່ແມ່ນບັນຫາຂອງເຢຍ
ຣະມັນ.

ທ່ານ Orban ກ່າວທີ່ນະຄອນ Brussels ຫຼັງຈາກພົບປະກັບປະທານສະພາຢູໂຣບທ່ານ Matin Schulz. ທ່ານ Orban ເວົ້າວ່າ ພວກອົບພະຍົບຕ້ອງໄດ້ຜ່ານປະເທດຂອງທ່ານ ແລະປະເທດອື່ນໆອີກກ່ອນຈະໄປຮອດເຢຍຣະມັນ. ທ່ານກ່າວວ່າ ຮັງກາຣີໄດ້ເຮັດທຸກສິ່ງ
ທຸກຢ່າງເທົ່າທີ່ເປັນໄປໄດ້ເພື່ອປະຕິບັດຕາມກົດລະບຽບຂອງຢູໂຣບ ຮວມທັງຈົດທະບຽນ
ພວກອົບພະຍົບກ່ອນທີ່ຈະອະນຸຍາດໃຫ້ພວກເຂົາເດີນທາງໄປຢູໂຣບຕາເວັນຕົກ.

ແຕ່ປະທານສະພາຢູໂຣບ ທ່ານ Schulz ບໍ່ເຫັນພ້ອມນຳ ໂດຍກ່າວວ່າ ບັນຫານີ້ ບໍ່ແມ່ນ
ຂອງເຢຍຣະມັນແຕ່ພຽງຜູ້ດຽວແຕ່ເປັນຂອງຢູໂຣບທັງໝົດ. ທ່ານເວົ້າວ່າ ການແຈກຢາຍ ຂອງອົບພະຍົບ 500,000 ຄົນໃນໝູ່ປະຊາກອນ ທີ່ມີທັງໝົດ 507 ລ້ານຄົນນັ້ນ ບໍ່ແມ່ນ
ບັນຫາເລີຍ ແຕ່ການໃຫ້ພວກອົບພະຍົບພັກພາອາໄສຢູ່ ແຕ່ໃນບໍ່ເທົ່າໃດປະເທດສະມາ ຊິກນັ້ນ ຈະເປັນບັນຫາ. ທ່ານກ່າວວ່າ ຄວາມເປັນພະລາດອນພາບຂອງຢູໂຣບແມ່ນກະ ແຈສຳຄັນໃນການແກ້ໄຂບັນຫານີ້.

ສະຫະພາບຢູໂຣບພວມສູ້ຊົນໃນການຮັບມືກັບວິກິດການອົບພະຍົບທີ່ຮ້າຍແຮງສຸດ ນັບ
ແຕ່ສົງຄາມໂລກຄັ້ງທີສອງເປັນຕົ້ນມາ. ອົບພະຍົບຫລາຍໆລ້ານຄົນໄດ້ເດີນທາງໄປເຖິງ
ຊາຍແດນຂອງຢູໂຣບ ໃນຮອບປີທີ່ຜ່ານມາ ໂດຍພາກັນຫລົບໜີ ບັນຫາຂັດແຍ້ງ ແລະ
ຄວາມທຸກຍາກຢູ່ໃນປະເທດຊີເຣຍ ແລະເຂດອື່ນໆ ຂອງພາກຕາເວັນອອກກາງ ເອເຊຍ
ແລະອາຟຣິກາ.

ສະຫະພາບຢູໂຣບ ຊຶ່ງມີສະມາຊິກ 28 ປະເທດ ມີແຜນການທີ່ຈະເປີດການເຈລະຈາສຸກ
ເສີນ ໃນວັນທີ 14 ກັນຍານີ້ ກ່ຽວກັບບັນຫາດັ່ງກ່າວ.

XS
SM
MD
LG