ລິ້ງ ສຳຫລັບເຂົ້າຫາ

ຄວາມເຄັ່ງຕຶງ ກ່ຽວກັບອົບພະຍົບ ເພີ້ມຂຶ້ນ ຢູ່​ Bulgaria ແລະ Greece


ຍາມອັດປະຕູ ສູນຕ້ອນຮັບອົບພະຍົບ Harmanli ຂະນະທີ່ ມີການສົ່ງທະຫານ Bulgaria ໄປຍັງສູນດັ່ງກ່າວ. (25 ພະຈິກ 2016)​

ຍາມອັດປະຕູ ສູນຕ້ອນຮັບອົບພະຍົບ Harmanli ຂະນະທີ່ ມີການສົ່ງທະຫານ Bulgaria ໄປຍັງສູນດັ່ງກ່າວ. (25 ພະຈິກ 2016)​

ພວກ​ອົບ​ພະຍົບປະມານ 300 ຄົນ ຖືກ​ຈັບ ຫລັງ​ຈາກ​ໄດ້​ເກີດ​ການ​ຈະລາຈົນ​ທີ່​ສູນ​ອົບ​ພະ ຍົບ​ທີ່​ໃຫຍ່​ທີ່​ສຸດ​ໃນ​ Bulgaria ​ໃນ​ຂະນະ​ທີ່​ກຣີສ​ ຮຽກຮ້ອງໃຫ້​ບັນດາ​ປະ​ເທດສະມາ​ຊິກ ຂອງ​ສະຫະພາບ​ຢູ​ໂຣບເລັ່ງລັດ​ໃນ​ການ​ຕັ້ງຖິ່ນ​ຖານ​ໃໝ່​ພວກອົບພະຍົບ ຫລັງ​ຈາກ​ເຫດ​ຮ້າຍ​ທີ່​ໜ້າສະຫລົດ​ໃຈ​ເຮັດໃຫ້​ອົບ​ພະຍົບ 2 ຄົນ ເສຍຊີວິດຢູ່ສູນ​ອົບ​ພະຍົບ Lesbos ທີ່​ ມີຜູ້​ຄົນ​ອາ​ໄສ​ຢູ່​ຫຼາຍ​ເກີນ​ໄປ​ນັ້ນ.

ນາຍົກລັດຖະມົນຕີ Bulgaria ທ່ານ Boyko Borisov ກ່າວ​ຕໍ່​ວິທະຍຸ BRN ​ໃນ​ວັນ​ສຸກ​ວານ​ນີ້ວ່າ ມີ​ອົບ​ພະຍົບປະມານ 300 ຄົນຊຶ່ງ 6 ຄົນ​ໃນ​ຈຳນວນ​ດັ່ງ ກ່າວ​ພິຈາລະນາ​ວ່າ​ເປັນ​ໄພ​ຂົ່ມຂູ່​ ຕໍ່​ຄວາມ​ໝັ້ນຄົງ​ແຫ່ງ​ຊາດໄດ້​ຖືກ​ຈັບ​. ທ່ານ Borisov ​ໄດ້​ຖະ​ແຫຼງຕໍ່​ພວກ​ນັກ​ຂ່າວລຸນ​ຫລັງ​ທີ່​ໄດ້​ໄປ​ຢ້ຽມ​ສູນ​ອົບ​ພະຍົບ​ແຫ່ງນີ້.

ສຸນອົບພະຍົບ Harmanli ໃນປະເທດ Bulgaria

ສຸນອົບພະຍົບ Harmanli ໃນປະເທດ Bulgaria

ເຈົ້າໜ້າ​ທີ່ Bulgaria ກ່າວ​ວ່າ ມີ​ອົບ​ພະຍົບປະມານ 1,500 ຫາ 2,000 ຄົນພົວພັນ​ກັບ​ການ​ປະ​ທະ​ກັນໃນ​ວັນ​ພະຫັດ​ທີ່​ຜ່ານ​ມານີ້ ຢູ່​ທີ່​ສູນ​ຮັບຮອງ​ພວກ​ອົບ​ພະຍົບ Harmanli ​ໃກ້ໆ​ຊາຍ​ແດນ​ເທີ​ກີ.

ຝູງ​ຊົນຊຶ່ງ​ຕົ້ນຕໍ​ແລ້ວແມ່ນ​ປະກອບ​ດ້ວຍ​ພວກ​ອົບ​ພະຍົບທີ່​ມາ​ຈາກ​ອັຟກາ​ນິສຖານມີ​ການ​ກ່າວ​ຫາ​ວ່າ​ ໄດ້​ພາກັນ​ຈູດ​ຢາງ​ຕີນລົດ ​ແລະ​ກໍແກວ່ງ​ກ້ອນ​ຫີນ ​ເຂົ້າ​ໃສ່​ຕຳຫຼວດ​ແລ​ະພວກ​ດັບ​ໄຟ​ຫລາຍ​ກວ່າ 200 ຄົນ ເພື່ອ​ປະ​ທ້ວງ ​ກົດ​ລະບຽບ​ໃໝ່ ​ທີ່​ຫ້າມ​ບໍ່​ໃຫ້​ອົບ​ພະຍົບອອກ​ຈາກ​ສູນລຸນຫຼັງ​ທີ່​ມີ​ການ​ກ່າວ​ຫາ​ວ່າ ​ໄດ້​ເກີດ​ພະຍາດ ຕິດ​ຕໍ່​ຢູ່​ທີ່​ນັ້ນ.

ມີ​ຕຳຫຼວດ​ເກືອບ 30 ຄົນ​ແລະ​ອົບ​ພະຍົບປະມານ 20 ກວ່າ​ຄົນ​ໄດ້​ຮັບ​ບາດ​ເຈັບ​ໃນ​ຄວາມ​ວຸ້ນວາຍ​ດັ່ງກ່າວ ອີງ​ຕາມ​ລາຍ​ງານ​ຂອງ​ອົງການ​ຂ່າວ AFP.

ຄວາມ​ເຄັ່ງ​ຕຶງ​ໄດ້ເພີ້ມທະວີ​ຂຶ້ນຢູ່​ໃນ​ເຂດ​ດັ່ງກ່າວ ຊຶ່ງ​ປະຊາຊົນ​ໃນ​ເຂດ​ທ້ອງ​ຖິ່ນຮຽກຮ້ອງ​ໃຫ້​ປິດ​ສູນ​ອົບ​ພະຍົບ​ແຫ່ງ​ນີ້.

ພວກ​ອົບ​ພະຍົບທີ່​ພາກັນ​ຫລົບໜີ​ຄວາມ​ຮຸນແຮງ​ຈາກ​ພາກ​ຕາ​ເວັນ​ອອກ​ກາງ​ໄດ້​ເດີນທາງ​ໄປ​ເຖິງ Bulgaria ທີ່​ຕັ້ງຢູ່​ໃນ​ແຫຼມ Balkan ທັງໆ​ທີ່ Bulgaria ​ໄດ້ ສ້າງ​ຮົ້ວ​ເລາະ​ຕາມ​ຊາຍ​ແດນ​ເທີ​ກີທ່າມກາງ​ທີ່​ໄດ້​ເກີດ​ວິ​ກິດ​ການ​ອົບ​ພະຍົບທີ່​ຮ້າຍແຮງ​ສຸດ​ຂຶ້ນ​ໃນ​ຢູ​ໂຣບນັບ​ແຕ່​ປີ 1945 ​ເປັນຕົ້ນມາ.

ມີ​ອົບ​ພະຍົບປະມານ 13,000 ຄົນ ສ່ວນ​ໃຫຍ່​ແມ່ນ​ມາ​ຈາກ​ອັຟກາ​ນິສຖານກຳລັງ​ຢູ່​ທີ່​ປະ​ເທດ Bulgaria ​ໃນ​ເວລາ​ນີ້ ອີງ​ຕາມ​ສະຖິຕິ​ຂອງ​ທາງ​ການ.

ສ່ວນ​ຢູ່​ທີ່​ປະ​ເທດ​ກຣີສ ນາຍົກລັດຖະມົນຕີ Alexis Tsipras ກ່າວ​ວ່າ ທ່ານ​ໄດ້​ມີ​ຄວາມ​ຕື່ນ​ຕົກ​ໃຈດັ່ງ​ດຽວ​ກັນ​ກັບ​ໃນ​ທົ່ວ​ປະ​ເທດ​ກຣີສຫຼັງ​ຈາກ​ທີ່ໄດ້​ເກີດ​ໄຟ​ໄໝ້ຕູບຜ້າ​ເຕັ້ນທີ່​ສູນ Moria ​ໃນ​ເກາະ Lesbos.

ອ່ານຂ່າວນີ້ຕື່ມເປັນພາສາອັງກິດ

ສະແດງຄວາມເຫັນໃຫ້ເບິ່ງ

XS
SM
MD
LG