ລິ້ງ ສຳຫລັບເຂົ້າຫາ

ວັນສຸກ, ໒໙ ມີນາ ໒໐໒໔

ເມັກຊິໂກປ່ອນບັດ ເລືອກຕັ້ງເອົາ ປະທານາທິບໍດີຄົນໃໝ່ ໃນວັນອາທິດມື້ນີ້ (ວີດີໂອ)


ທ່ານ Enrique Pena Nieto ຜູ້ສະໝັກເລືອກຕັ້ງຈາກພັກ PRI ໃນມື້ສຸດທ້າຍຂອງການໂຄສະນາຫາສຽງເລືອກຕັ້ງ ປະທານາທິບໍດີເມັກຊິໂກ, ວັນທີ 27 ມິຖຸນາ 2012.
ທ່ານ Enrique Pena Nieto ຜູ້ສະໝັກເລືອກຕັ້ງຈາກພັກ PRI ໃນມື້ສຸດທ້າຍຂອງການໂຄສະນາຫາສຽງເລືອກຕັ້ງ ປະທານາທິບໍດີເມັກຊິໂກ, ວັນທີ 27 ມິຖຸນາ 2012.

ຊາວ​ເມັກ​ຊິ​ໂກ​ຫລາຍ​ລ້ານ​ຄົນພາກັນ​ອອກ​ໄປ​ປ່ອນ​ບັດ​ເລືອກ​ຕັ້ງ​ເອົາ​ປະທານາທິບໍດີ​ຄົນ​ໃໝ່ໃນ​ວັນອາທິດ​ມື້​ນີ້.

ການ​ຢັ່ງ​ຫາງ​ສຽງ​ພົບ​ວ່າ ທ່ານ Enrique Pena Nieto ຜູ້​ສະໝັກ​ເລືອກ​ຕັ້ງ​ສັງກັດ​ພັກປະຕິວັດ​ສະ​ຖາ​ບັນ Institutional Revolutionary Party ຫຼື ພັກ PRI ກໍາລັງ​ມຸ່ງ​ໜ້າ​ໄປ​ສູ່​ການ​ໄດ້ຮັບ​ໄຊຊະນະດ້ວຍ​ຄະ ​ແນນສຽງ​ຖ້ວມລົ້ນ.

ພັກ PRI ​ໄດ້​ປົກຄອງເມັກ​ຊິ​ໂກ​ມາ​ໄດ້ 71 ປີ ຈົນ​ເຖິງ​ປີ 2000 ດ້ວຍ​ການ​ສໍ້​ລັດ​ບັງຫຼວງ ປະ​ປົນ​ກັນ​ກັບ​ການສໍ້​ໂກງ​ການ​ເລືອກ​ຕັ້ງ ​ແລະການ​ກົດ​ຂີ່ປາບ​ປາມ ທີ່ທ່ານ Vargas Lloso ຊາວເປຣູທີ່​ໄດ້​ຮັບ​ລາງວັນ​ໂນ​ແບລ​ ​ເຄີຍ​ເອີ້ນ​ໃນ​ຄັ້ງ​ນຶ່ງວ່າ ​ເປັນ​ລະບອບ​ຜະ​ເດັດ​ການທີ່​ສົມບູນ​ແບບ. ພັກ PRI ໄດ້​ຟື້ນ​ຕົວ​ຫວນ​ຄືນມາອີກ ດ້ວຍ​ການ​ຊ່ວຍ​ເຫລືອ​ຂອງສະພາວະ​ເສດຖະກິດ​ທີ່ບໍ່​ໄປ​ບໍ່​ມາ​ທາງ​ໃດ ບວກ​ກັບຄື້ນຟອງ​ແຫ່ງຄວາມວຸ້ນວາຍ ​ຂາດ​ຂື່​ຂາດ​ແປ ທີ່​ໄດ້​ຄຸກ​ຄາມ​ເມັກຊິ​ໂກ ພາຍ​ໃຕ້​ການບໍລິຫານ​ປະ​ເທດ​ຂອງ​ພັກກິດ​ແຫ່ງ​ຊາດ National Action Party ຫຼືພັກ PAN ນັ້ນ.

ຜູ້​ສະ​ໜັກ​ເລືອກ​ຕັ້ງ​ທີ່​ມີ​ຄະ​ແນນ​ອັນ​ດັບ​ສອງ ຈາກ​ຜົນ​ການ​ຢັ່ງ​ສຽງ​ຄວາມ​ຄິດ​ເຫັນ​ນັ້ນ ​ໄດ້​ແກ່​ທ່ານ Andres Manuel Lopez Obrador ພັກ​ ຊ້າຍ​ຈັດ ຜູ້​ທີ່​ປາ​ໄຊ​ໃນ​ການ​ເລືອກ​ຕັ້ງ​ຄັ້ງ​ປີ 2006 ດ້ວຍຄະ​ແນນ​ພຽງເຄິ່ງ​ແຕ້ມ ​ໃຫ້​ແກ່ປະທານາທິບໍດີ Felipe Calderon ​ແລະອ້າງ​ວ່າ​ ມີ​ການສໍ້​ໂກງ​ການ​ເລືອກ​ຕັ້ງ​ກັນ ​ອັນເປັນ​ເຫດ​ໃຫ້​ມີ​ການ​ປະ​ທ້ວງ​ຄັ້ງ​ໃຫຍ່ຫຼາຍບັ້ນ​ໃນ​ເມືອງຫຼວງ​ ເປັນ​ເວລາຫຼາຍອາ​ທິດ.

ຊາວເມັກຊິໂກປ່ອນບັດເອົາປະທານາທິບໍດີຄົນໃໝ່ ທ່າມກາງຄວາມຮຸນແຮງ
ຈາກການຄ້າຢາເສບຕິດ:

ອັນ​ດັບ​ທີ່​ສາມຕາມ​ມາ ​ແມ່ນທ່ານ​ນາງ Josefina Vazquez Mota ຜູ້​ສະໝັກ​ເລືອກ​ຕັ້ງ​ຈາກ​ພັກ PAN ຜູ້​ທີ່ຫວັງ​ວ່າ​ຈະ​ໄດ້ເປັນ​ປະທານາທິບໍດີ ຍິງຄົນ​ທໍາ​ອິດ​ຂອງເມັກຊິ​ໂກ​ນັ້ນ.

ຜູ້​ສະ​ໝັກທັງ​ສາມ​ຄົນ ​ໄດ້​ເຊັນ​ຂໍ້​ຕົກລົງເມື່ອ​ພະຫັດ​ຜ່ານ​ມາ ຮັບປາກ​ວ່າ​ຈະ​ຍອມຮັບ​ເອົາ​ຜົນ​ການ​ເລືອກ​ຕັ້ງ​ປະທານາທິບໍດີ ​ໃນ​ວັນ​ອາທິດ​ມື້​ນີ້. ຂໍ້ຕົກ ລົງດັ່ງກ່າວ ຍັງ​ໄດ້​ຮຽກຮ້ອງ​ໃຫ້ຊາວເມັກ​ຊິ​ໂກ​ທັງຫຼາຍ ຈົ່ງ​ເຄົາລົບ​ນັບຖື​ຜົນ​ການ​ເລືອກ​ຕັ້ງ​ເຊ່ນ​ກັນ​ກ ​ເຖິງ​ແມ່ນ​ຈະ​ມີຄວາມ​ບໍ່​ເຫັນ​ພ້ອມ​ກັນ​ຕ່າງໆ​ດ້ານ​ການ​ເມືອງ​ນັ້ນ​ກໍ​ຕາມ.

ບ່ອນ​ປ່ອນ​ບັດ​ເລືອກຈະ​ຕັ້ງ​ໄຂ​ຂຶ້ນ​ເວລາ 8 ​ໂມງ​ເຊົ້າຕາມ​ເວລາ​ທ້ອງ​ຖິ່ນ ​ຄື​ອີກ​ປະມານ​ເຄິ່ງຊົ່ວ​ໂມງ​ຂ້າງ​ໜ້າ​ນີ້ ແລະຜົນ​ການ​ຢັ່ງ​ສຽງ​ພວກ​ປ່ອນ​ບັດ​ອອກ​ມາ​ຊຸດ​ທໍາ​ອິດ​ ຄາດ​ວ່າ​ຈະຮູ້​ກັນ ​ໃນ​ອີກ 12 ຊົ່ວ​ໂມງ​ຕໍ່​ມາ.

XS
SM
MD
LG