ລິ້ງ ສຳຫລັບເຂົ້າຫາ

ລົດ​ສຳ​ຫຼວດ Curiosity ຂອງ​ອົງການ​ນາຊາ ​ສົ່ງຮູບ​ພາບ​ສີຊຸດ​ທໍາ​ອິດ ​ມາຍັງ​ໂລກ (ວີດີໂອ)

  • ທອງປານ ເທບວົງສາ

ຮູບພາບເທິງຜິວດາວອັງຄານ ທີ່ລົດສໍາຫຼວດຖ່າຍ ສົ່ງມາຍັງໂລກ

ລົດ​ສຳ​ຫຼວດ Curiosity ຂອງ​ອົງການ​ອະວະກາດສະຫະລັດ ​ໄດ້​ສົ່ງຮູບ​ພາບ​ສີຊຸດ​ທໍາ​ອິດ​ມາຍັງ​ໂລກ ຊຶ່ງ​ເປັນ​ຮູບ​ພາບ​ພູມິ​ປະ​ເທດຂອງດາວ​ພະອັງຄານ ທີ່ເປັນ​ພາບ​ສີ​ແດງ​ອົມນໍ້າຕານ ຈາກ​ພື້ນອ່າງ​ດາວ​ອັງຄານ.

ອົງການ​ອະວະກາດ​ສະຫະລັດ ຫຼື ນາ​ຊາ ​ເວົ້າ​ເມື່ອ​ວັນ​ອັງຄານ​ວານ​ນີ້​ວ່າ ຮູບ​ພາບ​ທີ່​ສົ່ງ​ມາ​ນັ້ນ ຈະ​ເຫັນ​ຝາດ້ານ​ເໜືອ ​ແລະ​ຂອບ​ຂອງ​ອ່າງ Gale Crater ​ໃນ​ໄລຍະ​ໄກ. ຮູບ​ພາບ​ເຫຼົ່ານີ້ ​ໄດ້​ຖ່າຍ​ດ້ວຍ​ກ້ອງ​ທີ່​ຕິດ​ຕັ້ງຢູ່​ຮາວ​ສາມາດ​ເຄື່ອນ​ຍ້າຍ​ໄດ້ຂອງ​ລົດ​ສຳ​ຫຼວດ.

ອົງການ​ນາ​ຊາ ​ສາມາດ​ສົ່ງ​ລົດ​ສຳ​ຫຼວດ Curiosity ລົ​ງ​ໃນ​ບໍລິ​ເວນ​ອ່າງ​ເທິງ​ໜ້າດາວ​ພະອັງຄານ​ໄດ້​ເປັນ​ຜົນ​ສໍາ​ເລັດ​ເມື່ອ​ຕອນແລງ​ວັນ​ອາທິດ​ຜ່ານ​ມາ ຫຼັງຈາກ​ໄດ້​ເດີນທາງ​ຜ່ານ​ອະວະກາດ​ໄປ​ຍັງ​ດາວ​ດັ່ງກ່າວ​ເປັນ​ເວລາ 8 ​ເດືອນ. ກ້ອງທີ່​ຕິດ​ຕັ້ງ​ຢູ່​ທ້ອງ​ລົດ ​ໄດ້​ຖ່າຍຮູບ​ໄວ້ຫຼາຍຮ້ອຍ​ຮູບ​ຂະນະ​ລົງ​ຈອດ​ເທິງ​ຜິວ​ດາວພະ​ອັງຄານ ​ແຕ່​ຮູບ​ພາບ​ໃໝ່ນີ້ ​ເປັນ​ຮູບທໍາອິດ​ຈາກ​ລະດັບພື້ນ​ດິນ ຫຼັງຈາກໄດ້​ລົງສູ່​ຜິວ​ດາວພະ​ອັງຄານ​ແລ້ວ​ນັ້ນ.

ຮູບ​ພາບ​ທໍາ​ອິດ​ປະກົດ​ໃຫ້​ເຫັນລາງໆບໍ່​ຊັດ​ເຈນ​ປານ​ໃດ ​ແຕ່​ອົງການ​ນາ​ຊາ​ຫວັງວ່າ ການ​ປະຕິບັດ​ການ​ຂອງລົດ​ສຳ​ຫຼວດ​ Curiosity ເປັນ​ເວລາ​ສອງ​ປີນີ້ ກ້ອງ​ທີ່​ຕິດ​ຕັ້ງ​ຢູ່ເທິງ​ລົດ​ດັ່ງກ່າວ ຈະ​ສາມາດ​ຖ່າຍຮູບໃນ​ຄຸນ​ນະພາ​ບທີ່​ເຫັນ​ຊັດ​ເຈນຫຼາຍຂຶ້ນ.

XS
SM
MD
LG