ຮອງລັດຖະມົນຕີກະຊວງພາຍໃນຂອງ ມາເລເຊຍ ໄດ້ກ່າວວ່າ ລັດຖະບານເຊື່ອວ່າສົບຂອງ 139 ຄົນແມ່ນໄດ້ຖືກຝັງຢູ່ໃນຂຸມຝັງສົບລວມໝູ່ ທີ່ຖືກຄົ້ນພົບຢູ່ໃນສະຖານທີ່ສອກຫລີກຫ່າງໄກຂອງປະເທດທີ່ມີຊາຍແດນຕິດກັບ ໄທ
ທ່ານ Wan Junaidu Tuanku Jaafar ໄດ້ຖະແຫຼງຕໍ່ນັກຂ່າວໃນວັນພະຫັດມື້ນີ້ວ່າ ນັກສືບສວນສອບສວນເຊື່ອວ່າ ໃນແຕ່ລະຂຸມຝັງສົບຈະມີຢູ່ໜຶ່ງສົບ ແທນທີ່ຈະເປັນຫຼາຍສົບ ຕາມທີ່ໄດ້ສົງໄສໃນເບື້ອງຕົ້ນ.
ທ່ານໄດ້ກ່າວວ່າແຕ່ລະສົບ ໄດ້ຖືກສົງໄສວ່າມີສ່ວນພົວພັນກັບການຄ້າມະນຸດ, ເຊິ່ງຖືກຫໍ່ຫຸ້ມດ້ວຍຜ້າ ແລະ ຖືກຝັງຕາມປະເພນີທາງສາສະໜາຂອງ ມຸສລິມ.
ຜູ້ບັນຊາການຕຳຫຼວດແຫ່ງຊາດຂອງ ມາເລເຊຍ ທ່ານ Khalid Abu Bhakar ໄດ້ປະກາດການຄົ້ນພົບສົບຄັ້ງທຳອິດໃນວັນຈັນທີ່ຜ່ານມາ, ໂດຍກ່າວວ່າ ພວກເຂົາໄດ້ພົບເຫັນ 28 ແຫ່ງ ທີ່ສົງໄສເປັນຄ້າຍຂອງ ພວກຄ້າມະນຸດ ທີ່ເບິ່ງຄືວ່າ ຈະເປັນບ່ອນຢູ່ສຳລັບ 20 ຫາ 300 ຄົນໃນແຕ່ລະຄ້າຍນັ້ນ.
ການຄົ້ນພົບບັນດາຄ້າຍ ແລະ ຂຸມຝັງສົບດັ່ງກ່າວ ເຊິ່ງມີຂຶ້ນຫລັງຈາກທີ່ໄດ້ຄົ້ບພົບສະຖານ ທີ່ແຫ່ງນຶ່ງທີ່ຄ້າຍຄືກັນໃນຕົ້ນຂອງເດືອນນີ້ ໃນຟາກຊາຍແດນຂອງ ໄທ.
ເຂດເອເຊຍ ຕາເວັນອອກສຽງໃຕ້ ແມ່ນກຳລັງຕໍ່ສູ້ກັບວິກິດການ ທາງດ້ານມະນຸດສະທຳ ເຊິ່ງມີປະຊາຊົນຫຼາຍພັນຄົນ ຖືກເຄື່ອນຍ້າຍຢ່າງຜິດກົດໝາຍຈາກ ມຽນມາ ແລະ ບັງກລາແດັສ ເຂົ້າສູ່ ມາເລເຊຍ ແລະ ອິນໂດເນເຊຍ ໂດຍຜ່ານທາງ ໄທ.
