ພວກທີ່ເຫັນເຫດການໃນນະຄອນຫລວງ Tripoli ຂອງລີເບຍກ່າວວ່າຕຶກອາຄານ ລັດຖະບານຫລາຍຫລັງ ໄດ້ຖືກຈູດເຜົາໃນຂະນະທີ່ພວກນັກເຄື່ອນໄຫວຝ່າຍຄ້ານຕໍ່ສູ້ກັນກັບພວກກໍາລັງຮັກສາຄວາມປອດໄພແລະພວກສະໜັບສະໜຸນລັດຖະບານໃນການເພີ່ມທະວີຂຶ້ນຢ່າງໄວຂອງການລຸກຮືຂຶ້ນ ຕໍ່ຕ້ານທ່ານ Moammar Gadhafi ຜູ້ນໍາລີເບຍນັ້ນ.
ພວກທີ່ເຫັນເຫດການກ່າວວ່າ ຕຶກອາຄານລັດຖະບານ
ຫລາຍຫລັງໄດ້ລຸກເປັນໄຟຂຶ້ນໃນວັນຈັນມື້ນີ້ ຫລັງຈາກ
ໄດ້ຍິນສຽງປືນດັງຂຶ້ນໃນກຸງຕຣີໂປລີ ເປັນເທື່ອທໍາອິດ
ໃນຕອນແລງວັນອາທິດວານນີ້ ເວລາພວກປະທ້ວງຕໍ່
ຕ້ານລັດຖະບານພະຍາຍາມເຂົ້າຍຶດແລະຄວບຄຸມໃຈ
ກາງນະຄອນຫລວງ ຈາກພວກທີ່ຈົງຮັກພັກດີຕໍ່ທ່ານ
Gadhafi ນັ້ນ. ພວກທີ່ເຫັນເຫດການກ່າວວ່າ ຕໍາ
ຫລວດລີເບຍໄດ້ຍິງແກສນໍ້າຕາເພື່ອພະຍາຍາມຂັບໄລ່ ພວກປະທ້ວງ ໃຫ້ສະຫລາຍໂຕ.
ທ່ານ Saif al-islam ລູກຊາຍ
ຂອງທ່ານ Gadhafi ໄດ້ອອກ
ມາກ່າວຜ່ານທາງໂທລະພາບໃນ
ວັນອາທິດວານນີ້ ປະກາດວ່າ
ບິດາຂອງທ່ານຍັງຄວບຄຸມອໍາ
ນາດຢູ່ໂດຍໄດ້ຮັບການສະໜັບ
ສະໜຸນຈາກພວກທະຫານ ຕໍ່
ໜ້າການລຸກຮືຂຶ້ນຕໍ່ຕ້ານລັດຖະ
ບານທີ່ຮ້າຍແຮງທີ່ສຸດ ນັບແຕ່ບິດາຂອງທ່ານໄດ້ຂຶ້ນກໍາອໍານາດດ້ວຍການກໍ່ລັດຖະປະຫານໃນປີ 1969 ເປັນຕົ້ນມາ.
ທ່ານ Saif al-islam ໃຫ້ຄໍາ
ໜັ້ນສັນຍາວ່າ ລັດຖະບານຈະ
ທໍາການຕໍ່ສູ້ ໄປຈົນຮອດຜູ້ຊາຍ
ຄົນສຸດທ້າຍ ແມ່ຍິງຄົນສຸດທ້າຍ
ແລະລູກກະສູນລູກສຸດທ້າຍເພື່ອ ຈະຄອງອໍານາດຢູ່ຕໍ່ໄປ.
ໃນການຖະແຫລງທີ່ເວົ້າລ່າຍໄປເປັນເວລາດົນນານ ພ້ອມກັບແກ່ວງນິ້ວມືໄປພ້ອມນັ້ນ ທ່ານ Saif al-islam ເຕືອນປະຊາຊົນລີເບຍໃຫ້ຢຸດເຊົາການລຸກຮືຂຶ້ນ ຫລືບໍ່ດັ່ງນັ້ນ ກໍຈະສ່ຽງກັບການກໍ່ສົງຄາມກາງເມືອງຂຶ້ນ ທີ່ຈະເຮັດໃຫ້ປະເທດຈົມຢູ່ໃຕ້ແມ່ນໍ້າເລືອດ ແລະນໍາພາປະເທດຊາດກັບຄືນໄປຢູ່ພາຍໃຕ້ອໍານາດຫົວເມືອງຂຶ້ນ. ທ່ານຢືນຢັດວ່າ ລີເບຍບໍ່ແມ່ນ ອິຈີບ ຫລືຕູນີເຊຍ ສອງປະເທດເພື່ອນບ້ານທີ່ພວກຜູ້ນໍາປະເທດໄດ້ຖືກໂຄ່ນລົ້ມອອກຈາກອໍານາດໄປໃນຫວ່າງບໍ່ເທົ່າໃດສັບປະດາຜ່ານມານີ້.
ທ່ານ Saif al-islam ຖິ້ມໂທດການປະທ້ວງທີ່ເກີດຂຶ້ນໃນພາກຕາເວັນອອກຂອງລີເບຍໃນວັນຈັນຜ່ານມາ ໃສ່ພວກໂຕການຫລາຍກຸ່ມ ທີ່ຮວມທັງພວກຊາວລີເບຍທີ່ອາໄສຢູ່ໃນຕ່າງ ປະເທດ ພວກຫົວນິຍົມອິສລາມ ສື່ມວນຊົນຕ່າງປະເທດ ແລະພວກຕິດຢາເສບຕິດ ແຕ່ ທ່ານຍອມຮັບວ່າ ກໍາລັງຮັກສາຄວາມປອດໄພຂອງລີເບຍກໍໄດ້ທໍາຄວາມຜິດພາດບາງຢ່າງ ໃນການປາບປາມພວກເດີນຂະບວນປະທ້ວງຍ້ອນຂາດການເຝິກແອບ ໃນການຮັບມືກັບສະຖານະການແບບນັ້ນ.
ກຸ່ມປົກປ້ອງສິດທິມະນຸດ Human Rights Watch ທີ່ມີຫ້ອງການຕັ້ງຢູ່ໃນສະຫະລັດ ກ່າວໃນວັນອາທິດວານນີ້ວ່າ ປະຊາຊົນຢ່າງນ້ອຍ 233 ຄົນໄດ້ເສຍຊີວິດໃນການລຸກຮືຂຶ້ນມາເປັນເວລາຫລາຍມື້ໃນລີເບຍ ຊຶ່ງສ່ວນຫລາຍແມ່ນຢູ່ໃນເມືອງ Benghazi ໃນພາກຕາເວັນອອກຂອງປະເທດ ທີ່ເປັນຈຸດໃຈກາງຂອງ ການເລີ້ມຕົ້ນການປະທ້ວງຂຶ້ນທໍາອິດນັ້ນ. ພວກແພດໝໍໃນເມືອງ Benghazi ກ່າວວ່າ ມີຢ່າງນ້ອຍ 50 ຄົນເສຍຊີວິດໃນວັນອາທິດວານນີ້ ເວລາກໍາລັງຮັກສາຄວາມປອດໄພຍິງປືນໃສ່ພວກປະທ້ວງ ແລະພວກແຫ່ຂະບວນ ສົ່ງສະການນັ້ນ.