ລີເບຍບໍ່ໄດ້ໃຫ້ຄວາມສຳຄັນຕໍ່ໝາຍຈັບທີ່ອອກໂດຍສານອາຍານາໆຊາດເພື່ອໃຫ້ຈັບກຸມໂຕກາດດາຟີ ຜູ້ນໍາລີເບຍ ແລະຜູ້ຊ່ອຍວຽກຂັ້ນສູງສຸດ 2 ຄົນຂອງທ່ານກາດດາຟີ ໃນຂໍ້ຫາເປັນອາຊະຍາກອນສົງຄາມທີ່ພົວພັນກັບການປາບປາມຂອງພວກເຂົາເຈົ້າຕໍ່ການລຸກຮືຂຶ້ນຕໍ່ຕ້ານລັດ ຖະບານຂອງພວກຝ່າຍຄ້ານນັ້ນ.
ທ່ານ Mohammad al-Gamudi ລັດຖະມົນຕີຍຸຕິທໍາຂອງລີເບຍກ່າວໃນວັນຈັນວານນີ້ວ່າ ລີເບຍບໍ່ຮັບເອົາຄວາມຖືກຕ້ອງຊອບທຳຕາມກົດໝາຍຂອງສານທີ່ວ່ານີ້.
ສານອາຍາລະຫວ່າງຊາດ ໄດ້ອອກໝາຍຈັບໃນເຊົ້າວັນຈັນວານນີ້ຕໍ່ທ່ານກາດາຟີ ພ້ອມທັງລູກຊາຍຄືທ້າວ Seif al-Islam ແລະທ່ານ Abdullah al-Senussi ຫົວໜ້າອົງການສືບລັບລີເບຍ.
ຄຳຟ້ອງຮ້ອງຫລືກ່າວໂທດຂອງສານນາໆຊາດນັ້ນ ກ່າວຫາທ່ານກາດດາຟີແລະພວກຊ່ອຍວຽກຂອງທ່ານວ່າ ຍັບຍັ້ງພວກປະທ້ວງໂດຍໃຊ້ການຄຸມຂັງ ການທາລຸນນະກໍາ ແລະໃຊ້ກໍາລັງທີ່ຮ້າຍແຮງ ເຊ່ນການອອກຄໍາສັ່ງພວກມືປືນດັກຍິງໃສ່ພວກພົນລະເຮືອນທີ່ກໍາລັງອອກຈາກໂບດດັ່ງນີ້ເປັນຕົ້ນ.
ສຳນວນຟ້ອງຮ້ອງຂອງພວກພິພາກສາສານກ່າວວ່າ ມີພື້ນຖານທີ່ມີເຫດຜົນຫລາຍຢ່າງທີ່ພາໃຫ້ເຊື່ອວ່າ ບຸກຄົນທັງສາມມີຄວາມຮັບຜິດຊອບທາງດ້ານອາຍາສໍາລັບການຄາດຕະກໍາແລະການລົງໂທດຢ່າງຮຸນແຮງຕໍ່ພວກພົນລະເຮືອນຫລາຍຮ້ອຍຄົນໃນລະຫວ່າງການເດີນຂະບວນປະທ້ວງຢ່າງສັນຕິໃນເດືອນກຸມພາຜ່ານມານັ້ນ.
ຫົວໜ້າສະພາປົກຄອງໄລຍະຂ້າມຜ່ານແຫ່ງຊາດຂອງພວກກະບົດລີເບຍສະແດງຄວາມຍິນດີນໍາການເຄື່ອນໄຫວຂອງສານລະຫວ່າງຊາດແລະເຕືອນວ່າ ຜູ້ໃດກໍຕາມທີ່ພະຍາຍາມເອົາໂຕທ່ານກາດດາຟີໄປເຊື່ອງໄວ້ ກໍຈະປະເຊີນກັບການດໍາເນີນຄະດີໃນສານເຊ່ນກັນ.
ທີ່ກຸງວໍຊິງຕັນ ທ່ານ Jay Carney ໂຄສົກປະຈໍາທໍານຽບຂາວ ກ່າວວ່າ ໝາຍຈັບທີ່ວ່ານີ້ເປັນສິ່ງສະແດງໃຫ້ເຫັນອີກອັນນຶ່ງທີ່ວ່າທ່ານກາດດາຟີໄດ້ສູນເສຍຄວາມຖືກຕ້ອງຊອບທໍາຕາມກົດໝາຍຂອງທ່ານແລ້ວ ແລະກ່າວວ່າ ຜູ້ນໍາລີເບຍຈະຕ້ອງເປັນຜູ້ຮັບຜິດຊອບ.
ອັງກິດ ຝຣັ່ງແລະອີຕາລີ ຕ່າງກໍໄດ້ສະແດງຄໍາຍ້ອງຍໍໃນການອອກໝາຍຈັບນີ້.
