ປະທານາທິບໍດີສະຫະລັດ ທ່ານ ບາຣັກ ໂອບາມາ ຈະ
ຕ້ອນຮັບບັນດາ ຜູ້ນຳ ເກືອບຮອດ 50 ຄົນ ຈາກອາຟຣິກາ
ສູ່ວໍຊິງຕັນ ໃນວັນຈັນຈະມາເຖິງນີ້ ໃນການໂຮມຊຸມນຸມ ທີ່
ທ່ານກ່າວວ່າ “ບໍ່ເຄີຍມີມາກ່ອນ.”
ປະທານາທິບໍດີ ໂອບາມາ ໄດ້ຖະແຫລງຕໍ່ບັນດານັກຂ່າວ
ໃນວັນສຸກ ວານນີ້ວ່າ ສະຫະລັດຕ້ອງເຂົ້າໄປພົວພັນຕື່ມອີກ
ກັບອາຟຣິກາ ແລະ ວ່າ ກອງປະຊຸມສຸດຍອດຄັ້ງນີ້ ແມ່ນ
ເປັນໂອກາດ ເພື່ອຍົກບັນຫາຕ່າງໆ ທາງດ້ານເສດຖະກິດ
ແລະຄວາມໝັ້ນຄົງ ຢູ່ໃນທະວີບນັ້ນ ມາປຶກສາຫາລື.
ການແຜ່ລະບາດຂອງເຊື້ອໄວຣັສ ອີໂບລາ ໃນອາຟຣິກາຕາເວັນຕົກ ແມ່ນຫົວຂໍ້ນຶ່ງທີ່ຈະ
ມີ ໃນການໂອ້ລົມກັນໃນຄັ້ງນີ້. ທ່ານໂອບາມາໄດ້ກ່າວວ່າບັນດາຜູ້ນຳອາຟຣິກາ ຈາກ
ປະເທດທີ່ມີຄວາມສ່ຽງນັ້ນ ຈະຕ້ອງໄດ້ຜ່ານການກວດຫາ ເຊື້ອພະຍາດດັ່ງກ່າວ ກ່ອນ
ເຂົ້າມາໃນສະຫະລັດ.
ຜູ້ນຳຂອງປະເທດ ຊີແອຣາ ລີອອນ ແລະໄລບີເຣຍ ໄດ້ງົດການເດີນທາງມາຮ່ວມ
ກອງປະຊຸມສຸດຍອດ ທີ່ວໍຊິງຕັນ ເພື່ອຮັບມືກັບການແຜ່ລະ ບາດຂອງໂຣກອີໂບລາ
ອັນຮ້າຍແຮງເຖິງແກ່ຊີວິດ ໃນປະເທດຂອງພວກຕົນ.
ບັນດາເຈົ້າໜ້າທີ່ສະຫະລັດ ກ່າວວ່າ ບັນດາປະເທດທັງຫຼາຍ ທີ່ໄດ້ຖືກເຊື້ອເຊີນ ໃຫ້
ສົ່ງຄະນະຜູ້ແທນ ມາຮ່ວມກອງປະຊຸມສຸດຍອດ 3 ມື້ນັ້ນ ໂດຍສ່ວນໃຫຍ່ແລ້ວ ແມ່ນມີ
ປະທານາທິບໍດີເປັນຜູ້ນຳພາມາ ແຕ່ບາງຄະນະແມ່ນຈະນຳພາໂດຍ ຮອງປະທານາທິບໍດີ
ຫຼື ເຈົ້າໜ້າທີ່ຂັ້ນສູງອື່ນໆ ຂອງລັດຖະບານ. ພວກເຈົ້າໜ້າທີ່ສະຫະລັດກ່າວວ່າ ມີຜູ້ນຳ
ພຽງ 4 ຄົນ ທີ່ໄດ້ຖືກຍົກເວັ້ນຈາກກອງປະຊຸມຄັ້ງນີ້ ຊຶ່ງມີປະເທດ ຊິມບັບເວ ຊູດານ
ອີຣິຕເທຣຍ ແລະ ສາທາລະນະລັດອາຟຣິກາກາງ.
ທຳນຽບຂາວ ກ່າວວ່າ ບໍ່ມີແຜນການສຳຫລັບການເຈລະຈາສອງຝ່າຍ ລະຫວ່າງ ທ່ານ
ໂອບາມາ ກັບຄູ່ຕຳແໜ່ງຈາກອາຟຣິກາ ແຕ່ກ່າວວ່າ ປະທານາທິບໍດີສະຫະລັດ ຈະຈັດ
ງານລ້ຽງອາຫານຄ່ຳ ສຳຫລັບບັນດາຜູ້ນຳ ຈາກອາຟຣິກາທັງໝົດ ໃນແລງວັນອັງຄານ
ທີ່ຈະມາເຖິງນີ້.