ລິ້ງ ສຳຫລັບເຂົ້າຫາ

ຄ້າຍ​ ພວກປະທ້ວງ ແຫ່ງສຸດທ້າຍ ໃນຮົງກົງ ຖືກມ້າງແລ້ວ


ຊາຍຄົນນຶ່ງ ຍ່າງກາຍ ຄ້າຍພວກປະທ້ວງ ກ່ອນໜ້າ ຈະຖືກມ້າງອອກໄປ ເຊິ່ງຕັ້ງຢູ່ນອກ ສຳນັກງານໃຫຍ່ ຂອງລັດຖະບານ ໃນຮົງກົງ ປະເທດຈີນ, ວັນທີ 24 ມິຖຸນາ 2015.

ຊາຍຄົນນຶ່ງ ຍ່າງກາຍ ຄ້າຍພວກປະທ້ວງ ກ່ອນໜ້າ ຈະຖືກມ້າງອອກໄປ ເຊິ່ງຕັ້ງຢູ່ນອກ ສຳນັກງານໃຫຍ່ ຂອງລັດຖະບານ ໃນຮົງກົງ ປະເທດຈີນ, ວັນທີ 24 ມິຖຸນາ 2015.

ບັນດາ​ເຈົ້າໜ້າ​ທີ່​ຮົງ​ກົງ​ໄດ້​ມ້າງ​ຄ້າຍ​ຜ້າຕັ້ງແຫ່ງສຸດທ້າຍຂອງ
ການປະ​ທ້ວງ​ຢ່າງໃຫຍ່​ ເມື່ອ​ປີ​ກາຍ​ນີ້ ທີ່​ບໍ່​ປະສົບ​ຜົນສຳ​ເລັດ​
ໃນ​ການ​ກົດ​ດັນ ​ໃຫ້​ປະຕິ​ຮູບ​ ໄປສູ່ປະຊາ​ທິປະ​ໄຕ ຢູ່​ໃນ​ເຂດ
​ປົກຄອງ​ຂອງ​ຈີນ​ແຫ່ງ​ນີ້.

ພວກ​ປະ​ທ້ວງ ​ໄດ້​ຂັດ​ຂວາງ​ແຕ່ພຽງເລັກນ້ອຍ ​ໃນຂະນະ​ທີ່​
ທິມງານ​ຂອງ​ເຈົ້າໜ້າ​ທີ່​ລັດຖະບານ ​ເຄື່ອນ​ໄຫ​ວເຂົ້າ​ໄປ ​ໃນ
​ວັນ​ພຸດ​ມື້​ນີ້ ​ເພື່ອ​ເກັບ​ກູ້​ເອົາ​ພວກຕູບ​ຜ້າຕັ້ງ​ ປ້າຍ​ຄຳ​ຂວັນ ​ແລະ
ສິ່ງ​ຂອງ​ອື່ນ​ໆ ທີ່​ຍັງ​ເຫຼືອຢູ່ໜ້ອຍ​ນຶ່ງ​ ຢູ່ຄ້າຍພວກປະທ້ວງ ​
ນອກອາຄານສະພານິຕິບັນຍັດ ນັ້ນ ອອກ​ໄປ.

ທ່ານ​ Simon Wong ຜູ້ປະ​ທ້ວງ​ໄວ 71 ປີ ​ເວົ້າວ່າ “ຂ້າພະ​ເຈົ້າ ຮູ້ສຶກ​ສະຫງົບ. ຂ້າພະ​ເຈົ້າ ຮູ້ສຶກຄິດ​ຮອດ​ສະຖານ​ທີ່​ແຫ່ງ​ນີ້ ແລ້ວ ​ເພາະວ່າ ​ໃນໄລຍະ 200 ມື້ຜ່ານ​ມານັ້ນ​ ພວກ​ເຮົາ​ໄດ້​ເຫັນ​ປະ​ຫວັດ​ສາດ ​ແລະ ການ​ປ່ຽນ​ແປງ​ຂອງ​ຍຸກ​ສະ​ໄໝ. ຢູ່​ທີ່​ນີ້ ພວກ​ເຮົາໄດ້​ເຫັນຫຼາຍໆ ຄວາມ​ຮູ້ສຶກ ການ​ຮ້ອງໄຫ້ ຢາດ​ເຫື່ອ ແລະ ຄວາມເມດຕາຂອງ​ມວນມະນຸດ ​ແຕ່​ພວກ​ເຮົາ ຍັງ​ໄດ້​ເຫັນ​ຂໍ້​ຂັດ​ແຍ້​ງຫຼາຍ​ເຊັ່ນ​ກັນ.”

​ໃນ​ຈຸດ​ສູງ​ສຸດ​ຂອງ​ການ​ປະ​ທ້ວງ ​ເຊິ່ງ​ໄດ້​ເລີ້ມ​ຕົ້ນຂຶ້ນ​ເມື່ອ​ເດືອນ​ກັນຍາ ປີ​ກາຍ​ນີ້ ພວກ​ປະ​ທ້ວງຫຼາຍໝື່ນ​ຄົນ ພາ​ກັນ​ລົງ​ສູ່ທ້ອງ​ຖະໜົນຂອງ​ຮົງ​ກົງ ​ເພື່ອ​ກົດ​ດັນ​ໃຫ້​ມີ​ການ​ປ່ຽນ​ແປງ ​ໃນ​ວິທີ ທີ່​ເຂດ​ປົກຄອງ​ ທຳ​ການ​ເລືອກ​ເອົາ​ບັນ​ດາ​ຜູ້ນຳ​ຂອງຕົນນັ້ນ.

ຫຼັງຈາກ​ຄວາມ​ພະຍາຍາມ ​ທີ່ຈະທັບ​ມ້າງ ພວກ​ປະ​ທ້ວງ​ໂດຍ​ເຈົ້າໜ້າ​ທີ່​ຕຳຫຼວດ ​ໃຊ້​ແກັສ
ນ້ຳຕາ ​ແລະ ສະ​ເປ​ໝາກ​ເພັດ ​ໄດ້ລົ້ມ​ແຫລວ ບັນດາ​ເຈົ້າໜ້າ​ທີ່ ກໍ​ໄດ້​ອະນຸຍາດ​ໃຫ້​ພວກ
​ປະ​ທ້ວງ​ຢູ່​ຕໍ່​ໄປ ​ແຕ່​ໃນ​ທີ່​ສຸດ ກໍ​ໄດ້​ຖືກ​ທັບ​ມ້າງ ສະຖານ​ທີ່​ຈັດຕັ້ງການ​ປະ​ທ້ວງ ​ໂດຍສ່ວນ​
ໃຫຍ່ ​ໃນ​ເດືອນ​ທັນ​ວາປີ​ກາຍ​ນີ້.

ປັກ​ກິ່ງ​ໄດ້​ປະຕິ​ເສດ ທີ່​ຈະຍິນ​ຍອມ ​ຕໍ່​ຂໍ້​ຮຽກຮ້ອງ​ຂອງ​ພວກ​ປະ​ທ້ວງ ທີ່ຢາກ​ໃຫ້​ມີ​ການ​ປ່ອນ​ບັດເລືອກ​ເອົາ​ຜູ້​ບໍລິຫານ​ຮົງ​ກົງ ​ໃນ​ປີ 2017 ເປັນ​ແບບປະຊາທິປະ​ໄຕ​ຢ່າງ​ຄົບ​ຖ້ວນ. ແຕ່ແທນ​ທີ່ ປັກ​ກິ່ງ​ໄດ້​ຮັບຮອງ​ຮ່າງກົດໝາຍ ທີ່​ຢືນ​ຢັດ​ວ່າ ບັນດາ​ຜູ້​ສະໝັກ​ທັງ​ໝົດ ຕ້ອງ​ໄດ້​ຮັບ​ການ ກວດ​ສອບ​ໂດຍ ຄະນະ​ກຳມະການ ທີ່​ປະກອບ​ດ້ວຍ​ຜູ້ທີ່​ພັກດີ​ຕໍ່ ຈີນແຜ່ນດິນ​ໃຫຍ່.

ສະພາ​ນິຕິບັນຍັດຂອງ​ຮົງ​ກົງ ​ເມື່ອ​ອາທິດ​ແລ້ວ​ນີ້ ​ໄດ້​ຍັບ​ຍັ້ງ ມາດ​ຕະການດັ່ງກ່າວ ຍ້ອນ
​ ສະມາຊິກ​ຝ່າຍ​ຄ້ານ ຜູ້ທີ່​ມອງ​ເຫັນ​ວ່າ ການ​ປະຕິ​ຮູບນັ້ນ ​ເປັນ​ແຜນ​ການຂອງ “ປະຊາ​ທິ
ປະ​ໄຕ ແບບຈ​ອມປອມ.”
​ ໃນ​ຂະນະ​ນີ້ ຜູູ້ນຳ​ຂອງ​ດິນ​ແດນ​ດັ່ງກ່າວ​ນີ້ ຈະ​ສືບ​ຕໍ່ ຖືກ​ເລືອກ
​ເອົາ ໂດຍສະມາຊິກ ຄະນະ​ກຳມະການ ​ຈຳນວນ 1200 ຄົນ ຕໍ່​ໄປ.

XS
SM
MD
LG