ລິ້ງ ສຳຫລັບເຂົ້າຫາ

ລາວຖືກຈັດຢູ່ອັນດັບທີ 140 ໃນ 177 ປະເທດ ທີ່ມີການສໍ້ລາດບັງຫຼວງ ໜ້ອຍທີ່ສຸດໃນໂລກ

  • ຊົງຣິດ ໂພນເງິນ

ດັດຊະນີການສໍ້ລາດບັງຫຼວງ ຂອງໂລກ

ລາວ​ຖືກ​ຈັດ​ໃຫ້​ຢູ່​ໃນ​ອັນ​ດັບ​ທີ 140 ຈາກ 177 ປະ​ເທດ​ ໃນ​ທົ່ວ​
ໂລກທີ່​ມີ​ກາ​ນສໍ້​ລາດບັງ​ຫຼວງ​ໃນປີ 2013 ​ໂດຍ​ຖື​ເປັນ​ສະຖານະ​
ທີ່​ດີ​ຂຶ້ນ​ເຖິງ​ 20 ອັນ​ດັບ ​ເມື່ອ​ທຽບ​ກັບ​ປີ 2012 ທີ່ ຜ່ານ​ມາ.


ອົງການ​ເພື່ອ​ຄວາມ​ໂປ່​ງ​ໃສ​ສາກົນ ຫຼື Transparency Inter-
national ທີ່​ໄດ້​ທໍາ​ການ​ສໍາ​ຫຼວດຄວາມ​ຄິດ​ຄວາມ​ເຫັນ​ ຂອງ​ບັນ
ດາ​ນັກທຸລະກິດ​ ກ່ຽວ​ກັບ​ສະພາບ​ຂອງ​ການ​ສໍ້​ລາດ​ບັງຫຼວງ​ຢູ່​ໃນ
177 ປະ​ເທດທົ່ວ​ໂລກ​ນັ້ນ ​ໄດ້​ຈັດ​ໃຫ້​ລາວ​ຢູ່​ໃນ​ອັນ​ດັບ​ທີ 140 ​ໃນ​ປີ 2013 ນີ້ ​ໂດຍ​ໄດ້​ຮັບ​ຄວາມ​ໄວ້​ວາງໃຈ​ຈາກ​ບັນດາ​ນັກທຸລະກິດ​ຊາວ​ຕ່າງ​ຊາດ​ທີ່​ລົງທຶນ​ໃນ​ລາວໃນລະດັບ 26​ ຄະ​ແນນ ຈາກ 100 ຄະ​ແນນ​ເຕັມ. ບັນຊີດັ່ງກ່າວນີ້ ແມ່ນລຽງລໍາດັບ ຈາກປະເທດທີ່ມີ ການສໍ້ລາດບັງຫຼວງໜ້ອຍທີ່ສຸດ ຫາຫຼາຍທີ່ສຸດ.

​ໂດຍ​ຈາກ​ຄະ​ແນນ​ດັ່ງ​ກ່າວນີ້ ​ເຖິງ​ແມ່ນວ່າ ຈະ​ຖື​ເປັນ​ລະດັບ​ຄວາມ​ໄວ້​ວາງ​ໃຈ​ທີ່​ຕໍ່າ​ຫຼາຍ​
ກໍ​ຕາມ ຫາກ​ແຕ່​ກໍ​ນັບ​ເປັນ​ລະດັບ​ທີ່​ດີຂື້ນກ​ວ່າ​ປີ 2012 ທີ່​ຜ່ານ​ມາ​ຢ່າງ​ເຫັນ​ໄດ້​ຊັດ​ເຈນ ​ເພາະວ່າ​ໃນ​ປີ 2012 ນັ້ນ ລາວ​ຖືກ​ຈັດ​ ໃຫ້​ຢູ່​ໃນ​ອັນ​ດັບ​ທີ 160 ​ແລະ​ໄດ້​ຮັບ​ຄວາມ​ໄວ້​ວາງ​ໃຈ​ຈາກ​ບັນດາ​ນັກ ທຸລະ​ກິດ​ຊາວ​ຕ່າງ​ປະ​ເທດ​ ທີ່​ລົງທຶນ​ໃນລາວ​ພຽງ​ແຕ່ 21 ຄະ​ແນນ​ເທົ່າ​ນັ້ນ ຊຶ່ງ​ກໍ​ໝາຍ​ຄວາມວ່າ ການ​ສໍ້​ລາດ​ບັງ​ຫຼວງ​ໃນ​ລາວ ມີ​ທ່າ​ອຽງ​ຫຼຸດ​ລົງ​ໃນ​ສາຍຕາ​ຂອງ​ນັກທຸລະກິດ​ຊາວ​ຕ່າງປະ​ເທດໃນ​ລາວ​ນັ້ນ​ເອງ.

ຊື່​ງສາ​ເຫດ​ທີ່​ສໍາຄັນ​ປະການ​ນຶ່ງ ທີ່​ເຮັດ​ໃຫ້​ລາວ​ໄດ້​ຮັບ​ຄວາມ​ໄວ້​ວາງໃຈ​ຫຼາຍ​ຂຶ້ນດັ່ງ​ກ່າວ ກໍຍ້ອນ​ວ່າ ​ໄດ້​ມີ​ການ​ປາບ​ປາມ​ການ​ສໍ້​ລາດ​ບັງ​ຫຼວງ​ຢ່າງ​ເຂັ້ມ​ງວດ​ຫຼາຍ​ຂຶ້ນ ​ໂດຍ​ທີ່​ທ່ານ​ທອງສີ ອ້ວນ​ລາສີ ຮອງ​ປະທານ​ອົງການ​ກວດກາແຫ່​ງລັດ ຖະ​ແຫຼ​ງຢືນຢັນ​ວ່າ ໄດ້​ມີ​ການ​ກວດກາ​ພົບ ການ​ປະຕິບັດ​ໜ້າ​ທີ່​ໂດຍ​ບໍ່​ສັດ​ຊື່ຂອງ​ບັນດາ​ພະນັກ​ງານ​ລັດ ທີ່​ເຮັດ​ໃຫ້​ເກີດ​ການ​ເສຍ​ຫາຍ​ທາງດ້ານ​ລາຍ​ຮັບ​ງົບປະມານ​ຂອງ​ລັດຖະບານ​ລາວ​ ຫຼາຍ​ຂຶ້ນຢ່າງ​ຕໍ່ເນື່ອງ.

ຕົວຢ່າງ​ເຊັ່ນ​ການກວດພົບ​ການ​ລັກລອບ​ຕັດ​ໄມ້​ຫວງ​ຫ້າມ ​ເຊັ່ນ​ໄມ້​ຄະ​ຍຸງ 1,400 ກວ່າ​ແມັດກ້ອນ ຢູ່​ໃນ​ແຂວງ​ສະຫວັນນະ​ເຂດ ​ເມື່ອ​ປີ 2007 ທີ່​ມີ​ເຈົ້າໜ້າ​ທີ່​ຂອງ​ລັດຖະບານ
11 ຄົນ ​ໄດ້​ຮ່ວມ​ມື​ກັບ​ບັນດາ​ນາຍທຶນ ທັງ​ຍັງ​ໄດ້​ກວດ​ພົບ​ການ​ຍັກ​ຍອກ​ເງິນ​ໄປ​ຈາກ​ຄັງ​
ເງິນ​ຂອງ​ແຂວງ ​ຫຼາຍ​ກວ່າ 5.1 ຕື້ ກີບອີກ​ດ້ວຍ. ສ່ວນ​ຢູ່​ແຂວງ​ຄໍາ​ມ່ວນ​ກໍ​ໄດ້​ກວດ​ພົບ​
ການ​ຮັບ​ສິນ​ບົນ​ໃນ ​ໂຄງການ​ສ້າງ​ທາງ​ໃນ​ເຂດ​ເທດສະບານ ຄິດ​ເປັນ​ມູນ​ຄ່າ​ເກີນ​ກວ່າ
12 ຕື້​ກີບ ​ແລະ​ໃນ​ປີ 2010-2011 ກໍ​ກວດ​ພົບການ​ຮົ່ວ​ໄຫຼ​ຂອງ​ງົບປະມານ​ໃນ​ໂຄງການ​
ຕ່າງໆ ທີ່ຮອງ​ຮັບ​ການ​ເປັນ​ເຈົ້າພາບ​ຈັດການ​ແຂ່ງຂັນ​ຊີ​ເກ​ມສ໌ ຄັ້ງ​ທີ່ 25 ຄິດ​ເປັນ​ມູນ​ຄ່າ​
ຫຼາຍ​ກວ່າ 1.5 ລ້ານ​ໂດ​ລ່າ​ກັບ ອີກ​ຫຼາຍ​ຮ້ອຍ​ລ້ານ​ກີບ.

​ໃນ​ຂະນະ​ດຽວ​ກັນ ກໍ​ຍັງ​ກວດ​ພົບ​ວ່າ ​ໄດ້​ມີ​ການ​ຍັກ​ຍອກເອົາ​ເງິນລັດ​ໄປ​ຫຼາຍ​ກວ່າ 10 ຕື້​
ກີບ​ຢູ່ໃນ​ບາງ​ແຂວງ ​ແລະ​ມີ​ພະນັກງານ​ລັດ 50 ກວ່າ​ຄົນ ທີ່​ໄດ້​ຮ່ວມ​ກັນ​ກະທໍາ​ຄວາມ​ຜິດ​ດັ່ງກ່າວ ​ແຕ່​ທີ່​ໜັກ​ໄປ​ກວ່າ​ນັ້ນ ກໍ​ຄື​ການ​ກວດກາ 104 ​ເປົ້າໝາຍ ​ໃນ​ແຜນການ​ປີ 2012-
2013 ທີ່ ຜ່ານ​ມາ ພົບ​ວ່າການ​ທຸດຈະລິດ​ຂອງ​ບັນດາ​ພະນັກງານ​ລັດ​ນັ້ນ ​ເຮັດ​ໃຫ້​ເກີດ​ການ​ເສຍ​ຫາຍ ຫຼາຍ​ກວ່າ 80 ຕື້​ກີບ ​ແລະ​ມີ​ຜູ້​ກະທໍາ​ຜິດ​ເຖິງ 472 ຄົນ ດັ່ງ​ທີ່ທ່ານ​ທອງ​ສີ ​ໄດ້​ຖະ​ແຫຼ​ງຊີ້ແຈງ​ວ່າ:

“ປີ 2012-2013 ນີ້​ ທັງ​ຢູ່​ສູນ​ກາງ ​ແລະ​ທ້ອງ​ຖິ່ນ​ໄດ້​ດໍາ​ເນີນ​ການ​ກວດກາ​
ລວມມີ 104 ​ເປົ້າໝາຍ ພົບ​ເຫັນ​ການ​ເສຍ​ຫາຍ 80 ກວ່າ​ຕື້​ກີບ ​ໃນ​ນີ້​ໄດ້​ເກັບ
ກູ້​ຄືນ​ໄດ້​ຈໍານວນ​ນຶ່ງ ​ແລະ​ກໍ​ມີ​ຜູ້​ກະທໍາ​ຜິດ 472 ຄົນ ພວກ​ທີ່​ກະທໍ​າຜິດດັ່ງ
ກ່າວ ​ແມ່ນ​ໄດ້​ຖືກ​ດໍາເນີນ​ຄະດີ​ຕາມ​ລະບຽບ​ກົດໝາຍ.”


ທ່າ​ນນາງ ວຽງ​ທ​ອງ ສີ​ພັນ​ດອນ ປະທານ​ອົງການ​ກວດກາ​ແຫ່ງ​ລັດ

ທ່າ​ນນາງ ວຽງ​ທ​ອງ ສີ​ພັນ​ດອນ ປະທານ​ອົງການ​ກວດກາ​ແຫ່ງ​ລັດ


ກ່ອນ​ໜ້າ​ນີ້ ທ່າ​ນນາງ ວຽງ​ທ​ອງ ສີ​ພັນ​ດອນ ປະທານ​ ອົງການ​
ກວດກາ​ແຫ່ງ​ລັດ ​ໄດ້​ສະ​ເໜີລາຍ​ງານ​ຕໍ່​ກອງ​ປະຊຸມ​ສະ​ໄໝ​ສາ
ມັນ​ຄັ້ງ​ທີ 5 ຂອງ​ສະພາ​ແຫ່ງ​ຊາດ​ລາວ​ຊຸດ​ທີ 7 ​ໃນ​ເດືອນກໍລະ
ກົດ​ທີ່​ຜ່ານ​ມາ​ນີ້​ວ່າ ສະ​ເພາະ​ໃນ​ແຜນການ​ປີ 2010-2011 ​ໄດ້​
ກວດ​ພົບ​ການ​ໃຊ້​ຈ່າຍ​ງົບປະມານ​ ທີ່​ບໍ່​ເປັນ​ໄປ​ຕາມ​ ແຜນການ
ທັງ​ຍັງ​ເປັນ​ການ​ໃຊ້​ຈ່າຍ​ນອກ​ບັນຊີ ຄິດ​ເປັນ​ມູນ​ຄ່າ​ລວມ ​ເຖິງ
1,933.33 ຕື້​ກີບ ຫຼື​ປະມານ 254 ລ້ານ​ໂດ​ລ່າ. ​

ໂດຍ​ການ​ໃຊ້​ຈ່າຍ​ນອກບັນ​ຊີ​ດັ່ງ​ກ່າວນີ້ ​ແບ່ງ​ເປັນ​ໃນ​ດ້ານ​ແຜນ
ການ​ງົບປະມານ​ ລາຍ​ຮັບ 416.58 ຕື້​ກີບ ​ແລະ​ ໃນ​ດ້ານ​ແຜນການ​ງົບປະມານ​ລາຍ​ຈ່າຍ 1,516.75 ຕື້​ກີບ ຊຶ່ງ​ທຽບ​ໄດ້ກັບ 2.9% ຂອງ​ລາຍ​ຮັບທີ່​ຈັດ​ເກັບ​ໄດ້​ທັງ​ໝົດ​ແລະ 9.84%
ຂອງ​ລາຍ​ຈ່າຍ​ທີ່​ປະຕິບັດ​ໄດ້ທັງ​ໝົດ​ເທົ່າ​ນັ້ນກໍ​ຕາມ ຫາກ​ແຕ່​ກໍ​ຕ້ອງ​ຖື​ວ່າ​ເປັນ​ກາ​ນຮົ່ວ​ໄຫຼ ຂອງ​ງົບປະມານ​ລາຍ​ຮັບ ​ແລະ​ລາຍ​ຈ່າຍ ທີ່​ເພີ່ມ​ຂຶ້ນຈາກ​ແຜນການ​ປີ 2009-2010​ ໃນ​
ລະດັບ​ທີ່​ສູງ​ພໍ​ສົມຄວນ ທັງ​ຍັງ​ເປັນ​ການສະ​ແດງ​ໃຫ້​ເຫັນ​ເຖິງ​ການ​ປະຕິບັດ​ໜ້າ​ທີ່​ ຢ່າງ​ບໍ່​
ສັດ​ຊື່ຂອງ​ບັນດາ​ພະນັກງານ​ລັດຖະບານ ອີກດ້ວຍ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG