ລິ້ງ ສຳຫລັບເຂົ້າຫາ

ມູນຄ່າຮຸ້ນ ໃນຕະຫຼາດ ຫຼັກຊັບລາວ ມີຫຼາຍກວ່າ 2,000 ຕື້ກີບ ໃນປີ 2013

  • ຊົງຣິດ ໂພນເງິນ

ເຈົ້າໜ້າທີ່ຕະຫຼາດຮຸ້ນລາວ

ເຈົ້າໜ້າທີ່ຕະຫຼາດຮຸ້ນລາວ

ການ​ຊື້​ຂາຍ​ຮຸ້ນ​ ຂອງ 2 ບໍລິສັດ​ ໃນ​ຕະຫຼາດ​ຫຼັກ​ຊັບ​ ແຫ່ງ​ຊາດ​
ລາວມີ​ມູນ​ຄ່າ​ລວມກັນ ​ເກີນ​ກວ່າ 2,000 ຕື້​ກີບ ​ໃນ​ຕະຫຼອດ​ປີ
2013 ທີ່​ຜ່ານ​ມາ ​ແລະ​ຄາດໝາຍ​ວ່າ​ ຈະ​ເພີ່ມ​ຂຶ້ນອີກ ​ໃນ​ປີ
2014 ນີ້.


ຄະນະ​ກໍາມະການ​ຄຸ້ມ​ຄອງ​ຕະຫຼາດ​ຫຼັກ​ຊັບ​ແຫ່ງ​ຊາດ​ລາວ
ລາຍ​ງານ​ວ່າ ​ໃນ​ຕະຫຼອດ​ປີ 2013 ທີ່​ຜ່ານ​ມາ ການ​ຊື້​ຂາຍ​ຮຸ້ນ
​ຂອງ 2 ບໍລິສັດ​ທີ່​ຈົດ​ທະບຽນ​ໃນ​ຕະຫຼາ​ດຫຼັກ​ຊັບ​ຂອງ​ລາວ ກໍ​ຄື​ທະນາຄານ​ການ​ຄ້າ​ຕ່າງ
ປ​ະ​ເທດ (ມະຫາຊົນ) ຫຼື BCEL ​ແລະ​ບໍລິສັດ​ຜະລິດ​ກະ​ແສ​ໄຟຟ້າ ລາວ​(ມະຫາຊົນ) ຫຼື
EDL-­GEN ນັ້ນ ມີ​ມູນ​ຄ່າ​ລວມກັນ​ເກີນ 2,000 ຕື້​ກີບ ຫຼື​ຫຼາຍກວ່າ 250 ລ້ານ​ໂດ​ລ່າ. ​

ໂດຍ​ສະ​ເພາະ​ແມ່ນ​ວັນ​ທີ 25 ທັນວາ ປີ 2013 ຊຶ່ງ​ຖື​ເປັນ​ມື້​ທໍາ​ອິດ​ຂອງ​ການຊື້​ຂາຍ​ຮຸ້ນຂອງ
ບໍລິສັດ Lao World ຈໍາກັດ(ມະຫາຊົນ) ​ໃນ​ຖານະ​ທີ່​ເປັນ​ບໍລິສັດ​ອັນ​ດັບ ​3 ທີ່​ຈົດທະບຽນ ​
ໃນ​ຕະຫຼາດ​ຫຼັກ​ຊັບ​ແຫ່ງ​ຊາດ​ລາວ​ນັ້ນ ກໍ​ໄດ້​ເປັນ​ຜົນ​ເຮັດ​ໃຫ້​ມູນ​ຄ່າ​ການ​ຊື້​ຂາຍ​ຮຸ້ນ​ໃນຕະຫຼາດ
ຫຼັກ​ຊັບ​ແຫ່ງ​ຊາດ​ລາວ​ເພີ່ມ​ຂຶ້ນ ຈາກ​ລະດັບປົກກະຕິ ທີ່ມີ​ມູນ​ຄ່າ​ສະ​ເລ່ຍ 10 ຕື້​ກີບ​ໃນ​ແຕ່​ລະ​ມື້
​ເປັນຫລາຍກວ່າ 14 ຕື້​ກີບ​ເປັນ​ເທື່ອ​ທໍາ​ອິດ.

ລາຄາຮຸ້ນຂອງແຕ່ລະບໍລິສັດ

ລາຄາຮຸ້ນຂອງແຕ່ລະບໍລິສັດ


ທັງ​ນີ້​ ໂດຍ​ປາກົດວ່າ ຮຸ້ນ​ຂອງ BCEL ​ໄດ້​ຊື້​ຂາຍ ໃນ​ລາຄາ
8,500 ກີບ​ຕໍ່​ຮຸ້ນ ສ່ວນ​ທາງ​ດ້ານ​ຮຸ້ນ​ຂອງ​ບໍລິສັດ EDL-GEN
ນັ້ນ ກໍ​ຢູ່​ທີ່​ລະດັບ 5,950 ກີບ​ຕໍ່​ຮຸ້ນ ​ໃນ​ຂະນະ​ທີ່​ຮຸ້ນ​ຂອງ​ບໍລິສັດ
Lao World ທີ່​ຊື້​ຂາຍ​ໃນ​ຕະຫຼາດ​ຫຼັກ​ຊັບ​ແຫ່ງຊາດ​ລາວ​ ເປັນ​
ເທື່ອ​ທໍາ​ອິດ ກໍ​ມີ​ລາຄາ​ເຖິງ 11,000 ກີບ​ຕໍ່​ຮຸ້ນ ​ໂດຍ​ສູງກວ່າ​ລາ
ຄາ​ຕັ້ງ​ຕົ້ນ​ທີ່​ກໍາໜົດ​ໄວ້​ ທີ່​ລະດັບ 10,200 ກີບ​ຕໍ່ຮຸ້ນ ຈາກ​ທັງ​
ໝົດ 3,956,100 ຮຸ້ນ ທີ່​ບໍລິສັດ​ດັ່ງກ່າວ ​ໄດ້​ສະ​ເໜີ​ຂາຍ​ ຕໍ່​ປະ
ຊາຊົນ​ລາວ​ໄປ​ແລ້ວ​ໃນ ຊ່ວງ​ກ່ອນ​ໜ້າ​ນີ້.

ທາງ​ດ້ານ​ທ່ານ​ສົມ​ສະຫວາດ ​ເລັ່ງສະ​ຫວັດ ຮອງ​ນາຍົກລັດຖະມົນຕີຜູ້ຊີ້​ນໍາວຽກ​ງານດ້ານ​
ເສດຖະກິດ ​ແລະ​ປະທານ​ຄະນະ​ກໍາມະການ​ຄຸ້ມ​ຄອງ​ຕະຫຼາດ​ຫຼັກ​ຊັບ​ແຫ່ງຊາດລາວ ກໍໄດ້
ໃຫ້ການ​ຢືນຢັນ​ກັບ​ວີ​ໂອ​ເອ ວ່າລັດຖະບານ​ລາວ​ມີ​ແຜນການ​ຈະ​ເປີດ​ຮັບ​ບໍລິສັດມະຫາຊົນ
​ເຂົ້າຈົດທະບຽນ ​ໃນ​ຕະຫຼາດ​ຫຼັກ​ຊັບ​ແຫ່ງ​ຊາດ​ລາວເພີ່ມ​ຂຶ້ນ​ ໃຫ້​ໄດ້​ຮອດ 20 ບໍລິສັດ.

ຫາກ​ແຕ່​ວ່າ ການ​ຈົດ​ທະບຽນ​ດັ່ງກ່າວ​ຈະ​ມີ​ຂຶ້ນຢ່າງ​ເປັນ​ທາງ​ການ​ມື້​ໃດ​ແທ້​ນັ້ນ ກໍ​ຍັງ​ຄົງ​ບໍ່
​ສາມາດ​ທີ່​ຈະ​ກໍາໜົດ​ໄດ້​ຈົນ​ເຖິງ​ຂະນະ​ນີ້ ​ເນື່ອງ​ຈາກ​ວ່າຄວາມ​ພ້ອມ​ຕ່າງໆ​ນັ້ນ ບໍ່​ໄດ້​ຢູ່​ທີ່​
ຄະນະກໍາມະການ​ຄຸ້ມຄອງຕະຫຼາດ​ຫຼັກ​ຊັບ​ແຫ່ງ​ຊາດ​ລາວ​ແຕ່​ຢ່າງ​ໃດ ຫາກ​ແຕ່​ຂຶ້ນຢູ່​ກັບ
ການພັດທະນາ​ປັບປຸງ​ລະບົບ​ການ​ບັນຊີ ​ແລະ​ການ​ບໍລິຫານ​ງານ​ທີ່​ໄດ້​ມາດຕະຖານສາກົນ
​ຂອງ​ແຕ່ລະ​ບໍລິສັດ​ເປັນ​ສໍາຄັນ ດັ່ງ​ທີ່​ທ່ານ​ສົມ​ສະຫວາດ ​ໄດ້​ໃຫ້ການ​ຊີ້​ແຈ​ງວ່າ:

“​ແຕ່​ວ່າ​ຄັນ​ຖ້າ​ພວກ​ເຂົາ ບໍ່​ກຽມພ້ອມໄດ້​ຕາມ​ນີ້ ຂ້ອຍ​ກະ​ບໍ່​ຮັບ ຍົກ​ຕົວຢ່າງ​
ບໍລິສັດ​ອັນ​ນີ້ ທີ່​ເຂົ້າມາ​ນີ້ ຄັນ​ເຈົ້າມີ​ໜີ້ສິນ​ມະຫາສານ​ແລ້ວ ຍັງ​ຈະ​ເອົາ​ເຂົ້າມາ ​
ແມ່ນໃຜ​ຈະ​ມາ​ຊື້​ກັບ​ເຈົ້າ ຫຼື​ວ່າ​ຢູ່​ບໍລິສັດ ​ໂຄງ​ສ້າງ​ການຈັດ​ຕັ້ງ​ຂອງ​ເຈົ້າກໍ​ບໍ່​ດີ
ຜູ້​ອໍາ​ນວຍ​ການ​ນີ້​ເດ່ ​ເຂົາ​ສົງ​ໃສ​ວ່າ​ໝໍ​ນີ້​ມີ​ປາກົດການ​ສໍ້​ໂກງ​ແລ້ວ ຄົນ​ທັງຫຼາຍ
​ເຂົາ​ກະ​ຮູ້​ກັນ​ເດ່​ເນາະ. ອັນ​ນີ້​ກະໄດ້​ເວົ້າ​ກັນ​ລະອຽດ​ສົມຄວນ.”


​ໂດຍ​ກ່ອນ​ໜ້າ​ນີ້ ຄະນະ​ກໍາມະການ​ຄຸ້ມ​ຄອງ​ຕະຫຼາດ​ຫຼັກ​ຊັບ​ແຫ່ງ​ຊາດ​ລາວ​ໄດ້​ດໍາ​ເນີນ​ການ​
ສໍາຫຼວດບັນດາ​ບໍລິສັດ​ໃນ​ລາວ​ຈໍານວນ 1,087 ລາຍ ຊຶ່ງ​ກໍ​ພົບ​ວ່າ​ມີ​ຢູ່ 38 ບໍລິສັດ​ທີ່​ມີ​ເງື່ອນ
​ໄຂ ທີ່​ສາມາດ​ຈະ​ຂໍ​ຈົດ​ທະບຽນ​ ໃນ​ຕະຫຼາດ​ຫຼັກ​ຊັບ​ໄດ້ ຫາກ​ແຕ່​ວ່າ​ພາຍຫຼັງ​ທີ່​ໄດ້​ທໍາການ
ກວດກາ​ຢ່າງຮອບດ້ານ​ອີກ​ເທື່ອ​ໃໝ່ ກໍ​ປະກົດ​ວ່າ ​ມີ​ຢູ່ 20 ບໍ​ລິ​ສັດ​ທີ່​ໄດ້​ສະ​ແດງ​ເຈດຈໍານົງ​
ທີ່​ຈະ​ຂໍ​ຈົດທະບຽນ​ໃນ​ຕະຫຼາດ​ຫຼັກ​ຊັບ ​ໂດຍ​ໃນ​ນີ້ ກໍ​ລວມ​ເຖິງ​ວິ​ສາ​ຫະກິດ​ໂທລະ​ຄົມມະນາ
ຄົມ​ລາວ (ETL) ບໍລິສັດ​ລາວ​ໂທລະ​ຄົມມະນາຄົມ (Lao Tele com) ກຸ່ມ​ບໍລິສັດ​ດາວ​ເຮືອງ​
ການ​ຄ້າ ຂາ​ອອກ-ຂາ​ເຂົ້າ ບໍລິສັດ​ອິນ​ໂດ​ຈີນ​ຈໍາກັດ (ມະຫາຊົນ) ລັດ​ວິ​ສາ​ຫະກິດການບິນ
​ລາວ (Lao Airlines) ທະນາຄານ​ພົງ​ສະຫວັນ ​ແລະ​ບໍລິ​ສັດ​ຄ້າ​ນໍ້າມັນ​ເຊື້ອ​ໄຟ ​ເປັນ​ຕົ້ນ.

ທັງ​ນີ້​ໂດ​ຍທາງການ​ລາວ​ຄາດ​ຫວັງ​ວ່ າການ​ຈົດ​ທະບຽນບໍລິສັດ​ເຂົ້າ​ໃນ​ຕະຫຼາດ​ຫຼັກ​ຊັບ​ເພີ່ມ​ຂຶ້ນນີ້ ຈະ​ມີ​ສ່ວນ​ຢ່າງ​ສໍາຄັນ​ໃນ​ການ​ເຮັດ​ໃຫ້ການ​ຊື້-ຂາຍ​ຮຸ້ນ​ກັບ​ຄືນ​ສູ່​ສະພາວະ​ທີ່​ຄຶກຄື້ນ​ອີກ​ເທື່ອ​ໃໝ່ ​ເພາະວ່າ​ການ​ຊື້​ຂາຍ​ຮຸ້ນ​ໃນ​ຕະຫຼາດ​ຫຼັກ​ຊັບ​ຂອງ​ລາວ​ນັບ​ແຕ່​ເດືອນ​ມັງກອນ 2011 ​ເປັນ​ຕົ້ນ​ມາ ​ໄດ້​ດໍາ​ເນີນໄປ​ພາຍ​ໃຕ້​ສະພາວະ​ການ​ຜັນ​ຜວນ​ມາ​ໂດຍ​ຕະຫຼອດ ຊຶ່ງ​ກໍ​ຈະ​ເຫັນ​ໄດ້​ຈາກ​ຮຸ້ນ​ຂອງ BCEL ທີ່​ເຄີຍ​ມີ​ລາຄາ​ສູງ​ເຖິງ 15,400 ກີບ​ຕໍ່​ຮຸ້ນ ໄດ້​ລົດ​ລົງສູ່​ລະດັບ​ຕໍ່າ​ສຸດ
ຢູ່ທີ່ 5,700 ກີບ​ຕໍ່​ຮຸ້ນ ສ່ວນ​ຮຸ້ນ​ຂອງ EDL-GEN ທີ່​ເຄີຍ​ມີ​ລາຄາ​ທີ່​ສູງ​ເຖິງ 8,800 ກີບ​ນັ້ນ
ກໍ​ໄດ້​ລົດ​ລົງສູ່ລະດັບ​ຕໍ່າ​ສຸດ ທີ 4,100 ກີບ​ ຕໍ່​ຮຸ້ນ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG