ຜູ້ວ່າການທະນາຄານແຫ່ງ ສປປ.ລາວ ຢືນຢັນເຖິງແຜນການ
ທີ່ຈະເພີ້ມທຶນສຳຮອງເງິນຕາຕ່າງປະເທດ ໃຫ້ໄດ້ທຽບເທົ່າກັບ
ການນຳເຂົ້າສິນຄ້າຕ່າງປະເທດເປັນເວລາ 5 ເດືອນພາຍໃນ
ເດືອນກັນຍາປີນີ້.
ທ່ານສົມພາວ ໄພສິດ ຜູ້ວ່າການທະນາຄານແຫ່ງ ສປປ.ລາວໄດ້ຖະແຫລງຢືນຢັນຕໍ່ກອງ
ປະຊຸມສະໄໝສາມັນຄັ້ງທີ 7 ຂອງສະພາແຫ່ງຊາດລາວ ຊຸດທີ 7 ວ່າ ພາຍໃນລະຍະເວລາ
ທີ່ເຫຼືອຢູ່ ຂອງແຜນການສົກປີ 2013-2014 ທີ່ຈະສິ້ນສຸດລົງໃນທ້າຍເດືອນກັນຍາ 2014 ນີ້
ທະນາຄານແຫ່ງ ສປປ.ລາວ ຈະພະຍາຍາມດຳເນີນທຸກມາດຕະການທາງການເງິນ ເພື່ອ
ຮັກສາສະຖຽນລະພາບ ຂອງຄ່າເງິນກີບໃຫ້ໝັ້ນທ່ຽງ.
ໂດຍມາດຕະການໜຶ່ງທີ່ສຳຄັນ ກໍຄືການຄວບຄຸມອັດຕາການແລກປ່ຽນລະຫວ່າງເງິນກີບ
ກັບເງິນສະກຸນຕ່າງປະເທດ ບໍ່ໃຫ້ເກີດສະພາວະການປັ່ນປ່ວນ ແລະບໍ່ມີຄວາມແຕກໂຕນ
ກັນ ລະຫວ່າງອັດຕາແລກປ່ຽນ ໃນລະບົບທະນາຄານກັບຕະຫລາດທີ່ເປັນຈິງ ລວມໄປເຖິງ
ການລົນນະລົງ ໃຫ້ປະຊາຊົນ ແລະ ທຸລະກິດການຄ້າໃນລາວ ຊົມໃຊ້ເງິນກີບໃນການຊຳລະ
ລາຄາສິນຄ້າ ແລະໜີ້ສິນລະຫວ່າງກັນເປັນສຳຄັນ.
ໂດຍຖ້າຫາກວ່າການດຳເນີນງານ ເປັນໄປຕາມແຜນການ
ທີ່ວາງໄວ້ ກໍຈະເຮັດໃຫ້ທຶນສຳຮັອງ ເງິນຕາຕ່າງປະເທດ ຂອງ
ລັດຖະບານລາວ ມີມູນຄ່າລວມທີ່ທຽບເທົ່າກັບ ການນຳເຂົ້າ
ສິນຄ້າຈາກຕ່າງປະເທດ ເປັນລະຍະເວລາ 5 ເດືອນ ໃນລະຍະ
ສິ້ນສຸດແຜນການປີ 2013-2014 ນີ້ ດັ່ງທີ່ ທ່ານສົມພາວ ໄດ້
ຢືນຢັນວ່າ:
“ທະນາຄານແຫ່ງ ສປປ.ລາວ ຈະສືບຕໍ່ຄຸ້ມຄອງກະແສ
ເງິນຕາເຂົ້າອອກປະເທດ ພ້ອມທັງ ສືບຕໍ່ສົ່ງເສີມການ
ນຳໃຊ້ເງີນກີບ ຮັກສາລະບົບການແລກປ່ຽນເງິນກີບ ກັບ
ເງິນສະກຸນອື່ນ ຕາມກົນໄກຕະຫລາດ ບໍ່ເຮັດໃຫ້ມີຄວາມ
ແຕກຕ່າງດ້ານອັດຕາແລກປ່ຽນລະຫວ່າງທະນາຄານກັບຕະຫລາດ ສູ້ຊົນຮັກສາລະດັບຄັງສຳຮອງເງິນຕາຕ່າງປະເທດໃຫ້ໄດ້ຕາມແຜນການທີ່ກຳນົດເອົາໄວ້ ຄື
ຫຼາຍກວ່າຫ້າເດືອນ.”
ທາງດ້ານເຈົ້າໜ້າທີ່ຂັ້ນສູງໃນກະຊວງການເງິນ ໄດ້ເປີດເຜີຍວ່າທຶນສຳຮອງເງິນຕາຕ່າງ
ປະເທດຂອງລັດຖະບານລາວ ໄດ້ມີມູນຄ່າລົດລົງຢ່າງຕໍ່ເນື່ອງນັບແຕ່ເດືອນຕຸລາ 2013
ເປັນຕົ້ນມາໂດຍມີສາເຫດມາຈາກ ການຂາດດຸນການຄ້າຕ່າງປະເທດ ໃນມູນຄ່າຫຼາຍ
ກວ່າ 1,000 ລ້ານດອນລາ ຊຶ່ງເກີນກວ່າແຜນການທີ່ວາງເອົາໄວ້ຕະຫລອດປີ ເຖິງ 2 ເທົ່າ
ໃນເວລານີ້ ແລະ ສະພາບການດັ່ງກ່າວ ກໍຍັງເຮັດໃຫ້ສາມາດຄາດໝາຍໄດ້ວ່າ ລາວ
ຈະຂາດດຸນການຄ້າສະສົມເກີນກວ່າ 2,000 ລ້ານດອນລາ ໃນຕະຫລອດແຜນການ ປີ 2013-2014 ນີ້.
ຍິ່ງໄປກວ່ານັ້ນ ການຂາດດຸນການຄ້າຕ່າງປະເທດ ກໍຍັງ
ເຮັດໃຫ້ບັນດາຜູ້ ປະກອບການ ທຸລະກິດຕ່າງໆ ໃນລາວ
ໄດ້ພາກັນຫັນໄປຖືຄອງ ເງິນສະກຸນຕ່າງປະເທດໄວ້ ເປັນ
ສ່ວນໃຫຍ່ອີກດ້ວຍ ເນື່ອງຈາກວ່າ ບໍ່ເຊື່ອໝັ້ນສະຖຽນ
ລະພາບຂອງຄ່າເງິນກີບໃນລະຍະຍາວ ແລະ ຜົນທີ່ຕິດ
ຕາມມາກໍຄືອັດຕາເງິນເຟີ້ໃນລາວ ທີ່ສູງກວ່າທຸກປະເທດ
ໃນກຸ່ມອາຊ່ຽນດ້ວຍກັນ.
ໂດຍໃນລະຍະ 6 ເດືອນທຳອິດ ຂອງແຜນການປີ 2013
-2014 ອັດຕາເງິນເຟີ້ໃນລາວ ໄດ້ປັບຕົວສູງຂຶ້ນເປັນ 6.27
ເປີເຊັນ ສ່ວນບັນຫາສິນຄ້າແພງ ກໍຍັງໄດ້ເຮັດໃຫ້ ດັດຊະນີ
ລາຄາ ຜູ້ບໍລິໂພກ ເພີ້ມຂຶ້ນເປັນ 122.5 ເປີເຊັນ ໃນຂະນະທີ່ ທຶນສຳຮອງເງິນຕາຕ່າງ ປະເທດ ຍັງເຫຼືອເທົ່າກັບ ການນຳເຂົ້າສິນຄ້າ ຈາກຕ່າງປະເທດ ໄດ້ພຽງບໍ່ເຖິງ 2 ເດືອນ.
ທາງດ້ານກະຊວງອຸດສາຫະກຳແລະການຄ້າ ລາຍງານວ່າ ລັດຖະບານລາວ ໄດ້ວາງ
ແຜນການ ທີ່ຈະສົ່ງສິນຄ້າອອກໄປຕ່າງປະເທດໃຫ້ໄດ້ໃນມູນຄ່າລວມ 2,178 ລ້ານ
ດອນລາ ໃນແຜນການປີ 2013-2014 ນີ້ ແລະໃນຂະນະດຽວກັນ ກໍຈະຄວບຄຸມການ
ນຳເຂົ້າ ສິນຄ້າໃຫ້ບໍ່ເກີນ 2,730 ລ້ານດອນລາ ຊຶ່ງກໍຈະເຮັດໃຫ້ ສາມາດຄວບຄຸມການ
ຂາດດຸນ ການຄ້າໃຫ້ມີມູນຄ່າລວມ ບໍ່ເກີນ 552 ລ້ານດອນລາ ໃນຕະຫລອດແຜນການ.
ຫາກແຕ່ວ່າໃນສະພາບການທີ່ເປັນຈິງນັ້ນ ຄົງຈະເປັນການຍາກທີ່ ລັດຖະບານລາວ ຈະສາມາດປະຕິບັດໄດ້ຕາມແຜນການດັ່ງກ່າວ ເພາະໃນແຜນການປີ 2013-2014 ນີ້ ຄາດໝາຍວ່າ ລາວຈະນຳເຂົ້າສິນຄ້າຈາກຕ່າງປະເທດ ຄິດເປັນມູນຄ່າລວມ 3,720 ລ້ານດອນລາ ເນື່ອງຈາກວ່າການລົງທຶນ ຂອງຕ່າງຊາດທີ່ເພີ້ມຂຶ້ນຢ່າງຕໍ່ເນື່ອງນັ້ນ ເຮັດໃຫ້ລາວ ຕ້ອງມີການນຳເຂົ້າ ເຄື່ອງຈັກນ້ຳມັນເຊື້ອໄຟ ແລະອຸປະກອນຕ່າງໆເພີ້ມ
ຂຶ້ນ ສ່ວນການສົ່ງອອກ ກໍຍັງອີງໃສ່ ການຂຸດຄົ້ນຊັບພະຍາກອນທຳມະຊາດເປັນຫຼັກ ຈຶ່ງຄາດວ່າ ລາວຈະຂາດດຸນການຄ້າຕ່າງປະເທດຫຼາຍກວ່າ 1,550 ລ້ານດອນລາ.
