ລິ້ງ ສຳຫລັບເຂົ້າຫາ

ນັກວິເຄາະ ຄາດວ່າ ຈະມີການສັບຊ້ອນ ຢ່າງໃຫຍ່ ໃນຄະນະ ລັດຖະບານລາວ (ສະໄລດ໌/ວີ​ດີ​ໂອ)


ທ່ານ​ພົນ​ໂທດວງ​ໃຈ​ ພິຈິດ ແມ່ນ​ນຶ່ງ​ໃນ​ບັນ​ດາ​ຜູ້​ນຳ​ທາງ​ການ​ເມືອງ​ ທີ່​ສຳ​ຄັນ​ສຸດ​ຢູ່​ໃນ​ລາວ ຊຶ່ງໄດ້ເສຍຊີວິດ ຈາກອຸບັດເຫດເຮືອບິນຕົກ.
ລັດ​ຖະ​ມົນ​ຕີ​ກະ​ຊວງ​ປ້ອງ​ກັນ​ປະ​ເທດ​ລາວ ແມ່ນ​ຮວມ​ຢູ່​ໃນ​ຈຳ​
ນວນ 10 ກວ່າ​ຄົນ ທີ່​ມີ​ລາຍ​ງານ​ວ່າ ໄດ້​ເສຍ​ຊີ​ວິດ​ ໃນ​ຕອນ​ເຊົ້າ
ວັນ​ເສົາ​ຜ່ານ​ມານີ້ ເວ​ລາ​ເຮືອ​ບິນ​ຂອງກອງ​ທັບ​ອາ​ກາດ​ລາວ ໄດ້​
ປະ​ສົບ​ອຸ​ບັດ​ເຫດ​ຕົກ ຢູ່​ໃນ​ພາກ​ເໜືອ ຂອງ​ລາວ. ດັ່ງ​ທີ່ Ron
Corben ຜູ້​ສື່​ຂ່າວ​ວີ​ໂອ​ເອ ລາຍ​ງານ​ມາຈາກ​ບາງກອກ ກໍແມ່ນ
ວ່າ ພວກ​ນັກ​ວິ​ເຄາະມອງ​ເຫັນ​ວ່າ ຈະ​ມີ​ການ​ສັບ​ຊ້ອ​ນ​ຄັ້ງ​ໃຫ​ຍ່ ພາຍ​ໃນ​ພັກຄອມ​ມູ​ນິ​ສ ຫລື​ພັກ​ປ​ະ​ຊາ​ຊົນ​ປະ​ຕິ​ວັດ​ລາວ​ ທີ່​ປົກ​ຄອງ​ປະ​ເທດ​ຢູ່​ໃນ​ເວ​ລານີ້ ​ຍ້ອນ​ໂສກ​ນາດ​ຕະ​ກຳ ຊຶ່ງ​ໄດ້​ເກີດຂຶ້​ນ​ພຽງ 7 ເດືອນ​ເທົ່າ​ນັ້ນ ລຸນ​ຫລັງຖ້ຽວບິນພາຍ​ໃນ​ປະ​ເທດ​ຂອ​ງ​ສາຍ​ການ​ບິນ​ລາວ ໄດ້​ປະ​ສົບ​ອຸ​ບັດເຫດ​ຕົກ ທີ່​ເຮັດ​ໃຫ້​ມີ​ຜູ້​ເສຍ​ຊີ​ວິດ​ຫລາຍ
ກວ່າ 40 ຄົນ​ນັ້ນ. ໄຊຈະ​ເລີນ​ສຸກ ມີ​ລາຍ​ລະ​ອຽດກ່ຽວ​ກັບ​ເລື່ອງນີ້ ມາ​ສະ​ເໜີ​ທ່ານ.

ໂທ​ລະ​ພາບຂອງ​ລາວ ໄດ້​ອອກ​ຂ່າວ​ຮູບ​ພາບ​ ທີ່​ມີ​ຄວັນ​ກຸ້ມ​ຂຶ້ນ​ຈາກ​ຊາກ ຂອງ​ເຮືອ​ບິນ AN-
74 ທີ່​ສ້າງ​ໂດຍ​ຢູ​ເຄ​ຣນ ຫລັງ​ຈາກ​ໄດ້​ປະ​ສົບ​ອຸ​ບັດ​ເຫດ​ຕົກ​ຢູ່ ໃນ​ປ່າ​ແຫ່ງນຶ່ງ ໃນ​ຕອນໃກ້​
ຈະ​ລົງ​ຈອດ ທີ່​ແຂວງ​ຊຽງ​ຂວາງ ໃນ​ພາກ​ເໜືອ​ຂອງ​ລາວ ປະ​ມານ 470 ຫລັກ​ກິ​ໂລ​ແມັດ​
ຫ່າງ​ຈາກນະ​ຄອນ​ຫລວງວຽງ​ຈັນ.

ຮວມ​ຢູ່​ໃນ​ຈຳ​ນວນ​ພວກ​ທີ່​ເສຍ​ຊີ​ວິດ 14 ຄົນ​ນັ້ນ ກໍມີລັດ​ຖະ​ມົນ​ຕີ​ປ້ອງ​ກັນ​ປະ​ເທດ​ ຂອງ​ລາວ ພົນ​ໂທດວງ​ໃຈ ພິ​ຈິດ ພ້ອມ​ທັງ​ກຳ​ຕຳ​ແໜ່ງ​ ຮອງ​ນາ​ຍົກ​ລັດ​ຖະ​ມົນ​ຕີ ​ແລະ​ສະ​ມາ​ຊິກ​ກຳ​ມະ​ການ​ກົມ​ການ​ເມືອງ​ສູນ​ກາງ ວົງ​ໃນ ທີ່​ມີ​ອິດ​ທິ​ພົນ​ຂອງພັກຄອມ​ມູ​ນິ​ສ ຫລື​ພັກ​ປະ​ຊາ​ຊົນ​ປະ​ຕິ​ວັດ​ລາວ.

ສ່ວນ​ເຈົ້າ​ໜ້າ​ທີ່​ຄົນ​ສຳ​ຄັນ​ອື່ນໆ​ ທີ່​ເສຍ​ຊີ​ວິດ​ໃນ​ຄັ້ງ​ນີ້ ກໍ​ມີ​ຮວມ​ທັງ​ລັດ​ຖະ​ມົນ​ຕີປ້ອງກັນ​ຄວາມ​ສະ​ຫງົບ​ ແລະ​ເຈົ້າ​ຄອງ​ນະ​ຄອນ​ຫຼ​ວ​ງວຽງ​ຈັນ ຕະ​ຫລອດທັງ​ບັນ​ດາ​ສະ​ມ​າ​ຊິກ​ໃນ​ຄອບ​ຄົວ ​ທີ່​ພາ​ກັນ​ເດີນ​ທາງ​ໄປ​ຮ່ວມພິ​ທີ ແລະ​ການ​ຕ້ອນ​ຮັບ ຢູ່​ທີ່ແຂວງ​ຊຽງ​ຂວາງ.
ຍັງມີບັນດາເຈົ້າໜ້າທີ່ຂັ້ນສູງຂອງລາວອີກຫຼາຍທ່ານ ທີ່ໄດ້ເສຍຊີວິດ ຈາກອຸບັດເຫດເຮືອບິນຕົກ.
ຍັງມີບັນດາເຈົ້າໜ້າທີ່ຂັ້ນສູງຂອງລາວອີກຫຼາຍທ່ານ ທີ່ໄດ້ເສຍຊີວິດ ຈາກອຸບັດເຫດເຮືອບິນຕົກ.

​ໂສກ​ນາດ​ຕະ​ກຳ​ດັ່ງ​ກ່າວນີ້ ຂັ້ນ​ຕົ້ນ​ແມ່ນ​ໄດ້​ຮັບ​ການ​ຢືນ​ຢັນ ​ໂດຍ​ກະ​ຊວງການ​ຕ່າງ​ປະ​ເທດ​ໄທ. ປະ​ເທດ​ໄທ​ແມ່ນ​ມີ​ຄວາມ​ສຳ​ພັນ​ອັນ​ໃກ້​ຊິດ ​ມາ​ເປັນ​ເວ​ລາດົນ​ນານ​ກັບ​ລາວ ທີ່​ເປັນ​ເພື່ອນ​ບ້ານ.

ໂສກ​ນາດ​ຕະ​ກຳ​ທີ່​ວ່ານີ້ ເກີດ​ຂຶ້ນ​ພຽງ 7 ເດືອນ​ເທົ່າ​ນັ້ນ ຫລັງ​ຈາກ​ຖ້ຽວ​ບິນ​ພາຍໃນ​ປະ​ເທດ​ຂອງ​ສາຍ​ການ​ບິນ​ລາວ ໄດ້​ປະ​ສົບ​ອຸ​ບັດ​ເຫດ​ຕົກ ທີ່​ແຂວງ​ຈຳ​ປາ​ສັກ ທາງ​ພາກ​ໃຕ້​ຂອງ​ລາວ ທີ່​ເຮັດ​ໃຫ້​ຜູ້​ໂດຍ​ສານ ​ແລະ​ພະ​ນັກ​ງານ​ຂອງ​ເຮືອ​ບິນ 49 ຄົນ​ເສຍ​ຊີ​ວິດ. ລາຍ​
ງານ​ຢ່າງ​ເປັນ​ທາງ​ການ ກ່ຽວ​ກັບ​ການ​ປະ​ສົບ​ອຸ​ບັດ​ເຫດ​ຕົກ ຂອງ​ເຮືອ​ບິນ​ອາຍ​ພົ່ນ​ໝາກ​ປິ່ນ ATR-72 ມີ​ກຳ​ນົດ​ທີ່​ຈະ​ນຳ​ອອກ​ເຜີຍ​ແຜ່​ ໃນ​ໄລຍະ​ສອງ​ສາມ​ເດືອນ​ຂ້າງ​ໜ້ານີ້.

ທ່ານ​ປະ​ນິ​ທານ ວັດ​ທະ​ນະຍາກ​ອນ ນັກ​ລັດ​ຖະ​ສາດ​ທີ່​ຈຸລາ​ລົງ​ກອນ​ມະ​ຫາ​ວິ​ທະຍາໄລ ກ່າວ​ວ່າ ອຸ​ບັດ​ເຫດ​ດັ່ງ​ກ່າວນີ້ ແມ່ນ​ໄດ້​ສ້າງ​ຄວາມ​ກັງ​ວົນ​ເພີ້ມ​ຕື່ມ ກ່ຽວ​ກັບເລື່ອງ​ຄວາມ​ປອດ​ໄພ​ ທາງ​ເຮືອ​ບິນ ​ຢູ່​ໃນ​ປະ​ເທດ​ລາວ.

ທ່ານ Wattanayagorn ເວົ້າວ່າ: “ເລື່ອງ​ຄວາມ​ປອດ​ໄພ​ຂອງ​ເຮືອ​ບິນ​ລາວ​ແມ່ນ​ມີ​ບັນ​ຫາ​ມາ​ໄດ້​ຫລາຍ​ປີ​ແລ້ວ​ແລະ ນີ້​ແມ່ນ​ເປັນ​ການ​ຢືນ​ຢັນ​ໃຫ້​ເຫັນ​ອີກ​ບັນ​ຫາ​ອັນ​ນຶ່ງ ທີ່​ພວກ​ເຂົາ​ເຈົ້າ​ບໍ່​ສາ​ມາດ​ປົວ​ແປງ​ຫລື​ແກ້​ໄຂ​ໄດ້​ເທື່ອ. ເຖິງ​ແມ່ນ​ໃນ​ຮອບ​ສອງ​ປີ​ທີ່​ຜ່ານ​ມານີ້ ເຂົາ​ເຈົ້າ​ໄດ້​ນຳ ເອົາ​ພວກ​ນັກ​ຊ່ຽວ​ຊານ​ຈາກ​ຕ່າງ​ປະ​ເທດ ມາ​ຊ່ວຍ​ອຸດ​ສາ​ຫະ​ກຳ​ການ​ບິນ​ຂອງ ພວກ​ເຂົາ​ເຈົ້າ​ ພ້ອມ​ທັງ​ພວກພະ​ນັກ​ງານ​ກອງ​ທັບ​ອາ​ກາດນຳ​ດ້ວຍ​ກໍ​ຈິງ ແຕ່​ບັນ ຫາ​ກໍ​ຍັງ​ມີ​ຢູ່​.”

ພວກ​ນັກ​ວິ​ເຄາະ​ທີ່​ມີ​ຫ້ອງ​ການ​ຢູ່​ລາວ ກ່າວ​ຕໍ່​ວີ​ໂອ​ເອ​ວ່າ ໂສກ​ນາດ​ຕະ​ກຳ​ນີ້​ແມ່ນ ຂີດ​ໝາຍ
ຂອງ​ຄວາມ​ເສຍ​ຫາຍ​ຮ້າຍ​ແຮງ ​ຕໍ່​ພັກ​ຄອມ​ມູ​ນິ​ສ ​ຫລື​ພັກ​ປ​ະ​ຊາຊົນ​ປະ​ຕິ​ວັດ​ລາວ​ ທີ່​ປົກ​ຄອງ
​ປະ​ເທດ​ຢູ່​ໃນ​ເວ​ລານີ້. ລັດ​ຖະ​ບານ​ລາວ​ ໄດ້​ຫລິ້ນ​ກົນ​ໂຍນ ສັບປ່ຽນມາ​ເປັນ​ເວ​ລາ​ດົນ​ນານ
​ແລ້ວກ່ຽວ​ກັບ​ຄວາມ​ສຳ​ພັນ​ທາງ​ດ້ານ​ການ​ທູດ​ ແລະ ເສດ​ຖະ​ກິດລະ​ຫວ່າງ​ຈີນ​ກັບ​ຫວຽດ​ນາມ.

ທ່ານ Carl Thayer ​ນັກ​ວິ​ເຄາະ​ດ້ານ​ປ້ອງ​ກັນ​ປະ​ເທດ ທີ່​ມະ​ຫາ​ວິ​ທະ​ຍາ​ໄລ​ລັດ New South Wales ຂອງອ​ອ​ສ​ເຕ​ຣ​ເລຍ​ກ່າວ​ວ່າ ຫລັງ​ຈາກ​ເກີດ​ອຸ​ບັດ​ເຫດນີ້ ແລ້ວຄາດ​ວ່າ​ຈະ​ມີ​ການຊັບ​ຊ້ອນ​ຄັ້ງ​ໃຫ​ຍ່ພາຍ​ໃນ​ລັດ​ຖະ​ບານ​ລາວ. ທ່ານ​ເວົ້າ​ວ່າ​ນາຍ ພົນ​ດວງ​ໃຈ ແມ່ນ​ບຸກ​ຄົນ​ທີ່​ມີ​ອິດ​ທິ​ພົນ​ໃນ​ກຳ​ມະ​ການ​ກົມ​ການ​ເມືອງສູນ​ກາງ​ພັກ.

ທ່ານ Thayer ເວົ້າວ່າ: “ນາຍ​ພົນ​ດວງ​ໃຈ​ ແມ່ນ​ນຶ່ງ​ໃນ​ບັນ​ດາ​ຜູ້​ນຳ​ທາງ​ການ​ເມືອງ​ທີ່​ສຳ​ຄັນ​ສຸດ​ຢູ່​ໃນ​ລາວ. ທະ​ຫານ​ແມ່ນ​ມີ​ບົດ​ບາດ​ ທີ່​ມີ​ອິດ​ທິ​ພົນ​ຫລາຍ​ເປັນ​ພິເສດ​ຢູ່​ໃນ​
ປະ​ເທດ ທັງ​ໃນດ້ານ​ທາງ​ການ ແລະ​ໂດຍ​ຜ່ານ​ຕາ​ໜ່າງ​ຂອງ​ພວກ​ນາຍ​ພົນ​ທີ່​ອອກ​ບຳ​ນານ​ແລ້ວ ທີ່​ຢູ່​ໃນ​ລະ​ດັບ​ຕຳ​ແໜ່ງ​ຂັ້ນ​ສູງ​ຂອງ​ພັກ. ບຸກ​ຄົນ​ໃດ​ກໍ​ຕາມ​ທີ່​ໄດ້​ເປັນ​ລັດ​ຖະ​ມົນ​ຕີ ​ກະ​ຊວງປ້ອງ​ກັນ​ປະ​ເທດ ແມ່ນ​ມາ​ຈາກວົງ​ໃນ​ທີ່ແຄບໆ ດັ່ງ​ນັ້ນ​ມັນ​ຈະ​ເປັນ​ນຶ່ງ​ໃນ ບັນ​ດາ​ພວກ​ວົງ​ໃນຮູ້​ດີ ມັນ​ຈະ​ບໍ່​ແມ່ນ​ບຸກ​ຄົນ​ແປກໜ້າ ທີ່​ຈະ​ປ່ຽນ​ແປງ​
ນະ​ໂຍ​ບາຍ​ ຢ່າງ​ຮຸນ​ແຮງນັ້ນ.”


ແຕ່ ​ທ່ານ Thayer ເວົ້າ​ວ່າ ໃນ​ຂະ​ນະ​ທີ່​ການ​ຊັບ​ຊ້ອນ​ຈະ​ມີ​ຂຶ້ນນັ້ນ ທ່ານ​ບໍ່​ໄດ້ ມອ​ງເຫັນ
​ວ່າ ຈະ​ເກີດ​ຄວາມ​ບໍ່​ທຸ່ນ​ທ່ຽງ​ແຕ່​ຢ່າງ​ໃດ ​ຢູ່​ໃນ​ລັດ​ຖະ​ບານ​ຄອມ​ມູ​ນິ​ສ ທີ່ປົກ​ຄອງ​ປະ​ເທດ
​ລາວ​ມາ​ແຕ່​ປີ 1975 ຫລື​ທ່ານ​ກ່າວ​ວ່າ ​ຈະ​ເຮັດ​ໃຫ້​ຄວາມ​ສຳພັນ​ໃນການ​ດຳ​ເນີນ​ງານ​ຢ່າງ​ໃກ້ຊິດ​ ທີ່​ເຄີຍ​ມີ​ມາ​ລະ​ຫວ່າງ​ລາວ ແລະ​ເພື່ອນ ບ້ານ​ຫວຽດ​ນາມ​ ແລະ​ຈີນ ມີ​ທ່າ​ທາງວ່າ​
ຈະ​ປ່ຽນ​ແປງ​ໄປ​ແຕ່​ປະ​ການ​ໃດ​ເລີຍ.


ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG