ທ່ານອ້ວນ ພົມມະຈັກ ເອກອັກຄະລັດຖະທູດລາວປະຈໍາປະເທດໄທ ກ່າວຢືນຢັນຕໍ່ບັນດາ ນັກທຸລະກິດໄທທີ່ເຂົ້າຮ່ວມໃນກອງປະຊຸມສໍາມະນາ ວ່າດ້ວຍໂອກາດທາງດ້ານການລົງທຶນໃນລາວ ເມື່ອບໍ່ນານມານີ້ ຢູ່ບາງກອກປະເທດໄທວ່າ ໃນໄລຍະນັບຈາກປີ 2006 ຈົນເຖິງປີ 2010 ນີ້ ໄດ້ມີການລົງທຶນຂອງຕ່າງປະເທດເຂົ້າໄປລາວ ຈໍານວນທັງໝົດ 761 ໂຄງການ ຄິດເປັນມູນຄ່າການລົງທຶນລວມເຖິງ 1 ໝື່ນລ້ານໂດລາ ໂດຍສ່ວນໃຫຍ່ເປັນ ການລົງທຶນໃນພາກພະລັງງານໄຟຟ້າ ພາກກະສິກໍາ ອຸດສາຫະກໍາແປຮູບໄມ້ ແລະອຸດສາຫະກໍາຂຸດຄົ້ນບໍ່ ແຮ່. ສ່ວນສາເຫດສໍາຄັນປະການນຶ່ງທີ່ເຮັດໃຫ້ບັນດາບໍລິສັດຕ່າງຊາດພາກັນຫລັ່ງໄຫລ ເຂົ້າໄປລົງທຶນໃນລາວ ຫລາຍຂຶ້ນນັບມື້ນັ້ນ ທ່ານອ້ວນ ພົມມະຈັກ ກໍໄດ້ຊີ້ແຈງວ່າ ເປັນຍ້ອນການທີ່ລັດຖະບານລາວໄດ້ໃຫ້ການສົ່ງເສີມ ແລະອໍານວຍຄວາມສະດວກໃນທຸກດ້ານ ຊຶ່ງຈະເຫັນໄດ້ຈາກການດັດແກ້ກົດໝາຍວ່າດ້ວຍການລົງທຶນ ເພື່ອໃຫ້ທັນສະໄໝ ແລະສອດຄ່ອງກັບສະພາບການຢູ່ສະເໜີນັ້ນເອງ.
ສໍາລັບໃນໄລຍະ 5 ປີຕໍ່ໜ້າ ກໍຄືຈາກປີ 2011 ຫາ 2015 ນັ້ນ ລັດຖະບານລາວກໍໄດ້ວາງ ແຜນການທີ່ຈະດຶງເອົາການລົງທຶນຈາກຕ່າງປະເທດໃຫ້ໄດ້ຫລາຍກວ່າໃນໄລຍະ 5 ປີທີ່ຜ່ານມາ ໂດຍສະເພາະແມ່ນການລົງທຶນໃນໂຄງການຂະໜາດໃຫຍ່ ດັ່ງທີ່ທ່ານອ້ວນໄດ້ ຖະແຫລງຊີ້ແຈງວ່າ:
“ໂຄງການໃຫຍ່ ຫລື Mega Projects ສໍາລັບຫ້າປີຕໍ່ໜ້າ ມີຫລາຍກວ່າ 200 ໂຄງການ ຊຶ່ງໃນນີ້ ຂ້າພະເຈົ້າຂໍເວົ້າສະເພາະໂຄງການສໍາຄັນ ກໍຄືໂຄງການສ້າງທາງລົດໄຟ ຈາກນະຄອນວຽງຈັນໄປປະເທດຈີນ ໂຄງການຂະຫຍາຍສາຍສົ່ງກະແສໄຟຟ້າແຮງສູງທົ່ວປະເທດ ໂຄງການສ້າງທາງຫລວງແຫ່ງຊາດ ຂະໜານກັບເສັ້ນທາງເລກ 3 ໂຄງການສ້າງເຂຶ່ອນໄຟຟ້າ 14 ແຫ່ງ ໂຄງການສ້າງທາງດ່ວນໄປຫວຽດນາມ ໂຄງການຂຸດຄົ້ນແຮ່ເຫລັກ ແຮ່ໂປຣເຕສ ແລະແຮ່ບ໊ອກໄຊ້ດ໌ ຊຶ່ງຈະຕ້ອງໃຊ້ທຶນທັງໝົດໃນຫ້າປີຕໍ່ໜ້ານີ້ຫລາຍກວ່າ 40 ຕື້ໂດລາ.”
ຖ້າຫາກວ່າສາມາດປະຕິບັດໄດ້ຈິງກໍຈະເປັນຜົນເຮັດໃຫ້ປະຊາຊົນລາວຫລຸດພົ້ນຈາກຄວາມຍາກຈົນໄດ້ໃນ ລະດັບພື້ນຖານ ແລະສໍາລັບໃນໄລຍະແຜນການພັດທະນາທາງເສດຖະກິດແລະສັງຄົມແຫ່ງຊາດປະຈໍາປີ 2010-2011 ນີ້ ລັດຖະບານລາວກໍໄດ້ວາງເປົ້າໝາຍທີ່ຈະເຮັດໃຫ້ຍອດຜະລິດພັນລວມພາຍໃນປະເທດ ຫລື GDP ຄິດສະເລ່ຍເປັນລາຍຮັບຂອງປະຊາກອນລາວໄດ້ເຖິງ 9.6 ລ້ານກີບ ຫລືປະມານ 1,130 ໂດລາຕໍ່ຄົນ ຕໍ່ປີ. ສ່ວນການທີ່ຈະເຮັດໃຫ້ເປົ້າໝາຍດັ່ງກ່າວສາມາດເກີດຂຶ້ນໄດ້ຢ່າງແທ້ຈິງນັ້ນ ກໍມີຄວາມຈໍາເປັນທີ່ຈະຕ້ອງຊຸກຍູ້ໃຫ້ການຜະລິດໃນພາກກະສິກໍາ-ປ່າໄມ້ ມີການຂະຫຍາຍຕົວເພີ່ມຂຶ້ນບໍ່ໜ້ອຍ ກວ່າ 3.5% ແລະພາກບໍລິການກໍຈະຕ້ອງຂະຫຍາຍຕົວບໍ່ຕໍ່າກວ່າ 6.7% ສ່ວນພາກອຸດ ສາຫະກໍານັ້ນກໍຈະຕ້ອງຂະຫຍາຍຕົວເຖິງ 17.3%. ສໍາລັບໃນດ້ານງົບປະມານລາຍຮັບ-ລາຍຈ່າຍນັ້ນ ລັດຖະບານລາວກໍຈະສູ້ຊົນເພື່ອເຮັດໃຫ້ສາມາດຈັດເກັບລາຍຮັບໃຫ້ໄດ້ບໍ່ໜ້ອຍກວ່າ 20.8% ຂອງມູນຄ່າ GDP ໃນຂະນະດຽວກັນ ກໍຈະຄວບຄຸມລາຍຈ່າຍໃຫ້ບໍ່ເກີນລະດັບ 24.29% ຂອງມູນຄ່າ GDP ຊຶ່ງກໍຈະເຮັດໃຫ້ລັດຖະບານລາວຂາດດຸນທາງດ້ານງົບປະມານໃນລະດັບບໍ່ເກີນ 3.49% ຂອງມູນຄ່າ GDP ແລະຖ້າຫາກວ່າການດໍາເນີນງານເປັນໄປຕາມແຜນການທີ່ວາງໄວ້ດັ່ງກ່າວ ກໍຍັງຈະເຮັດໃຫ້ປະຊາກອນລາວທີ່ຍາກຈົນເຫລືອຢູ່ບໍ່ເກີນ 19% ຂອງຈໍານວນຄົວເຮືອນທັງໝົດໃນລາວອີກດ້ວຍ.
ແຕ່ຢ່າງໃດກໍຕາມ ທ່ານບົວສອນ ບຸບຜາວັນ ນາຍົກລັດຖະ ມົນຕີລາວກໍໄດ້ຍອມຮັບກ່ອນໜ້ານີ້ວ່າ ການທີ່ຈະສາມາດ ບັນລຸເປົ້າໝາຍດ່ັງກ່າວໄດ້ນັ້ນ ກໍບໍ່ແມ່ນເລຶ່ອງງ່າຍເນຶ່ອງ ຈາກວ່າລັດຖະບານລາວນັ້ນ ຍັງຈະຕ້ອງປະເຊີນກັບບັນຫາ ແລະອຸບປະສັກໃນຫລາຍໆດ້ານ ເປັນຕົ້ນແມ່ນການຄຸ້ມຄອງເສດຖະກິດມະຫະພາກ ການເງິນ ການທະນາຄານ ການຄ້າ ລາຄາ ແລະດ້ານອື່ນໆທີ່ຈະເຮັດໃຫ້ເກີດສະພາບປັ່ນປ່ວນຂຶ້ນໄດ້ຖ້າຫາກວ່າມີການປ່ອຍ ປະລະເລີຍ ຫລືວ່າບໍ່ມີການຊີ້ນໍາຢ່າງໄກ້ຊິດ ຫລືບໍ່ມີການປະສານງານກັນຢ່າງເປັນເອກກະ ພາບກັນ. ສຳລັບໃນໄລຍະແຜນການປີ 2009-2010 ທີ່ກໍາລັງຈະສິ້ນສຸດແຜນການລົງໃນທ້າຍເດືອນກັນຍານີ້ ລັດຖະບານລາວກໍເຊື່ອໝັ້ນວ່າ GDP ຈະຂະຫຍາຍຕົວໃນອັດຕາສະເລ່ຍບໍ່ຕໍ່າກວ່າ 7.8% ຊຶ່ງກໍຈະເຮັດໃຫ້ GDP ຂອງລາວ ມີມູນຄ່າລວມເຖິງ 54,225 ຕື້ກີບ ຫລືປະມານ 6,450 ລ້ານໂດລາຕາມອັດຕາແລກປ່ຽນໃນປັດຈຸບັນ.
ພາກການຜະລິດທີ່ມີການຂະຫຍາຍຕົວເພີ່ມຂຶ້ນຫລາຍທີ່ສຸດນັ້ນ ກໍຄືພາກອຸດສາຫະກໍາ ທີ່ຂະຫຍາຍຕົວເຖິງ 17% ຕິດຕາມດ້ວຍພາກບໍລິການ ທີ່ຂະຫຍາຍຕົວບໍ່ໜ້ອຍກວ່າ 6.7% ແລະພາກກະສິກໍາ-ປ່າໄມ້ ກໍຈະ ຂະຫຍາຍຕົວບໍ່ເກີນ 3.2% ຕາມລໍາດັບ.
