ໃນຂະນະທີ່ຫຼາຍພາກສ່ວນໄດ້ສະແດງຄວາມກັງວົນໃຈວ່າຈະໄດ້ຮັບຜົນກະທົບຢ່າງໜັກຈາກ
ໂຄງການເຊື່ອມຕໍ່ທາງລົດໄຟຄວາມໄວສູງລະຫວ່າງລາວກັບຈີນ ໂດຍສະເພາະແມ່ນພາກ
ສ່ວນທີ່ດຳເນີນທຸລະກິດຂົນສົ່ງສິນຄ້າ ແລະໂດຍສານທັງທາງບົກ ແລະທາງອາກາດຈາກ
ເຂດແຂວງພາກເໜືອຂອງລາວມາຍັງນະຄອນວຽງຈັນນັ້ນ ທ່ານ ສົມສະຫວາດ ເລັ່ງສະຫວັດ
ຮອງນາຍົກລັດຖະມົນຕີ, ຜູ້ປະຈໍາການຄະນະລັດຖະບານລາວກໍໄດ້ຖະແຫຼງຢືນຢັນວ່າ ໂຄງ
ການເຊື່ອມຕໍ່ທາງລົດໄຟຄວາມໄວສູງລະຫວ່າງລາວກັບຈີນດັ່ງກ່າວນີ້ ຈະສົ່ງຜົນດີຕໍ່ການພັດ
ທະນາເສດຖະກິດຂອງລາວຫຼາຍກວ່າການສົ່ງຜົນກະທົບດ້ານລົບ.
ທັງນີ້ກໍ່ເນື່ອງຈາກວ່າ ໂຄງການເຊື່ອມຕໍ່ທາງລົດໄຟຄວາມໄວສູງກັບຈີນດັ່ງກ່າວນີ້ ບໍ່ພຽງ
ແຕ່ຈະເປັນການຕອບສະໜອງຕໍ່ແຜນການພັດທະນາໃຫ້ລາວໄປເປັນສູນກາງຂອງການ
ເຊື່ອມຕໍ່ທາງດ້ານຄົມມະນາຄົມ-ຂົນສົ່ງໃນເຂດລຸ່ມແມ່ນໍ້າຂອງເທົ່ານັ້ນ ຫາກແຕ່ຍັງຈະເຮັດ
ໃຫ້ລາວເປັນປະເທດທໍາອິດໃນພູມີພາກເອເຊຍຕະເວັນອອກສຽງໃຕ້ ທີ່ມີລະບົບລົດໄຟ
ຄວາມໄວສູງທໍາອິດດ້ວຍ ດັ່ງທີ່ທ່ານ ສົມສະຫວາດ ໄດ້ກ່າວວ່າ:
“ໂຄງການສ້າງທາງລົດໄຟເຊື່ອມຕໍ່ລາວ
-ຈີນນີ້ ເປັນເສັ້ນທາງທີ່ມີຄວາມໝາຍປະ
ວັດສາດອັນຈະນໍາເອົາຜົນປະໂຫຍດມາ
ສູ່ປະເທດເຮົາຢ່າງມະຫາສານ. ພ້ອມກັນ
ນັ້ນກະເປັນການເຮັດໃຫ້ປະເທດລາວ
ເປັນໃຈກາງເຊື່ອມຕໍ່ກັບບັນດາປະເທດ
ໃນອະນຸພາກພື້ນປະກົດເປັນຈິງ, ດ້ານ
ນຶ່ງອີກກະເປັນການຍົກສູງບົດບາດອິດ
ທິພົນຂອງປະເທດເຮົາ ເພາະວ່າປະເທດ
ເຮົາຈະເປັນປະເທດທໍາອິດຢູ່ໃນເອເຊຍ
ອາຄະເນ ທີ່ມີລົດໄຟຄວາມໄວສູງຕາມ
ມາດຕະຖານສາກົນ”
ກ່ອນໜ້ານີ້ທ່ານ ສົມສະຫວາດ ໄດ້ຖະແຫຼງຊີ້ແຈງວ່າທາງການລາວ ແລະຈີນໄດ້ຕົກລົງໃນ
ບົດບັນທຶກຄວາມເຂົ້າໃຈຮ່ວມກັນຢ່າງຈະແຈ້ງແລ້ວວ່າ ຈະຮ່ວມກັນຈັດຕັ້ງບໍລິສັດຮ່ວມທຶນຂຶ້ນ
ມາ ເພື່ອຮັບຜິດຊອບໃນການກໍ່ສ້າງທາງລົດໄຟຄວາມໄວສູງທີ່ເຊື່ອມຕໍ່ຈາກຈີນມາຍັງລາວ
ໂດຍລັດຖະບານລາວຈະຖືຫຸ້ນລົງທຶນໃນສັດສ່ວນ 30% ໃນຂະນະທີ່ລັດຖະບານຈີນຈະຖື
ຫຸ້ນໃນສັດສ່ວນ 70% ຂອງມູນຄ່າການລົງທຶນທັງໝົດ.
ທ່ານສົມສະຫວາດ ຍັງໄດ້ໃຫ້ການຢືນຢັນດ້ວຍວ່າການກໍ່ສ້າງທາງລົດໄຟສະເພາະໃນເຂດ
ລາວຈະເລີ່ມລົງມືໃນພາກຕົວຈິງນັບຈາກເດືອນເມສາ 2011 ເປັນຕົ້ນໄປ ແລະຖ້າຫາກວ່າ ການດໍາເນີນງານເປັນໄປຕາມແຜນການທີ່ວາງໄວ້ ກໍ່ຄາດວ່າການກໍ່ສ້າງທາງລົດໄຟສະເພາະ
ໃນເຂດລາວ ທີ່ມີໄລຍະທາງຍາວເຖິງ 421 ກິໂລແມັດນັ້ນ ຈະແລ້ວສໍາເລັດຕະຫຼອດເສັ້ນ
ທາງ ພາຍໃນປີ 2015 ຊຶ່ງເປັນໂອກາດຄົບຮອບ 40 ປີ ຂອງການສະຖາປະນາສາທາລະ
ນະລັດປະຊາທິປະໄຕປະຊາຊົນລາວ ພໍດີ.
ອິງຕາມແຜນການກໍ່ສ້າງທາງລົດໄຟຄວາມໄວສູງສະເພາະໃນເຂດລາວ ທີ່ເຊື່ອມຕໍ່ຈາກຈີນ
ທີ່ຢູ່ດ່ານຊາຍແດນບໍ່ເຕັນໃນແຂວງຫຼວງນໍ້າທານັ້ນ ຈະມີການກໍ່ສ້າງສະຖານີໃຫຍ່ 5 ແຫ່ງ
ກໍຄືຢູ່ທີ່ດ່ານບໍ່ເຕັນ, ອຸດົມໄຊ, ຫຼວງພະບາງ, ວັງວຽງ ແລະນະຄອນວຽງຈັນ. ນອກຈາກນັ້ນ
ກໍ່ຈະມີສະຖານີນ້ອຍອີກ 16 ແຫ່ງ ທີ່ຢູ່ລະຫວ່າງສະຖານີໃຫຍ່ທັງ 5 ແຫ່ງດັ່ງກ່າວ.
ແຕ່ຢ່າງໃດກໍຕາມ ເນື່ອງຈາກວ່າການກໍ່ສ້າງທາງລົດໄຟສ່ວນ
ໃຫຍ່ໃນລາວນັ້ນ ຈະຕ້ອງຜ່ານເຂດພູຄອຍ ຊຶ່ງເຮັດໃຫ້ຕ້ອງ
ມີການຂຸດເຈາະອຸບມູງ ຄິດເປັນໄລຍະທາງລວມເຖິງ 190
ກິໂລແມັດ ແລະຍັງຈະຕ້ອງກໍ່ສ້າງຂົວອີກຫຼາຍແຫ່ງທີ່ມີ
ຄວາມຍາວຮວມກັນເຖິງ 90 ກິໂລແມັດອີກດ້ວຍນັ້ນ ຈຶ່ງ
ເຮັດໃຫ້ຄາດໝາຍວ່າ ການກໍ່ສ້າງທາງລົດໄຟຄວາມໄວສູງ
ສະເພາະໃນເຂດລາວນີ້ຈະຕ້ອງໃຊ້ເງິນລົງທຶນເຖິງ 7,000
ລ້ານໂດລາ ຊຶ່ງກໍ່ຄືທາງການລາວຈະຕ້ອງຮ່ວມລົງທຶນອີກ
ດ້ວຍ ຄິດເປັນມູນຄ່າເຖິງ 2,100 ລ້ານໂດລາ ແລະກໍເຊື່ອ ວ່າ ທາງການລາວຈະໄດ້ມາຈາກການກູ້ຢືມຈາກທາງການຈີນ ນັ້ນເອງ.
ຫຼ້າສຸດກໍມີລາຍງານວ່າ ທາງການຈີນໄດ້ເລີ້ມລົງມືກໍ່ສ້າງທາງລົດໄຟຕາມໂຄງການເຊື່ອມຕໍ່
ທາງລົດໄຟກັບລາວ ນັບແຕ່ທ້າຍເດືອນຕຸລາມາແລ້ວ ໂດຍເປັນການເລີ້ມການກໍ່ສ້າງຈາກ ເຂດສິບສອງພັນນາໃນມົນທົນຢູນານ ເພື່ອຕໍ່ມາຍັງຊາຍແດນລາວທີ່ບໍ່ເຕັນ ໃນແຂວງຫຼວງ
ນໍ້າທາ.
