ລິ້ງ ສຳຫລັບເຂົ້າຫາ

ສະຫະພັນ​ແມ່ຍິງ​ລາວ ​ຈະເປັນເຈົ້າພາບ​ ກອງ​ປະຊຸມ ​ລັດຖະມົນຕີ​ຍິງ ​ຂອງອາຊ່ຽນ

  • ຊົງຣິດ ໂພນເງິນ

ທ່ານ​ນາງ ສີ​ໃສ ລື​ເດດ​ມູນ​ສອນ ປະທານ​ສູນ​ກາງ​ ສະຫະພັນ ​ແມ່ຍິງ​ລາວ

ສະຫະພັນ​ແມ່ຍິງ​ລາວ ​ຈະ​ຈັດ​ກອງ​ປະຊຸມ​ລະດັບ​ລັດຖະມົນຕີ
​ເພດ​ຍິງ​ຂອງອາຊ່ຽນ ​ຄັ້ງ​ທີ 1 ພາຍ​ໃຕ້ເປົ້າໝາຍ​ທີ່​ຈະເສີມ​
ສ້າງ​ຄວາມ​ສະ​ເໝີ​ພາກ​ລະຫວ່າງ​ຍິງ-ຊາຍ ​ໃນ​ສັງຄົມ​ແລະ​
ການ​ເມືອງ.

ທ່ານ​ນາງ ສີ​ໃສ ລື​ເດດ​ມູນ​ສອນ ປະທານ​ສູນ​ກາງ​ສະຫະພັນ
​ແມ່ຍິງ​ລາວຖະ​ແຫຼ​ງວ່າ ​ສະຫະພັນ​ແມ່ຍິງ​ລາວ​ໄດ້​ຕຽມ​ຄວາມ
​ພ້ອມ​ທີ່​ຈະ​ເປັນ​ເຈົ້າພາບ​ຈັດ​ກອງ​ປະຊຸມ ​ລະດັບ​ນາໆ​ຊາດ​ເຖິງ
​3 ວາລະ​ດ້ວຍ​ກັນ ​ໃນ​ລະຫວ່າງ​ວັນ​ທີ່ 16-19 ​ເດືອນຕຸລາ​ ປີ
2012 ນີ້ ຢູ່​ນະຄອນ​ວຽງ​ຈັນ ຊຶ່ງ​ປະກອບ​ດ້ວຍ​ກອງ​ປະຊຸມ​ລະ
ດັບ​ລັດຖະມົນຕີ​ເພດຍິງຂອງ​ອາ​ຊ່ຽນ​ຄັ້ງ​ທີ່ 1 ຕິດຕາມ​ດ້ວຍ​ກອງ​
ປະຊຸມ​ຄະນະ​ກໍາມາ​ທິການ​ແມ່ຍິງ​ຂອງອາ​ຊ່ຽນ​ ຄັ້ງ​ທີ 11 ​ແລະ
​ກອງ​ປະຊຸມ​ຄະນະ​ກໍ​າມາ​ທິການ​ແມ່ຍິງ​ອາ​ຊ່ຽນ​ ຮ່ວມ​ກັບ​ຈີນ ​
ເກົາຫຼີ​ໃຕ້ ​ແລະ​ຍີ່ປຸ່ນ​ຄັ້ງທີ 4 ຕາມ​ລໍາດັບ.

ທັງ​ນີ້ ​ໂດຍ​ເປົ້າໝາຍ​ສໍາຄັນ​ຂອງ​ທັງ 3 ກອງ​ປະຊຸມ​ດັ່ງກ່າວ ​ກໍ​ເພື່ອ​ເປັນ​ການ​ເສີມສ້າງ​ຄວາມ​ສະ​ເໝີ​ພາບ ​ລະຫວ່າງ​ຍິງ-ຊາຍ​ທັງ​ໃນ​ລາວ​ແລະ​ອາ​ຊ່ຽນ​ໃຫ້​ເກີດ​ຂຶ້ນ ຢ່າງ​ເປັນ​ຮູບ​ປະ​ທໍາ ​ໂດຍ​ສະ​ເພາະ​ແມ່ນ​ການ​ເຮັດ​ໃຫ້​ແມ່ຍິງ​ມີ​ສິດທິ​ສະ​ເໝີ​ພາກ​ ແລະ​ເທົ່າ​ທຽມ​ກັບ​ຜູ້​ຊາຍ ດັ່ງ​ທີ່​ທ່ານ​ນາງ​ສີ​ໃສ ​ໄດ້​ຖະ​ແຫຼ​ງຢືນຢັນວ່າ:

“ສໍາລັບ​ກອງ​ປະຊຸມ​ລັດຖະມົນຕີ​ແມ່ຍິງ​ອາ​ຊ່ຽນ​ຄັ້ງ​ທີ່ 1 ຈະ​ໄດ້​ມີ​ໂອກາດ​ພົບ​ປະ ປຶກສາ​ຫາລື​ແລກປ່ຽນ​ຄວາມ​ຄິດ​ຄວາມ​ເຫັນ​ບັນຫາ​ສໍາຄັນ​ທີ່​ພົວພັນ​ເຖິງ​ການ​ພັດທະ ນາ ການ​ປົກ​ປ້ອງ​ສິດທິ ຜົນ​ປະ​ໂຫຍ​ດ​ແລະ​ການ​ສົ່ງ​ເສີມ​ຄວາມ​ສະ​ເໝີ​ພາກ​ລະຫວ່າງ​ຍິງ-ຊາຍ ກໍ​ຄື​ຄວາມ​ກ້າວ​ໜ້າ​ຂອງ​ແມ່ຍິງ​ໃນ​ພາກ​ພື້ນ​ອາ​ຊ່ຽນ.”

ກໍາມະກອນຍິງໃນໂຮງງານຕັດຫຍິບແຫ່ງນຶ່ງໃນເຂດນະຄອນຫລວງວຽງຈັນ

ກໍາມະກອນຍິງໃນໂຮງງານຕັດຫຍິບແຫ່ງນຶ່ງໃນເຂດນະຄອນຫລວງວຽງຈັນ


ເພື່ອ​ເຮັດ​ໃຫ້​ສາມາດ​ບັນລຸ​ເປົ້າໝາຍ​ດັ່ງກ່າວໃຫ້​ໄດ້​ຢ່າງ​ແທ້​ຈິງ​
ນັ້ນ ສະຫະພັນ​ແມ່ຍິງ​ລາວ ກໍ​ໄດ້​ວາງ​ແຜນການ​ຈັດ​ຕັ້ງ​ປະຕິບັດ
6 ​ແຜນ​ງານ 32 ​ໂຄງການ ​ເພື່ອ​ການ​ພັດທະນາ​ບົດບາດ​ແມ່ຍິງ​
ລາວ ຊຶ່ງ​ໄດ້​ເລີ່​ມລົງມື​ປະຕິບັດ​ນັບຈາກ​ປີ 2011 ​ເປັນ​ຕົ້ນ​ມາ​ແລ້ວ
​ແລະ​ກໍ​ຍັງ​ຈະ​ຈັດ​ຕັ້ງ​ປະຕິບັດ​ຕໍ່​ໄປ​ຈົນ​ເຖິງປີ 2015.

ທ່ານ​ນາງ ສີ​ໃສ ຍັງ​ໄດ້​ຖະ​ແຫຼ​ງຢືນ​ຢັນ​ດ້ວຍ​ວ່າ ​ໃນ​ປັດຈຸບັນ​ນີ້ ​
ແມ່ຍິງ​ລາວ​ມີ​ບົດບາດ​ຫຼາຍ​ຂຶ້ນ​ໃນ​ທຸກໆ​ດ້ານ ກໍ​ຄື​ບົດບາດ​ໃນ
​ດ້ານ​ເສດ​ຖະກິດ ການ​ເມືອງ ​ແລະ​ສັງ ຄົມ​ວັດທະນະ​ທໍາ ຊຶ່ງ​ລວມ​ເຖິງ​ບົດບາດ​ໃນ​ດ້ານ​ການ​ຕ່າງປະ​ເທດ​ດ້ວຍ.

​ສໍາລັບ​ໃນ​ດ້ານ​ເສດຖະກິດ​ນັ້ນ ​ແມ່ຍິງ​ລາວ​ກໍ​ໄດ້​ປະກອບສ່ວນ​ເຂົ້າ​ໃນ​ການ​ຜະລິດ​ສິນຄ້າ ​ແລະ​ປະກອບສ່ວນ​ເປັນ​ແຮງ​ງານ​ໃນ​ການ​ຜະລິດ​ຕ່າງໆ​ຄິດ​ເປັນ​ສັດ ສ່ວນ​ເຖິງ 52% ຂອງ​ກໍາລັງ​ແຮງ​ງານ​ທັງ​ໝົດ​ໃນ​ລາວ ສ່ວນ​ບົດບາດ​ໃນ​ທາງ ການ​ເມືອງ​ນັ້ນ ກໍ​ປາກົດ​ວ່າ​ມີ​ແມ່ຍິງ​ລາວ 29 ຄົນ ທີ່​ໄດ້​ຮັບ​ການ​ເລືອກຕັ້ງ​ໃນ​ເປັນ ສະມາຊິກ​ສະພາ​ແຫ່ງ​ຊາດ​ລາວ​ຊຸດ​ທີ່ 7 ຫຼື​ຄິດ​ເປັນ 25% ຂອງ​ຈໍານວນ​ສະມາຊິກ ທັງ​ໝົດ 115 ຄົນ.
ທ່ານນາງປານີ ຢາທໍຕູ້ ປະທານສະພາແຫ່ງຊາດລາວຈັບມືກັບ ປະທານປະເທດຫວຽດນາມ ໃນຂະນະທີ່ທ່ານເດີນທາງມາຢ້ຽມຢາມລາວ ໃນເດືອນກຸມພາ 2012

ທ່ານນາງປານີ ຢາທໍຕູ້ ປະທານສະພາແຫ່ງຊາດລາວຈັບມືກັບ ປະທານປະເທດຫວຽດນາມ ໃນຂະນະທີ່ທ່ານເດີນທາງມາຢ້ຽມຢາມລາວ ໃນເດືອນກຸມພາ 2012


ຍິ່ງ​ໄປ​ກວ່າ​ນັ້ນ ປະທານ​ສະພາ​ແຫ່ງ​ຊາດ​ລາວ​ຄົນ​ປັດ​ຈຸ​ບັນ​ກໍ​ເປັນ​ແມ່ຍິງ ທັງ​ຍັງເປັນ​ແມ່ ຍິງ​ຄົນ​ທໍາ​ອິດ ​ທີ່​ໄດ້​ເປັນ​ກໍາມະການ​ກົມ​ການ​ເມືອງ​ສູນ​ກາງ​ພັກ​ປະຊາຊົນ ປະຕິວັດ​ລາວ​ອີກ​ດ້ວຍ.

ນອກ​ນີ້​ນີ້ ກໍ​ຍັງ​ມີ​ແມ່​ຍິງ​ລາວ​ອີກ​ຈໍານວນ​ບໍ່​ໜ້ອຍ​ທີ່​ເປັນ​ກໍ​າມະ​ການ​ສູນ​ກາງ​ພັກ ລັດຖະມົນຕີ​ວ່າການ ລັດຖະມົນຕີ​ຊ່ວຍ​ວ່າການ ຫົວໜ້າ​ກົມ​ ຮອງ​ເຈົ້າ​ແຂວງ ​ເຈົ້າ​ເມືອງ ຮອງ​ເຈົ້າ​ເມືອງ ​ແລະ​ນາຍບ້ານ​ໃນ​ທົ່ວ​ປະ​ເທດ​ ​ໂດຍ​ເຖິງ​ແມ່ນ​ວ່າ​ຈະ​ຍັງ​ຄົງ​ຄິດ​ເປັນ​ສັດສ່ວນ​ທີ່​ຕໍ່າ​ກວ່າ​ຜູ້​ຊາຍ​ກໍ​ຕາມ ຫາກ​ແຕ່​ສະຫະພັນ​ແມ່ຍິງ​ລາວ​ກໍ​ເຊື່ອວ່າ​ສະຖານະ​ການຈະ​ດີ​ຂຶ້ນ​ໃນ​ໄລຍະ​ຕໍ່​ໄປ.

​ແຕ່​ຢ່າງ​ໃດ​ກໍ​ຕາມ ສໍາລັບ​ໃນ​ດ້ານ​ການ​ສຶກສາ​ນັ້ນ ສະຫະພັນ​ແມ່ຍິງ​ລາວ​ກໍ​ຍອມຮັບ​ວ່າ​ໂອກາດ​ທາງ​ດ້ານ​ການ​ສຶກສາ​ຂອງ​ແມ່ຍິງ​ກໍ​ຍັງ​ຕໍ່າ​ກວ່າ​ຜູ້​ຊາຍ ທັງ​ນີ້​ໂດຍ​ອິງ ຕາມ​ລາຍ​ງານ​ຂອງ​ກະຊວງ​ສຶກສາ​ທິການ ​ແລະ​ກິລາ ກໍ​ໄດ້​ລະບຸ​ຢ່າງ​ແຈ້ງ​ຂາວ​ວ່າ ​ໃນ​ຂະນະ​ທີ່​ຜູ້​ຊາຍ​ມີ​ໂອກາດ​ໄດ້​ຮຽນ​ໜັງສື​ຈົນ​ຈົບ​ຊັ້ນ​ປະຖົມ​ໃນ​ສັດສ່ວນ​ເຖິງ 83% ກັບ​ປາກົດ​ວ່າ​ມີ​ແມ່ຍິງ​ຄິດ​ເປັນ​ສັດສ່ວນ​ພຽງ​ແຕ່ 63% ​ເທົ່າ​ນັ້ນ ທີ່​ມີ​ໂອກາດ​ຮຽນ​ຈົບ​ຊັ້ນ​ປະຖົມ.

ຍິ່ງ​ໄປ​ກວ່າ​ນັ້ນ ດ້ວຍ​ໂອກາດ​ທາງ​ດ້ານ​ການ​ສຶກສາ​ທີ່​ຕໍ່າ​ກວ່າ​ເພດ​ຊາຍ​ດັ່ງກ່າວ ກໍຍັງ​ເຮັດ​ໃຫ້​ແມ່ຍິງ​ໃນ​ລາວ​ມີໂອກ​າດທີ່​ຈະ​ໄດ້​ວຽກ​ເຮັດ​ງານ​ທໍາ​ໃນ​ລະດັບ​ທີ່​ຕໍ່າ​ກວ່າ​ ​ເພດ​ຊາຍ​ນໍາ​ອີກ. ​ແລະ​ເມື່ອ​ປະກອບ​ກັບ​ການ​ທີ່ຢູ່​ໃນ​ປະ​ເທດ​ລາວ​ກໍ​ມີ​ຕໍາ​ແໜ່​ງ ງານ​ຢູ່​ຢ່າງ​ຈໍາ​ກັດ ທັງ​ຍັງ​ມີ​ອັດຕາ​ຄ່າ​ຈ້າງ​ຕໍ່າ​ຫຼາຍ ກໍ​ໄດ້​ກາຍ​ເປັນ​ປັດ​ໃຈ​ທີ່​ເຮັດ​ໃຫ້ ​ແມ່ຍິງ​ລາວ​ພາກັນ​ເດີນທາງ​ເຂົ້າ​ໄປ​ລັກລອບ​ທໍາ​ງານ​ຢ່າງ​ບໍ່​ຖືກຕ້ອງ​ຕາມ​ກົດໝາຍ​ຢູ່ ​ໃນ​ໄທ​ຫຼາຍ​ຂຶ້ນນັບ​ມື້.

​ອິງ​ຕາມ​ລາຍ​ງານ​ຂອງ​ເຄືອ​ຂ່າຍ​ຄຸ້ມ​ຄອງ​ແຮງ​ງານ​ຕ່າງ​ດ້າວຢູ່​ໃນ​ໄທ ກໍ​ໄດ້​ປະມານ​ການ​ວ່າ
​ມີ​ແຮງ​ງານ​ລາວຫຼາຍ​ກວ່າ 4 ​ແສນ​ຄົນ​ທີ່​ລັກລອບ​ທໍາ​ງານ​ຢູ່​ໃນ​ໄທ​ແລະຫຼາຍ​ກວ່າ 60% ​ໃນ​ຈໍານວນ​ດັ່ງກ່າວ ກໍ​ຄື​ແຮງ​ງານ​ລາວ​ເພດ​ຍິງ ທີ່​ສຸ່ມ​ສ່ຽງຕໍ່​ການ​ຕົກ​ໄປ​ເປັນ​ເຫຍື່ອຂອງ​ການ​ຄ້າ​ມະນຸດ​ໃນ​ໄທ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG