ລິ້ງ ສຳຫລັບເຂົ້າຫາ

ຂົວມິດຕະພາບ ລາວ-ໄທ ແຫ່ງທີ 3 ໄດ້ເປີດນໍາໃຊ້ແລ້ວ

  • ຊົງຣິດ ໂພນເງິນ

ສໍານັກງານຕໍາຫລວດກວດຄົນເຂົ້າເມືອງທີ່ຝັ່ງໄທ ປະຈໍາຂົວຂ້າມ ແມ່ນໍ້າຂອງແຫ່ງທີ 3 ລະຫວ່າງລາວ-ໄທ ທີ່ໄດ້ເລີ້ມເປີດບໍລິການ ນັບ ແຕ່ວັນທີ 11 ເດືອນພະຈິກ 2011 ເປັນຕົ້ນໄປ

ທາງ​ການ​ລາວ-​ໄທ ​​ໄດ້ຮ່ວມກັນເປີດຂົວ​ຂ້າມ​ແມ່​ນໍ້າຂອງ ​ແຫ່ງ​ທີ 3 ​ທີ່ເຊື່ອມ​ຕໍ່ລະຫວ່າງ​ແຂວງ​ ຄໍາ​ມ່ວນ​ກັບ​ຈັງຫວັດ​ນະ​ຄອນ​ພະນົມ ຢ່າງ​ເປັນ​ທາງ​ການ​ແລ້ວ ​ໃນ​ວັນ​ສຸກ ທີ 11 ພະຈິກ ມື້ນີ້.

ພິທີ​ເປີດ​ການ​ນໍາ​ໃຊ້ຂົວ​ມິດຕະພາບ ຂ້າມ​ແມ່​ນໍ້າຂອງ​ແຫ່ງ​ທີ​ 3 ເຊື່ອມ​ຕໍ່ລະຫວ່າງ​ເມືອງ​ທ່າ​ແຂກ ​ແຂວງ​ຄໍາ​ມ່ວນຂອງ​ລາວ ​ໃສ່​ກັບ​ຈັງຫວັດ​ນະຄອນ​ພະນົມ ​ໃນ​ພາກ​ອີສານ​ຂອງ​ໄທ ​ໄດ້​ມີ​ຂຶ້ນຢ່າງ​ເປັນ​ທາງ​ການ ​ໃນ​ຕອນ​ເຊົ້າຂອງ​ວັນ​ສຸກ ທີ 11 ພະຈິກ 2011 ນີ້ ຢູ່​ທີ່​ບໍລິ​ເວນ​ເຄິ່ງກາງຂອງ​ຕົວ​ຂົວ ​ໂດຍ​ມີ​ສົມ​ເດັດ​ພະ​ເທບ ຣາຊສຸດ​າ ສະ​ຢາມ​ບໍຣົມຣາຊກຸມມາຣີ ພ້ອມ​ດ້ວຍ ທ່ານ​ບຸນ​ຍັງ ວໍລະ​ຈິດ ຮອງປະທານ​ປະ​ເທດ​ລາວ ​ໄດ້​ເປັນ​ປະທານຮ່ວມ ກັນ​ໃນ​ພິທີ ​ແລະ​ມີນາ​ຍົກ​ລັດຖະມົນຕີຂອງ​ທັງ​ສອງ​ປະ​ເທດ ທີ່​ໄດ້​ກ່າວ​ລາຍ​ງານ ​ເຖິງ​ວັດຖຸ​ປະສົງ ​ແລະ​ເປົ້າໝາຍຂອງ​ການກໍ່ສ້າງ ຂົວ​ຂ້າມ​ນໍ້າຂອງ​ດັ່ງກ່າວ.

ຂົວ​ຂ້າມ​ແມ່​ນໍ້າຂອງ​ລະຫວ່າງ​ລາວ-​ໄທ​ແຫ່ງ​ທີ 3​ ດັ່ງກ່າວນີ້ ຖື​ເປັນ​ພາກສ່ວນ​ນຶ່ງຂອງ​ການຮ່ວມມືທາງ​ເສດຖະກິດ ​ລະ​ຫວ່າງ ປະ​ເທດຕ່າງໆ ​ໃນ​ເຂດ​ລຸ່ມ​ແມ່​ນໍ້າ​ອິຣະວະ​ດີ-​ແມ່​ນໍ້າ​ເຈົ້າພະຍາ-​ແມ່​ນໍ້າຂອງ ທີ່​ເອີ້ນກັນ​ວ່າ ACMECS ນັ້ນ​ເອງ. ດັ່ງ​ທີ່​ທ່ານນາງ​ຍິ່ງ​ລັກ ຊິ​ນນະ​ວັດ ນາຍົກລັດຖະມົນຕີ​ໄທ ​ໄດ້​ຖະ​ແຫລ​ງວ່າ:

ຂົວຂ້າມແມ່ນໍ້າຂອງແຫ່ງທີ 3 ເຊື່ອມຕໍ່ລະຫວ່າງ ແຂວງຄໍາມ່ວນ ກັບຈັງຫວັດນະຄອນພະນົມ ທີ່ໄດ້ ເປີດໃຊ້ຢ່າງເປັນທາງການແລ້ວ ໃນວັນສຸກ ທີ 11 ພະຈິກ 2011.
ຂົວຂ້າມແມ່ນໍ້າຂອງແຫ່ງທີ 3 ເຊື່ອມຕໍ່ລະຫວ່າງ ແຂວງຄໍາມ່ວນ ກັບຈັງຫວັດນະຄອນພະນົມ ທີ່ໄດ້ ເປີດໃຊ້ຢ່າງເປັນທາງການແລ້ວ ໃນວັນສຸກ ທີ 11 ພະຈິກ 2011.

“ຣາຊອານາຈັກ​ໄທ ​ແລະ​
ສາທາລະນະ​ປະຊາທິ​ປະ​ໄຕ
ລາວ ມີ​ນະ​ໂຍບາຍທີ່​ຈະ​ສົ່ງ
ເສີມ​ການ​ພັດທະນາພື້ນທີ່ ​
ແລະ​ກິດ​ຈະ​ກໍາ ທາງ​ເສດຖະ
ກິດຮ່ວມກັນ ​ໃນ​ລັກສະນະ
ເມືອງ​ຄູ່​ແຝດຕາມ​ຍຸດ​ທະ​ສາດ
ຄວາມຮ່ວມມືທາງ​ເສດຖະກິດ ອິຣະວະ​ດີ-​ແມ່​ນໍ້າ​ເຈົ້າພະຍາ-​ແມ່​ນໍ້າຂອງ.”

ພ້​ອມກັນນີ້ ຂົວ​ຂ້າມ​ແມ່​ນໍ້າຂອງ​ລະຫວ່າງ​ລາວ-​ໄທ ແຫ່ງ​ທີ​ສາມນີ້ ກໍ​ຍັງ​ເປັນ​ການ​ສະ​ແດງ​ອອກ​ເຖິງການຮ່ວມມື ອັນ​ດີ​ລະຫວ່າງ​ລາວ-​ໄທ ທີ່​ໄດ້ຮັບການ​ພັດທະນາ ​ໃຫ້​ດີ​ຂຶ້ນຢ່າງ​ຕໍ່​ເນື່ອງ​ອີກ​ດ້ວຍ ດັ່ງ​ທີ່​ທ່ານ​ທອງ​ສິງ ທໍາ​ມະ​ວົງ ນາ​ຍົກ​ລັດຖະມົນຕີ​ລາວ ​ໄດ້​ຖະ​ແຫລ​ງຢືນຢັນ​ວ່າ:

“ຂົວ​ມິດຕະພາບ​ແຫ່ງ​ທີ 3 ຈະ​ເປັນ​ສັນຍາ​ລັກ ​ແຫ່ງ​ໄມຕີ​ຈິດ ມິດຕະພາບ ​ແລະ​ຄວາມ​ເປັນ​ເພື່ອນ​ບ້ານ ທີ່​ໃກ້​ຄຽງອັນ​ດີ ຊຶ່ງ​ຈະ​ນໍາ​ເອົາຜົນ​ປະ​ໂຫຍ​ດ ​ແລະ​ຄວາມ​ຈະ​ເລີ​ນກ້າວ​ໜ້າ ມາສູ່​ປະ​ຊາ​ຊົນ​ທັງ​ສອງ​ຊາດ​ລາວ-​ໄທ ຢ່າງ​ຍາວ​ນານ.”

ການກໍ່ສ້າງ​ຂົວ​ຂ້າມ​ແມ່​ນໍ້າຂອງແຫ່ງ​ທີ 3 ລະຫວ່າງລາວ-​ໄທ ​ໄດ້​ເລີ້ມລົງມື​ດໍ​ເນີນ​ການ ​ເມື່ອ​ເດືອນ​ພຶດສະພາ 2009 ​ໂດຍ​ມີ​ທີ່​ຕັ້ງ ຢູ່​ໃນ​ເຂດ​ບ້ານ​ເວີນ​ໃຕ້ ທີ່ຢູ່​ຫ່າງ​ຈາກ​ຕົວ​ເມືອງ​ທ່າແຂກ 13 ກິໂລ​ແມັດ​ ​ແລະ​ຢູ່​ກົງກັນ​ຂ້າມ ກັບ​ບ້ານ​ຫ້ອມ ​ໃນ​ເຂດ​ຈັງຫັວດ ນະຄອນ​ພະ
ນົມຂອງ​ໄທ ໂດຍ​ມີ​ຕົວ​ຂົວ ທີ່​ມີຄວາມ​ຍາວ 780 ​ແມັດ ກວ້າງ 13 ​ແມັດ ​ແບ່ງ​ເປັນ 2 ຊ່ອງ​ທາງ ສໍາລັບ​ຍວດ​ຍານພາຫະນະ ທີ່​ກວ້າງ​ເບື້ອງລະ 3 ​ແມັດ​ເຄິ່ງ. ສ່ວນ​ທາງ​ຍ່າງທັງ 2 ​ເບື້ອງນັ້ນ ກໍ​ມີ​ຄວາມ​ກ້ວາງ ​ເບື້ອງລະ 1 ​ແມັດ ​ແລະ​ບໍ່ມີ​ທາງ​ລົດ​ໄຟ​ແຕ່​ຢ່າງ​ໃດ ​ໂດຍ​ໃຊ້​ງົບປະມານ​ກໍ່ສ້າງ​ໄປ​ຫລາຍ​ກວ່າ 1,700 ລ້ານ​ບາດ ດ້ວຍ​ທຶນ​ສະໜັບສະໜູນທັງໝົດ ຈາກລັດຖະບານ​ໄທ.

ພິທີເປີດຕະຫລາດນັດວາງສະແດງສິນຄ້າ ເນື່ອງໃນໂອກາດ ເປີດຂົວຂ້າມແມ່ນໍ້າຂອງແຫ່ງທີ 3 ລະຫວ່າງລາວ-ໄທ ທີ່ ໄດ້ຈັດຂຶ້ນໃນວັນທີ 11 ເດືອນພະຈິກ 2011
ພິທີເປີດຕະຫລາດນັດວາງສະແດງສິນຄ້າ ເນື່ອງໃນໂອກາດ ເປີດຂົວຂ້າມແມ່ນໍ້າຂອງແຫ່ງທີ 3 ລະຫວ່າງລາວ-ໄທ ທີ່ ໄດ້ຈັດຂຶ້ນໃນວັນທີ 11 ເດືອນພະຈິກ 2011

ທາງການລາວ-ໄທ ຄາດຫວັງວ່າ
ຂົວຂ້າມແມ່ນໍ້າຂອງແຫ່ງທີ 3
ດັ່ງກ່າວນີ້ ຈະມີສ່ວນຢ່າງສໍາຄັນ
ທີ່ຈະເຮັດໃຫ້ການຄ້າ, ການລົງ
ທຶນ ແລະການທ່ອງທ່ຽວຂະ
ຫຍາຍໂຕເພີ່ມສູງຂຶ້ນຢ່າງຕໍ່
ເນື່ອງ, ເພາະຂົວຂ້າມແມ່ນໍ້າ
ຂອງແຫ່ງທີ 3 ບໍ່ພຽງແຕ່ຈະ
ເຊື່ອມຕໍ່ລະຫວ່າງລາວກັບໄທ
ເທົ່ານັ້ນ. ຫາກແຕ່ຍັງສາມາດ
ທີ່ຈະເຊື່ອມຕໍ່ໄປຍັງປະເທດ
ຫວຽດນາມ ໂດຍມີຖະໜົນເລກ
ທີ 12 ໃນແຂວງຄໍາມ່ວນ ເປັນເສັ້ນທາງຫຼັກໃນການເຊື່ອມຕໍ່ອີກດ້ວຍ.

ໃນປັດຈຸບັນນີ້ ລາວ ແລະໄທ ມີຂົວຂ້າມແມ່ນໍ້າຂອງທີ່ໄດ້ຊົມໃຊ້ ເພື່ອເຊື່ອມຕໍ່ການຄົມມະ
ນາຄົມ-ຂົນສົ່ງລະຫວ່າງກັນແລ້ວ 2 ແຫ່ງ ກໍຄືຂົວທີ່ເຊື່ອມຕໍ່ລະຫວ່າງນະຄອນຫຼວງວຽງ
ຈັນກັບຈັງຫວັດໜອງຄາຍ ທີ່ໄດ້ເປີດຊົມໃຊ້ໃນປີ 1994 ແລະຂົວທີ່ເຊື່ອມຕໍ່ລະຫວ່າງແຂວງ
ສະຫວັນນະເຂດ ກັບຈັງຫວັດມຸກດາຫານ ທີ່ໄດ້ເປີດຊົມໃຊ້ນັບຈາກປີ 2007 ເປັນຕົ້ນມາ.
ສ່ວນອີກແຫ່ງນຶ່ງ ທີ່ກໍາລັງດໍາເນີນການກໍ່ສ້າງຢູ່ໃນເວລານີ້ ແລະຖືເປັນຂົວຂ້າມແມ່ນໍ້າຂອງ
ແຫ່ງທີ່ 4 ນັ້ນ ກໍ ແມ່ນຂົວທີ່ເຊື່ອມຕໍ່ລະຫວ່າງເມືອງຫ້ວຍຊາຍ ໃນແຂວງບໍ່ແກ້ວກັບອໍາ
ເພີຊຽງຂອງ ໃນຈັງຫວັດຊຽງລາຍ ຊຶ່ງຈະສໍາເລັດແລ້ວ ແລະເປີດໃຊ້ໃນປີ 2012 ຕໍ່ໄປ.

XS
SM
MD
LG