ສະພາແຫ່ງຊາດລາວ ຮັບຮອງເອົາກົດໝາຍໃໝ່ ທີ່ວ່າດ້ວຍ
ການຕ້ານ ແລະ ສະກັດກັ້ນອາຊະຍາກຳ ທາງລະບົບຄອມພິວເຕີ
ທີ່ຈະສົ່ງຜົນກະທົບ ຕໍ່ຄວາມສະຫງົບຮຽບຮ້ອຍ ແລະ ຄວາມໝັ້ນຄົງ
ແຫ່ງຊາດ.
ສະມາຊິກສະພາແຫ່ງຊາດລາວ ໄດ້ລົງມະຕິຮັບຮອງເອົາຮ່າງ
ກົດໝາຍຕ້ານ ແລະ ສະກັດກັ້ນ ອາຊະຍາກຳ ທາງລະບົບ
ຄອມພິວເຕີ ໃນໂອກາດກອງປະຊຸມສະໄໝສາມັນ ຄັ້ງທີ 9 ຂອງສະພາແຫ່ງຊາດຊຸດທີ 7
ທີ່ດຳເນີນກອງປະຊຸມ ໃນຊ່ວງເດືອນກໍລະກົດທີ່ຜ່ານມານີ້ ໂດຍຮ່າງກົດໝາຍໃໝ່ສະບັບນີ້
ເປັນຄວາມຮັບຜິດຊອບ ຂອງກະຊວງໄປສະນີ ແລະ ໂທລະຄົມມະນາຄົມ ຊຶ່ງປະກອບມີ
9 ພາກ 2 ໝວດ ແລະ 60 ມາດຕາ ທີ່ແນໃສ່ການປ້ອງກັນຜົນກະທົບຕໍ່ຄວາມສະຫງົບ
ຮຽບຮ້ອຍ ແລະ ຄວາມໝັ້ນຄົງແຫ່ງຊາດລາວ ທີ່ຈະເກີດຈາກອາຊະຍາກຳ ທາງລະບົບ
ຄອມພິວເຕີ ໃນທຸກຮູບແບບເປັນສຳຄັນ.
ທັງນີ້ ໂດຍທ່ານຫຽມ ພົມມະຈັນ ລັດຖະມົນຕີວ່າການ ກະຊວງໄປຊະນີ ແລະ ໂທລະຄົມ
ມະນາຄົມ ໄດ້ໃຫ້ການຢືນຢັນວ່າ ຮ່າງກົດໝາຍ ສະບັບນີ້ ຈະມີບົດບາດຢ່າງສຳຄັນໃນການ ດຳເນີນມາດຕະການກວດກາການນຳໃຊ້ສື່ສັງຄົມ ຫຼື Social Media ດ້ວຍລະບົບ Internet ທີ່ໄດ້ມີການຮັບ-ສົ່ງຂໍ້ມູນຂ່າວສານ ລະຫວ່າງກັນ ຕະຫລອດເວລານັ້ນ ຈຶ່ງເຮັດໃຫ້ຕ້ອງມີ
ການເພີ້ມ ມາດຕະການເຂັ້ມງວດຫຼາຍຂຶ້ນ ເພາະປາກົດວ່າ ໄດ້ມີການນຳໃຊ້ສື່ສັງຄົມໄປໃນທາງ ທີ່ບໍ່ສ້າງສັນຫຼາຍຂຶ້ນນັບມື້ ທັງຍັງມີການໃຫ້ຂ່າວສານ ແລະ ຂໍ້ມູນທີ່ບໍ່ມີມູນຄວາມຈິງອີກດ້ວຍ.
ຍິ່ງໄປກວ່ານັ້ນ ຈາກການດຳເນີນມາດຕະການກວດກາ ໃນ
ໄລຍະທີ່ຜ່ານມາ ກໍຍັງພົບວ່າ ມີການນຳໃຊ້ສື່ສັງຄົມອິນເຕີແນັດ
ໄປໃນທາງຂອງການວິພາກວິຈານ ທາງການເມືອງ ໃນລາວ
ແລະ ໃສ່ຮ້າຍປ້າຍສີການນຳ ໃນພັກປະຊາຊົນປະຕິວັດລາວ
ແລະ ລັດຖະບານ ອັນຈະສົ່ງຜົນກະທົບຕໍ່ຄວາມໝັ້ນຄົງແຫ່ງຊາດ
ໄດ້ອີກດ້ວຍ ເພາະສະນັ້ນ ຈຶ່ງເຮັດໃຫ້ຕ້ອງມີການດຳເນີນມາດ
ຕະການປິດກັ້ນສື່ສັງຄົມອິນເຕີເນັດ ດັ່ງກ່າວຢ່າງເຂັ້ມງວດທີ່ສຸດ
ໃນໄລຍະຕໍ່ໄປນີ້ ດັ່ງທີ່ທ່ານຫຽມ ໄດ້ຖະແຫລງຢືນຢັນວ່າ:
“ໃນການໃຊ້ສື່ສັງຄົມ Online ນີ້ ຜົນປະໂຫຍດນີ້ ກໍເພື່ອ
ເປັນຂໍ້ມູນ ແລະ ແບ່ງຂໍ້ມູນຄວາມຮູ້ສາລະຕ່າງໆ ການ
ໂຄສະນາເຜີຍແຜ່ປະຊາສຳພັນ ລະຫວ່າງບຸກຄົນ ກັບ ບຸກຄົນ ລະຫວ່າງອົງການ
ກັບອົງການ ແລະ ບັນດານັກທຸລະກິດ ກໍຄືການຄ້າ ແຕ່ຖ້າຫາກບັນຊີໃດ ຫຼື ຜູ້ໃດ
ຂໍ້ຄວາມໃດ ທີ່ມັນເປັນໄພ ແກ່ສັງຄົມ ເປັນໄພແກ່ຜູ້ອື່ນ ແລະ ປະເທດຊາດຫັ້ນ
ພວກເຮົາຈະຕັດເປັນກໍລະນີໄປ.”
ການນຳໃຊ້ສື່ສັງຄົມດ້ວຍລະບົບ ອິນເຕີເນັດ ໃນລາວ ໄດ້ເພີ້ມຂຶ້ນຢ່າງໄວວາ ນັບແຕ່ປີ
2010 ທີ່ລາວໄດ້ເລີ້ມນຳໃຊ້ລະບົບສື່ສາານ 3G ແລະໄດ້ຍົກລະດັບເປັນລະບົບ 4G
ນັບຈາກປີ 2012 ເປັນຕົ້ນມາ ຊຶ່ງກໍປາກົດວ່າ ມີຜູ້ນຳໃຊ້ໂທລະສັບມືຖືແລ້ວ ຫຼາຍກວ່າ
4 ລ້ານ 3 ແສນຄົນ ຫຼື 65 ເປີເຊັນ ຂອງປະຊາກອນທັງໝົດໃນປັດຈຸບັນ ໂດຍໃນນີ້ ກໍມີ
ຢູ່ຫຼາຍກວ່າ 8 ແສນຄົນທີ່ນຳໃຊ້ສື່ສັງຄົມອິນເຕີແນັດ ແລະ ເພີ້ມຂຶ້ນເປັນຫຼາຍກວ່າ 1 ລ້ານ
ຄົນ ນັບແຕ່ທ້າຍປີ 2014 ເປັນຕົ້ນມາ.
ຍິ່ງໄປກວ່ານັ້ນ ການທີ່ທາງການລາວ ມີກຳນົດການ ທີ່ຈະສົ່ງດາວທຽມດວງທຳອິດ ຂອງລາວ ທີ່ລົງທຶນໂດຍບໍລິສັດ China Asia-Pacific Mobile Telecommunications Satellite ຈຳກັດຈາກຈີນເນື່ອງໃນໂອກາດສະເຫຼີມສະຫຼອງການສະຖາປະນາ ສປປ ລາວ ຄົບຮອບ 40 ປີ ໃນທ້າຍປີ 2015 ນັ້ນ ກໍຍັງຈະເຮັດໃຫ້ການຊົມໃຊ້ສື່ສັງຄົມອິນເຕີແນັດ ໃນລາວມີຄວາມ ທັນສະໄໝ ແລະ ຂະຫຍາຍກວ້າງຫຼາຍຂຶ້ນອີກດ້ວຍ.
ການສ້າງ ແລະ ສົ່ງດາວທຽມດວງທຳອິດຂອງລາວ ຂຶ້ນສູ່ວົງໂຄຈອນດັ່ງກ່າວ ຖືເປັນພາກ
ສ່ວນໜຶ່ງຂອງການຮ່ວມມື ໃນການພັດທະນາເທັກໂນໂລຈີ ດ້ານຂໍ້ມູນຂ່າວສານ ລະຫວ່າງ ລັດຖະບານລາວກັບຈີນ ທີ່ໄດ້ລົງນາມຮ່ວມກັນໃນປີ 2011 ຊຶ່ງລັດຖະບານຈີນ ໄດ້ຕົກລົງ ໃຫ້ເງິນກູ້ແກ່ລັດຖະບານລາວ ໃນມູນຄ່າ 254 ລ້ານໂດລາ ສຳຫລັບເປັນຄ່າຈ້າງບໍລິສັດຈີນ ໃນ
ການສ້າງ ແລະ ສົ່ງດາວທຽມດວງທຳອິດຂຶ້ນສູ່ວົງໂຄຈອນດັ່ງກ່າວ.
ນອກຈາກນັ້ນລັດຖະບານລາວຍັງມີແຜນການທີ່ຈະສ້າງດາວທຽມດວງທີ 2 ເພື່ອໃຫ້ຄົບຖ້ວນ ຕາມທີ່ໄດ້ຮັບສິດ ຈາກອົງການດາວທຽມສາກົນອີກດ້ວຍ ໂດຍຈະເປັນການຮ່ວມທຶນ ລະຫວ່າງທາງການລາວ ກັບບໍລິສັດເອກະຊົນຈີນ ຊຶ່ງຄາດໝາຍວ່າ ຈະຕ້ອງໃຊ້ເງິນລົງທຶນໃນມູນຄ່າເຖິງ 960 ລ້ານໂດລາ ເນື່ອງຈາກວ່າ ເປັນດາວທຽມທີ່ມີເຖິງ 36 ຊ້ອງສັນຍານ ໃນການຮັບ-ສົ່ງສັນຍານໂທລະພາບ ແລະ ໂທລະສັບ ຈຶ່ງຕ້ອງໃຊ້ເງິນລົງທຶນ ສູງກວ່າດາວທຽມດວງທຳອິດຂອງລາວນັ້ນເອງ.
