ສະພາແຫ່ງຊາດ ລາວ ໃຫ້ການຮັບຮອງກົດໝາຍຈຳນວນເຖິງ 14 ສະບັບ ຫາກແຕ່ໃນນີ້ ກໍມີເຖິງ 12 ສະບັບທີ່ເປັນການດັດແກ້ກົດໝາຍເກົ່າໃຫ້ສອດຄ່ອງ ແລະ ເທົ່າທັນກັບສະ ພາບການທີ່ປ່ຽນແປງໄປ.
ທ່ານນາງ ສວນສະຫວັນ ວິຍະເກດ ເລຂາທິການ ແລະ ຄະນະປະຈຳສະພາແຫ່ງຊາດ ລາວ ຊຸດທີ 8 ຖະແຫຼງຢືນຢັນວ່າກອງປະຊຸມສະໄໝສາມັນຄັ້ງທີ 2 ຂອງສະພາແຫ່ງຊາດ ລາວ ຊຸດທີ 8 ທີ່ດຳເນີນກອງປະຊຸມໃນລະຫວ່າງວັນທີ 24 ຕຸລາ ຫາວັນທີ 18 ພະຈິກ 2016 ຜ່ານມາ ໄດ້ຮັບຮອງເອົາກົດໝາຍຈຳນວນເຖິງ 14 ສະບັບໂດຍໃນນີ້ເປັນກົດໝາຍ ໃໝ່ 2 ສະບັບ ຄື ກົດໝາຍວ່າດ້ວຍການຄຸ້ມຄອງເຄມີ ແລະ ກົດໝາຍວ່າດ້ວຍເທັກໂນໂລ ຈີການສື່ສານຂໍ້ ມູນ-ຂ່າວສານ.
ສ່ວນກົດໝາຍດັດແກ້ ຫຼື ປັບປຸງ 12 ສະບັບ ກໍຄືກົດໝາຍທາງຫຼວງ, ກົດໝາຍທະນາຍ ຄວາມ, ກົດໝາຍການລ້ຽງສັດ ແລະ ສັດຕະວະແພດ, ກົດໝາຍປ້ອງກັນ ແລະ ກັກກັນ ພືດ, ກົດໝາຍການສົ່ງເສີມການລົງທຶນ, ກົດໝາຍສື່ມວນຊົນ, ກົດໝາຍວ່າດ້ວຍລັດຖະ ບານ, ກົດໝາຍຕິດຕາມ-ກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນ ແຂວງ, ກົດໝາຍການແກ້ໄຂຄຳຮ້ອງທຸກ ແລະ ກົດໝາຍວ່າດ້ວຍການກວດສອບແຫ່ງລັດ ແລະ ກົດໝາຍປະມວນອາຍາທີ່ເປັນການທາບທາມ ເພື່ອຂໍຄວາມເຫັນຈາກບັນດາສະມາ ຊິກ ສະພາແຫ່ງຊາດ.
ນອກຈາກນີ້ ຄະນະປະຈຳສະພາແຫ່ງຊາດ ລາວ ຍັງເປີດໃຫ້ປະຊາຊົນ ລາວ ສົ່ງຄວາມ ຄິດເຫັນຕ່າງໆຜ່ານໂທລະສັບສາຍດ່ວນ 156 ໄດ້ດ້ວຍ ດັ່ງທີ່ທ່ານນາງ ສວນສະຫວັນ ໄດ້ຖະແຫຼງຢືນຢັນວ່າ.
"ຄຽງຄູ່ກັບການພິຈາລະນາຮັບຮອງເອົາບັນຫາສຳຄັນໃນໄລຍະການດຳເນີນກອງປະ ຊຸມສະພາແຫ່ງຊາດ ມີປະຊາຊົນສົ່ງຄວາມຄິດເຫັນຜ່ານໂທລະສັບສາຍດ່ວນທັງໝົດ 1,665 ສາຍ ຊຶ່ງພົວພັນເຖິງການຄຸ້ມຄອງບໍລິຫານລັດ, ການຄຸ້ມຄອງເສດຖະກິດ ສັງ ຄົມ ໃນນີ້ສ່ວນຫຼາຍພົວພັນເຖິງບັນຫາທີ່ດິນ, ເສັ້ນທາງຄົມມະນາຄົມ, ເງິນເດືອນຂອງ ພະນັກງານລັດຖະກອນ."
ກ່ອນໜ້ານີ້ ທ່ານ ສາຍທອງ ແກ້ວດວງດີ ປະທານຄະນະກຳມະທິການກົດໝາຍ ສະພາ ແຫ່ງຊາດ ລາວ ຊຸດທີ 8 ໃຫ້ການຢືນຢັນວ່າໃນປະຈຸບັນ ສະພາແຫ່ງຊາດ ລາວ ໄດ້ຮັບ ຮອງເອົາ ແລະ ປະກາດບັງຄັບໃຊ້ກົດໝາຍຢ່າງເປັນທາງການແລ້ວຈຳນວນທັງໝົດ 119 ສະບັບ ຫາກແຕ່ຜົນຈາກການກວດກາການຈັດຕັ້ງປະຕິບັດຕົວຈິງໃນໄລຍະຜ່ານມາ ພົບ ວ່າມີກົດໝາຍຈຳນວນໜຶ່ງຍັງບໍ່ທັນໄດ້ຈັດຕັ້ງຜັນຂະຫຍາຍລະອຽດ ເນື່ອງຈາກວ່າ ການ ສ້າງກົດໝາຍທີ່ມີລັກສະນະຟ້າວຝັ່ງຮີບຮ້ອນນັ້ນ ໄດ້ເຮັດໃຫ້ການກຳນົດເນື້ອໃນບໍ່ຊັດ ເຈນ, ບໍ່ຮັດກຸມ ແລະ ບໍ່ສອດຄ່ອງກັບສະພາບການຕົວຈິງ ທັງຍັງບໍ່ສາມາດຜັນຂະຫຍາຍ ເປັນນິຕິກຳກຸ່ມກົດໝາຍໃຫ້ຄົບຖ້ວນອີກດ້ວຍ.
ທັງນີ້ຄະນະກຳມະທິການກົດໝາຍ ສະພາແຫ່ງຊາດ ລາວ ໄດ້ກວດກາການຈັດຕັ້ງຜັນຂະ ຫຍາຍກົດໝາຍໃນ 29 ອົງການທັງຢູ່ໃນຂົງເຂດການປົກຄອງ, ຍຸຕິທຳ, ປ້ອງກັນຊາດ, ປ້ອງກັນຄວາມສະຫງົບ, ເສດຖະກິດ ແລະ ສັງຄົມ-ວັດທະນະທຳ ຊຶ່ງພົບວ່າມີ 525 ມາດ ຕາໃນ ກົດໝາຍທັງ 119 ສະບັບດັ່ງກ່າວ ໄດ້ກຳນົດໃຫ້ອອກລະບຽບການຕ່າງຫາກ ຫຼື ນິ ຕິກຳ ກຸ່ມກົດໝາຍ ແຕ່ກໍປາກົດວ່າໄດ້ມີການອອກລະບຽບການໄປແລ້ວພຽງ 246 ມາດ ຕາເທົ່ານັ້ນ.
ທາງດ້ານທ່ານ ພັນຄຳ ວິພາວັນ ຮອງປະທານປະເທດ ໄດ້ໃຫ້ການຢືນຢັນວ່າ ການມີກົດ ໝາຍທີ່ບໍ່ສອດຄ່ອງກັບສະພາບການຕົວຈິງ ທັງຍັງມີເນື້ອໃນບໍ່ຊັດເຈນ, ບໍ່ຮັດກຸມ ແລະ ຫາກສົມທົບດ້ວຍການມີບຸກຄະລາກອນທີ່ບໍ່ມີຄວາມຮູ້ ຄວາມສາມາດທາງກົດໝາຍນຳ ອີກກໍຍ່ອມທີ່ຈະເຮັດໃຫ້ການຈັດຕັ້ງປະຕິບັດຜັນຂະຫຍາຍກົດໝາຍນັ້ນ ມີປະສິດທິພາບ ຕ່ຳ ແລະ ບໍ່ຍຸຕິທຳຕໍ່ປະຊາຊົນ ລາວ.
ນອກຈາກນີ້ ສານປະຊາຊົນສູງສຸດລາຍງານວ່າ ໃນຊ່ວງປີ 2011-2015 ທີ່ຜ່ານມາ ປະ ຊາຊົນ ລາວ ໄດ້ຍື່ນການຟ້ອງຮ້ອງທີ່ກ່ຽວຂ້ອງກັບການຂັດແຍ້ງຕ່າງໆຕໍ່ສານປະຊາຊົນ ລາວ ຈຳນວນ 38,740 ຄະດີ ໃນນີ້ໄດ້ຕັດສິນ ແລະ ແກ້ໄຂຄະດີໄປແລ້ວ 36,070 ຄະດີ ຄິດເປັນ 95.32 ເປີເຊັນຂອງຈຳນວນຄະດີທັງໝົດ.
