ລິ້ງ ສຳຫລັບເຂົ້າຫາ

ເສດຖະກິດຂອງລາວ ຍັງຈະ ຂະຫຍາຍຕົວ ຢ່າງຕໍ່ເນື່ອງ

  • ຊົງຣິດ ໂພນເງິນ

ຮ້ານຂາຍຄໍາ ຢູ່ຕະຫລາດເຊົ້າ ວຽງຈັນ.
ເສດຖະກິດ​ລາວ​ຍັງ​ຈະ​ຂະຫຍາຍຕົວ​ເພີ່ມ​ຂື້ນຢ່າງ​ຕໍ່​ເນື່ອງ ​ແຕ່​
ໃນ​ຂະນະ​ດຽວ​ກັນ​ກໍ​ເຮັດໃຫ້​ສະພາບ​ຊີວິດ​ການເປັນ​ຢູ່​ຂອງ​ປະ
ຊາຊົນ​ລາວ​ໃນ​ເຂດ​ຕົວ​ເມືອງ​ແລະ​ເຂດ​ຊົນນະບົດ ມີ​ຄວາມ​
ແຕກ​ໂຕນ​ກັນ​ຫຼາຍ​ຂຶ້ນນັບ​ມື້.


ທ່ານທອງ​ສິງ ທໍາ​ມະ​ວົງ ນາຍົກລັດຖະມົນຕີລາວ ​ໄດ້​ຖະ​ແຫຼ​ງ
ຢືນຢັນ​ວ່າການ​ຈັດ​ຕັ້ງປະຕິບັດ​ແຜນການ​ພັດທະນາ​ເສດ​ຖະກິດ​
ແລະ​ສັງຄົມ​ແຫ່ງ​ຊາດ 5 ປີ ຄັ້ງ​ທີ 7 ​ໃນ​ລະຍະ​ເຄິ່ງແຜນ ການ​ທີ່​ຜ່ານ​ມາ​ນີ້ ​ໄດ້​ມີ​ໝາກຜົນ​ທີ່​ພົ້ນ​ເດັ່ນ​ເກີດ​ຂຶ້ນ​ໃນ​ຫຼາຍໆ​ດ້ານ ​ເຊັ່ນ​ດ້ານ​ເສດຖະກິດ ກໍ​ໄດ້​ຂະຫຍາ​ຍຕົວຢ່າງ​ຕໍ່​ເນື່ອງ ​ແລະ​ໝັ້ນ​ທ່ຽງ ​ໂດຍ​ເຮັດ​ໃຫ້​ຍອດ​ຜະລິດ​ຕະພັນ​ພາຍ​ໃນ​ປະ​ເທດ (GDP) ​ເພີ່ມ​ຂຶ້ນ​ໃນ​ອັດ ຕາ​ສະ​ເລ່ຍ​ເຖິງ 8.2% ຕໍ່​ປີ​ ແລະ​ສາມາ​ດ​ໄລ່​ສ​ະ​ເລ່ຍ​ເປັນ​ລາຍ​ຮັບ ຂອງ​ປະຊາກອນ​ລາວ​ໄດ້​ເຖິງ 1,500 ​ໂດ​ລ່າ ຕໍ່​ຄົນ​ ໃນ​ປັດຈຸບັນ.

ເຮືອນທີ່ລັດຖະບານລາວ ປຸກໃຫ້ ປະມຸກລັດ ທີ່ມາຮ່ວມ ກອງປະຊຸມ ASEM ຢູ່ ເມື່ອປີ 2012. ຈະຂາຍຫຼັງລະ 3 ລ້ານໂດລ່າ ແຕ່ບໍ່ມີຄົນຊື້.
ເຮືອນທີ່ລັດຖະບານລາວ ປຸກໃຫ້ ປະມຸກລັດ ທີ່ມາຮ່ວມ ກອງປະຊຸມ ASEM ຢູ່ ເມື່ອປີ 2012. ຈະຂາຍຫຼັງລະ 3 ລ້ານໂດລ່າ ແຕ່ບໍ່ມີຄົນຊື້.

ສ່ວນ​ໃນ​ດ້ານ​ການ​ເງິນ​ນັ້ນ ລັດຖະບານລາວ​ກໍ​ສາມາດ​ເພີ່ມ​ມູນ​ຄ່າ​
ຂອງ​ທຶນ​ສໍາຮອງ​ເງິນ ຕາ​ຕ່າງປະ​ເທດ​ ໄດ້​ທຽບ​ເທົ່າ​ກັບ​ການ​ນໍາ​ເຂົ້າ
ສິນຄ້າ​ ຈາກ​ຕ່າງປະ​ເທດ​ ເປັນ​ເວລາ 5 ​ເດືອນ ​ແລະ​ລະດົມ​ການ​ລົງທຶນ​ ໄດ້​ໃນ​ມູນ​ຄ່າ​ລວມ​ເຖິງ 85,147 ຕື້​ກີບ ຫຼື​ເທົ່າ​ກັບ 67.05% ຂອງ​ແຜນ ການ 5 ປີ ທີ່​ເລີ່​ມລົງມື​ຈັດ​ຕັ້ງ​ປະຕິບັດ​ນັບ​ແຕ່​ເດືອນ​ຕຸລາ​ປີ 2011 ​ເປັນ​ຕົ້ນ​ມາ ​ແລະ​ຍັງຈະ​ຈັດ​ຕັ້ງ​ປະຕິບັດ​ຕໍ່​ໄປ​ຈົນ​ເຖິງ​ເດືອນ​ກັນຍາ​ປີ 2015.

ສໍາລັບ​ໃນ​ດ້ານ​ງົບປະມານ​ນັ້ນ ທ່ານ ທອງ​ສິງ ກໍ​ໄດ້​ເນັ້ນ​ຢໍ້າວ່າ
ລັດຖະບານ​ລາວ​ສາມາດ​ສ້າງ​ລາຍ​ຮັບ​ເຂົ້າງົບປະມານ​ໄດ້​ ໃນ​
ມູນ​ຄ່າລວມ 41,832 ຕື້​ກີບ ຫຼື​ເທົ່າ​ກັບ 19.6% ຂອງ ​GDP ​ແຕ່​ໃນ​ຂະນະ​ດຽວ​ ລັດຖະ
ບານ​ລາວ​ກໍ​ໄດ້​ໃຊ້​ຈ່າຍງົບປະມານ​ໄປ​ໃນ​ມູນ​ຄ່າ​ລວມ​ເຖິງ 47,302 ຕື້​ກີບ ​ເທົ່າ​ກັບ 22.2% ຂອງ GDP ຈຶ່ງ​ເຮັດ​ໃຫ້​ລັດຖະບານ​ລາວ​ຂາດ​ດຸນ​ງົບປະມານ​ໃນ​ສັດສ່ວນ​ພຽງ​
ແຕ່ 2.6% ຂອງ GDP ​ເທົ່າ​ນັ້ນ.

ເຮືອນເສດຖີຫລັງນຶ່ງ ຢູ່ນະຄອນຫຼວງວຽງຈັນ
ເຮືອນເສດຖີຫລັງນຶ່ງ ຢູ່ນະຄອນຫຼວງວຽງຈັນ

ຍິ່ງ​ໄປ​ກວ່າ​ນັ້ນ ດ້ວຍ​ການຈັດ​ຕັ້ງ ປະຕິບັດ​ແຜນການ​ໃນ​ລະຍະ
​ທີ່​ຜ່ານ​ມາ​ດັ່ງກ່າວ​ນີ້ ກໍ​ຍັງ​ເຮັດໃຫ້​ອັດຕາ​ສະ​ເລ່ຍຄວາມທຸກ​ຍາກ
ຂອງ​ປະຊາຊົນລາວ​ລົດ​ລົງ​ມາ​ ຢູ່​ທີ່ລະດັບ 19% ຂອງ​ຈໍານວນ​
ປະຊາກອນ​ທັງ​ໝົດ ຫຼື​ບໍ່​ເກີນ​ 14.8% ຂອງ​ຈໍານວນ​ຄົວ​ເຮືອນ
​ທັງ​ໝົດ​ ໃນ​ທ້າຍ​ປີ 2013 ທີ່​ຜ່ານ​ມາ​ອີກ​ດ້ວຍ. ​

ແຕ່​ຢ່າງ​ໃດ​ກໍ​ຕາມ ຈາກ​ສະພາບ​ການ​ດັ່ງກ່າວ​ນີ້ ກໍ​ເຮັດ​ໃຫ້​ສະມາ
ຊິກ​ສະພາ​ແຫ່ງ​ຊາດ​ລາວ​ຈໍານວນ​ບໍ່​ໜ້ອຍ ທີ່​ໄດ້​ຕັ້ງ​ຂໍ້​ສົງ​ໄສ​ວ່າ
​ໃນ​ສະພາບ​ຕົວ​ຈິງ​ແລ້ວ​ ໄດ້​ເປັນ​ໄປ​ຕາມ​ການ​ລາຍ​ງານ ດັ່ງກ່າວ
​ຢ່າງ​ແທ້​ຈິງ​ຫຼື​ບໍ່ ​ເນື່ອງ​ຈາກ​ວ່າການ​ພັດທະນາ​ເສດຖະກິດ​ ທີ່​ຂະຫຍາຍຕົວ​ເພີ່ມ​ຂຶ້ນຢ່າງ ຕໍ່​ເນື່ອງ​ດັ່ງກ່າວ​ນັ້ນ ກໍ​ໄດ້​ເຮັດ​ໃຫ້​ລະດັບ​ລາຍ​ຮັບ ​ແລະ​ສະພາບ​ຊີວິດ​ຄວາມ​ເປັນ​ຢູ່​ຂອງ​ປະຊາ
ຊົນ​ລາວ ທີ່ຢູ່​ໃນ​ເຂດ​ຕົວ​ເມືອງກັບ​ເຂດ​ຊົນນະບົດ ມີ​ຄວາມ​ແຕກ​ໂຕນ​ກັນ​ຫຼາຍ​ຂຶ້ນນັບມື້​
ດ້ວຍເຊັ່ນ​ກັນ ດັ່ງ​ທີ​ທ່ານ​ສີ​ວັນ​ ອຸດທະ​ຈັກ ສະມາຊິກ​ສະພາ​ແຫ່ງ​ຊາດ​ ຈາກ​ເຂດ​ແຂວງຈໍາ
ປາ​ສັກ ​ໄດ້​ຖະ​ແຫຼ​ງຊີ້​ແຈງ​ວ່າ:

ການກໍ່ສ້າງຖະໜົນຫົນທາງ ໃນເຂດຊົນນະບົດລາວ
ການກໍ່ສ້າງຖະໜົນຫົນທາງ ໃນເຂດຊົນນະບົດລາວ

“ຄວາມທຸກ​ຍາກ​ຂອງ​ປະຊາຊົນ​ຢູ່​ໃນ​ເຂດ​ຊົນນະບົດ​ຫ່າງ​
ໄກ​ສອກຫຼີກ ຖ້າ​ທຽບ​ໃສ່​ຢູ່​ຕົວ​ເມືອງ​ເຫັນ​ວ່າ​ຍັງ​ມີ​ຄວາມ​
ຜິດ​ໂຕນ​ກັນ​ຫຼາຍ ຈາກ​ສະພາບ​ດັ່ງກ່າວ​ນັ້ນ ພວກເຮົາ
ເຫັນ​ວ່າ​ ລູກ​ຫຼານ​ຂອງ​ປະຊາຊົນ​ ທີ່​ທຸກ​ຍາກ​ແມ່ນ​ຂາດ​
ການ​ສຶກສາ​ຮໍ່າຮຽນ ໝາຍ​ຄວາມ​ວ່າ ລູກຫຼານ​ທີ່ຢູ່​ໃນ​ໄວ​
ອາຍຸ​ໄດ້​ຮໍ່າຮຽນ ກໍ​ໄດ້​ອອກ​ຈາກ​ໂຮງຮຽນ.”


ໂດຍ​ລັດຖະບານ​ລາວ​ໄດ້​ວາງ​ເປົ້າໝາຍ​ທີ່​ຈະລົບ​ລ້າງ​ບັນຫາ​
ຄວາ​ມຍາກຈົນ​ຂອງ​ປະຊາຊົນ​ບັນດາ​ເຜົ່າ​ໃຫ້​ໄດ້​ໂດຍ​ພື້ນຖານ​
ພາຍ​ໃນ​ປີ 2015 ກໍ​ຄື​ການ​ລົດ​ບັນຫາ​ຄວາມ​ຍາກຈົນ​ຂອງ​ປະຊາຊົນ​ລາວ​ສູ່​ລະດັບບໍ່​ເກີນ
10% ຂອງ​ຈໍານວນ​ປະຊາກອນ​ທັງ​ໝົດ​ໃນ​ປີ 2015 ດັ່ງກ່າວ ທັງ​ນີ້​ກໍ​ເພື່ອ​ໃຫ້​ເປັນ​ພື້ນຖານ​
ຮອງ​ຮັບ​ເປົ້າໝາຍ​ທີ່​ພັກ​ປະຊາຊົນ​ປະຕິວັດ​ແລະ​ລັດຖະບານ​ລາວ ຈະ​ນໍາພາ​ປະ​ເທດຊາດ
​ໄປ​ສູ່​ການ​ຫຼຸດ​ພົ້ນ​ຈາກ​ສະພາບ​ດ້ອຍ​ພັດທະນາ​ ໃຫ້​ໄດ້​ພາຍ​ໃນ​ປີ 2020 ຕໍ່​ໄປ ຊຶ່ງ​ໃນສະ
ພາບ​ການ​ຕົວຈິງ ກໍ​ຄົງ​ຈະ​ເປັນ​ໄປ​ໄດ້​ຍາກ ​ໂດຍ​ມີ​ສາ​ເຫດ​ມາ​ຈາກ​ບັນຫາ​ທີ່ກ່ຽວ​ກັບຄວາມ
​ແຕກ​ໂຕນ​ກັນ ​ໃນ​ລະດັບ​ຂອງ​ການ​ພັດທະນາ​ດັ່ງກ່າວ.

ຮ້ານຂາຍກ້ວຍແຄມທາງ ຢູ່ທ່າງ່ອນ
ຮ້ານຂາຍກ້ວຍແຄມທາງ ຢູ່ທ່າງ່ອນ

ທັງ​ນີ້​ໂດຍ​ຈະ​ເຫັນ​ໄດ້ ຢ່າງ​ຊັດ​ເຈນ​ຈາກ​ກໍ​ລະ​ນີຂອງ​ເຂດ​ນະຄອນ
​ວຽງ​ຈັນ ທີ່​ປະຊາຊົນ​ມີ​ລາຍ​ໄດ້​ສະ​ເລ່ຍ​ເຖິງ 27 ລ້ານກີບ ຫຼື​ປະມານ
3,346 ​ໂດ​ລ່າ​ຕໍ່​ຄົນ​ໃນ​ປັດຈຸບັນ​ນີ້ ຫາກ​ແຕ່​ວ່າ​ສໍາລັບ​ປະຊາຊົນ​ໃນ
​ແຂວງ​ຜົ້ງ​ສາລີ​ກັບ​ຍັງ​ຄົງ​ມີ​ລາຍ​ໄດ້​ສະ​ເລ່ຍພຽງ 6 ລ້ານ​ກີບ ຫຼື 745 ​
ໂດ​ລ່າ ຕໍ່​ຄົນ​ເທົ່າ​ນັ້ນ ​ໃນ​ຂະນະ​ທີ່​ອັດຕາ​ຄວາມຍາກຈົນ​ຂອງ​ປະຊາ
ຊົນ​ລາວ​ໃນ​ແຂວງ​ດັ່ງກ່າວ​ກໍ​ຍັງ​ສູງ ກວ່າ 45% ຂອງ​ປະຊາກອນ​ທັງ
​ໝົດ​ໃນ​ເວລາ​ນີ້ ​ເພາະສະ​ນັ້ນ ຈຶ່ງ​ເປັນ​ການ​ຍາກ​ທີ​ສຸດ ທີ່ ​ແຂວງ​ຜົ້ງ​
ສາລີ ຈະ​ສາມາດ​ລົບ​ລ້າງ​ບັນຫາ​ຄວາມ​ຍາກຈົນ​ໄດ້ ຕາມ​ເປົ້າໝາຍ​
ທີ່​ລັດຖະບານ​ໄດ້ ກໍາໜົດ​ໄວ້​ໃນປີ 2015 ດັ່ງກ່າວ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG