ລິ້ງ ສຳຫລັບເຂົ້າຫາ

ທາງການ ລາວ ຈະສົ່ງເສີມໃຫ້ຄົນ ລາວ ໃນຕ່າງປະເທດ ກັບຄືນມາ ພັກອາໄສຢູ່ໃນ ລາວ


ຕຶກ ຄອນໂດ ທີ່ບຶງທາດຫຼວງ ກຳລັງຢູ່ໃນຂັ້ນຕອນການກໍ່ສ້າງ. ນະຄອນຫຼວງ ວຽງຈັນ, ລາວ.

ຕຶກ ຄອນໂດ ທີ່ບຶງທາດຫຼວງ ກຳລັງຢູ່ໃນຂັ້ນຕອນການກໍ່ສ້າງ. ນະຄອນຫຼວງ ວຽງຈັນ, ລາວ.

ທາງການ ລາວ ຈະສົ່ງເສີມໃຫ້ຄົນ ລາວ ໃນຕ່າງປະເທດກັບຄືນມາພັກອາໄສຢູ່ໃນ ລາວ ຫຼາຍ ຂຶ້ນດ້ວຍການວາງມາດຕະການອຳນວຍຄວາມສະດວກໃຫ້ແກ່ການຊື້ຫ້ອງພັກທີ່ Condo ຢູ່ບຶງທາດຫຼວງ.

ທ່ານນາງ ບົວທາ ຂັດຕິຍະ ຮອງປະທານຄະນະກຳມະການຄຸ້ມຄອງເຂດເສດຖະກິດ ພິ ເສດ ແລະ ເຂດເສດຖະກິດສະເພາະແຫ່ງຊາດ ຖະແຫຼງຢືນຢັນວ່າທາງການ ລາວ ໄດ້ ວາງມາດຕະການຕ່າງໆ ເພື່ອສົ່ງເສີມໃຫ້ຊາວຕ່າງຊາດເຂົ້າມາຊື້ບ່ອນພັກອາໄສໃນ ລາວ ໂດຍສະເພາະແມ່ນຄົ້ນເຊື້ອສາຍ ລາວ ໃນຕ່າງປະເທດທີ່ຕ້ອງການຈະເດີນທາງກັບຄືນ ມາຢູ່ໃນ ລາວ ນັ້ນຈະໄດ້ຮັບການສະໜູນຊ່ວຍເຫຼືອ ແລະ ອຳນວຍຄວາມສະດວກໃນທຸກ ດ້ານທີ່ ກ່ຽວກັບ ການຊື້ຫ້ອງພັກຢູ່ Condominium ໃນເຂດເສດຖະກິດສະເພາະບຶງ ທາດຫຼວງ ໃນນະຄອນຫຼວງວຽງຈັນ ດັ່ງທີ່ທ່ານນາງໄດ້ໃຫ້ການຢືນຢັນວ່າ.

"ສົ່ງເສີມໃຫ້ຜູ້ທີ່ເປັນເຊື້ອຊາດ ລາວ ທີ່ເປັນສັນຊາດຕ່າງປະເທດມາຊື້ ແລະ ມາເປັນ ພົນລະເມືອງຢູ່ທີ່ນີ້ ດຳລົງຊີວິດຢູ່ທີ່ນີ້ກ່ອນ ຖ້າຫາກມີຄວາມສົນໃຈຈາກຜູ້ຊື້ລາຍຍ່ອຍ ທີ່ເປັນສັນຊາດອື່ນ ພວກເຮົາກະມີນະໂຍບາຍອອກບັດສຳມະໂນຄົວໃຫ້ ເອີ້ນວ່າເປັນ ພົນລະເມືອງຢູ່ໃນເຂດນີ້ ອັນນີ້ລະແມ່ນນະໂຍບາຍໄດ້ກຳນົດໄວ້ຢູ່ໃນກົດໝາຍວ່າ ດ້ວຍການສົ່ງເສີມການລົງທຶນ ຂອງ ສປປ ລາວ ແລະ ດຳລັດວ່າດ້ວຍການພັດທະນາ ແລະ ຄຸ້ມຄອງ ຂພສ ເລກທີ 443 ທີ່ທ່ານນາຍົກລັດຖະມົນຕີໄດ້ເຊັນໃນປີ 2010."

ທາງດ້ານທ່ານ ແຝງ ອິນທິລາດ ຮອງປະທານຄະນະຄຸ້ມຄອງເຂດເສດຖະກິດສະເພາະ ບຶງທາດຫຼວງ ໃຫ້ການຢືນຢັນວ່າການກໍ່ສ້າງ Condominium ສູງ 19 ຊັ້ນໄດ້ດຳເນີນ ການສຳເລັດແລ້ວ 7 ອາຄານຈາກແຜນການທີ່ວາງໄວ້ 12 ອາຄານ ໂດຍໃນປະຈຸບັນມີ ຊາວຕ່າງຊາດ ແລະ ຄົນລາວຈາກຕ່າງປະເທດໄດ້ມາຂອງຊື້ອາຄານທີ່ພັກອາໄສໄປແລ້ວ 6 ອາຄານ ສ່ວນອີກ 1 ອາຄານທີ່ນັກທຸລະກິດ ຈີນ ຈອງຊື້ທັງອາຄານນັ້ນຈະດຳເນີນການ ພັດທະນາ ແລະ ປັບປຸງໃຫ້ເປັນໂຮງແຮງລະດັບ 5 ດາວຈຳນວນ 128 ຫ້ອງພັກ ແລະ ສິ່ງ ອຳນວຍຄວາມສະດວກຕ່າງໆຢ່າງຄົບຊຸດ ທີ່ລວມເຖິງສະຖານບັນເທິງ, ຫ້ອງອາຫານ, ບ່ອນກາສິໂນ ແລະ ສະຖານເສີມຄວາມງາມດ້ວຍ.

ຂະນະທີ່ທ່ານ ຫຼິວ ຈຸນ ຜູ້ອຳນວຍການຝ່າຍການຈຳໜ່າຍຂອງກຸ່ມບໍລິສັດ Wang Feng Shanghai ຈາກຈີນ ຖະແຫຼວງວ່າ ການພັດທະນາເຂດເສດຖະກິດສະເພາະບຶງທາດ ຫຼວງ ໄດ້ດຳເນີນໄປຢ່າງຕັ້ງໜ້າ ແລະ ໝັ້ນໃຈວ່າການດຳເນີນງານໃນໄລຍະທີ 1 ຂອງ ໂຄງການຈະສຳເລັດ ແລະ ເລີ່ມເປີດໃຫ້ບໍລິການສູນການຄ້າ, ຮ້ານອາຫານ ແລະ ຕະ ຫຼາດກາງຄືນໄດ້ໃນມໍ່ໆນີ້ ສ່ວນບັນດາຜູ້ທີ່ຈອງຊື້ອາຄານທີ່ພັກອາໄສທັງ 7 ອາຄານນັ້ນ ຈະສາມາດເຂົ້າໄປຢູ່ໄດ້ໃນເດືອນທັນວາ 2016 ແລະ ອີກ 5 ອາຄານກໍ່ຈະກໍ່ສ້າງແລ້ວສຳ ເລັດພາຍໃນເດືອນ ມິຖຸນາ 2017 ຕາມລຳດັບ.

ໂດຍ ກຸ່ມບໍລິສັດ Wang Feng Shanghai ຈຳກັດໄດ້ນຳໃຊ້ເງິນທຶນໄປແລ້ວຫຼາຍກວ່າ 200 ລ້ານໂດລານັບແຕ່ທ້າຍປີ 2012 ເປັນຕົ້ນມາ ແລະ ກໍໄດ້ຄືບໜ້າຕາມແຜນການທີ່ ວາງໄວ້ເຊັ່ນ ການກໍ່ສ້າງຖະໜົນຍາວ 400 ແມັດ, ກວ້າງ 36 ແມັດເຊື່ອມຕໍ່ຈາກສາມແຍກ ໂພນທັນ ເຂົ້າມາໃນໂຄງການ, ການວາງແນວສາຍສົ່ງກະແສໄຟຟ້າ, ລະບົບນຳ້ປະປາ, ລະບົບກຳຈັດນຳ້ເປື້ອນ, ການວາງແນວຖະໜົນໃນໂຄງການ ແລະ ການຂຸດສວນນ້ຳໃນ ພື້ນທີ່ 50 ເຮັກຕາລວມເຖິງກໍ່ສ້າງສິ່ງອຳນວຍຄວາມສະດວກຕ່າງໆ ຢ່າງຄົບຊຸດ ຊຶ່ງກໍເຮັດ ໃຫ້ຕ້ອງເພີ່ມເງິນລົງທຶນຈາກເດີມ 1,600 ລ້ານເປັນ 5,000 ລ້ານໂດລາ.

ນອກຈາກນັ້ນ ພາກສ່ວນທີ່ໄດ້ກໍ່ສ້າງແລ້ວສຳເລັດໃນທ້າຍປີ 2015 ກໍຍັງລວມເຖິງສິ່ງອຳ ນວຍຄວາມສະດວກຕ່າງໆເຊັ່ນ ຖະໜົນພາຍໃນໂຄງການ ເຂດສີຂຽວ ແລະ ທີວທັດ ການ ຕິດຕັ້ງລິຟທ໌ ໃນອາຄານ, ຄິວລົດໂດຍສານ, ຕະຫຼາດສົດ, ຊຸບເປີມາຣເກັດ, ສະຖານທີ່ ບັນເທີງຕ່າງໆລຽບຕາມແຄມໜອງນ້ຳໃຫຍ່ ເຊັ່ນ ສະຖານທີ່ສະແດງສິລະປະ, ສວນນຳ້, ສະໜາມເທັນນິສ, ເດີນເຕະບານ, ສະໜາມໄດຣຟກອລຟ, ຮ້ານຄ້າປອດພາສີ, ໂຮງໜັງ, ຮ້ານອາຫານນານາຊາດ, ສູນສຸຂະພາບ-ຄວາມງາມ, ບ່ອນຈອດລົດ ແລະ ອື່ນໆ.

ໂຄງການພັດທະນາເມືອງໃໝ່ບຶງທາດຫຼວງມີເນື້ອທີ່ສຳປະທານ 365 ເຮັກຕາ ໄດ້ເວນຄືນ ທີ່ດິນຂອງປະຊາຊົນ ລາວ 480 ຕອນທີ່ມີຄ່າຊົດເຊີຍຫຼາຍກວ່າ 10 ລ້ານໂດລາ.

ສະແດງຄວາມເຫັນໃຫ້ເບິ່ງ

XS
SM
MD
LG