ລິ້ງ ສຳຫລັບເຂົ້າຫາ

ລັດຖະບານລາວ ປິດກິດຈະການ ຢູ່ແຫລ່ງທ່ອງທ່ຽວ ເມືອງວັງວຽງ 24 ແຫ່ງ


ການຫລິ້ນມ່ວນຊື່ນ ຢູ່ສະຖານທີ່ທ່ອງທ່ຽວແຫ່ງນຶ່ງ ໃນເມືອງວັງວຽງ ຊຶ່ງເປັນບ່ອນທີ່ ນັກທ່ອງທ່ຽວຕ່າງປະເທດນິຍົມໄປທ່ຽວກັນ.

ທາງ​ການ​ລາວ​ສັ່ງ​ປິດ​ຮ້ານ​ກິນ​ດື່ມ ​ແລະ​ບໍລິການ​ນັກ​ທ່ອງ​ທ່ຽວ 24 ​ແຫ່ງ​ ໃນ​ເຂດ​ເມືອງ​ວັງ​ວຽງ ​ຍ້ອນມີການຝ່າຝືນ​ລະບຽບ​ການ​ ຈົນ​ເປັນ​ເຫດ​​​ໃຫ້ ​ນັກ​ທ່ອງ​ທ່ຽວໄດ້​ຮັບ​ອັນຕະລາຍ ແລະ​ເສຍ​ຊີວິດ ຈໍານວນນຶ່ງ.

ທ່ານ​ ບົວ​ລີ ມິ​ລັດຕະນະ​ເພັງ ຄະນະ​ຮັບຜິດຊອບ​ກວດກາ​ຄຸ້ມ​
ຄອງ​ການທ່ອງທ່ຽວ​ໃນ​ເຂດ​ເມືອງ​ວັງ​ວຽງ ​ແຂວງ​ວຽງ​ຈັນ ຖະ
​ແຫຼ​ງຢືນຢັນ​ວ່າ ຮ້ານ​ກິນ​ດື່ມ​ ແລະ​ບໍລິການ​ນັກ​ທ່ອງ​ທ່ຽວ 24
​ແຫ່ງ ​ໃນ​ເຂດ​ເມືອງ​ວັງ​ວຽງ ​ໄດ້​ຖືກ​ຄໍາ​ສັ່ງ​ໃຫ້​ປິດ​ກິດຈະການ
​ເປັນ​ການ​ຊົ່ວຄາວເມື່ອ​ບໍ່​ນານ​ມາ​ນີ້ ​ໂດຍ​ມີ​ສາ​ເຫດ​ມາ​ຈາກ​ການ
​ທີ່​ຮ້ານ​ກິນ​ດື່ມ ​ແລະ​ບໍ​ລິ​ການ​ນັກ​ທ່ອງ​ທ່ຽວ​ດັ່ງກ່າວ​ໄດ້​ພາກັນ
​ດໍາ​ເນີນ​ກິດຈະການ​ຢ່າງ​ບໍ່​ຖືກຕ້ອງ​ຕາມ​ກົດ​ລະບຽບ ​ທີ່​ທາງ​ການ
​ລາວ​ໄດ້​ວາງ​ອອກ.

ຍິ່ງ​ໄປ​ກວ່າ​ນັ້ນ ການ​ດໍາ​ເນີນ​ການ​ຂອງ​ຮ້ານ​ກິນ​ດື່ມ ​ແລະ​ບໍລິການ
​ນັກ​ທ່ອງ​ທ່ຽວ​ເຫຼົ່າ​ນີ້ ​ຍັງ​ມີ​ລັກສະນະ​ທີ່​ເປັນ​ອັນຕະລາຍ​ຕໍ່​ຊີວິດ
​ແລະ​ຮ່າງກາຍ​ຂອງ​ນັກ​ທ່ອງ​ທ່ຽວ​ອີກດ້ວຍ ຕົວຢ່າງ​ກໍ​ຄື​ການ​ຂາຍ
ເຫຼົ້າ​ທີ່​ມີ​ສ່ວນ​ຜະສົມ​ຂອງ​ສານ​ກ່ອມ​ປະສາດ ຫຼື​ຢາ​ເສບຕິດ​ແລະ
ກິດຈະ ​ກໍາ​ທີ່​ໃຫ້​ບໍລິການ​ແກ່​ນັກ​ທ່ອງ​ທ່ຽວ​ ເຊັ່ນ​ການ​ໂຫນ​ເຊືອກ​ແລ້ວໂດດ​ລົງ​ນໍ້າ​ຊອງ​ນັ້ນ ​ກໍ​ບໍ່​ມີ​ຄວາມ​ປອດ​ໄພ ຈົນ​ເປັນ​ເຫດ​ເຮັດ​ໃຫ້​ນັກ​ທ່ອງ​ທ່ຽວ​ບາດ​ເຈັບ ​ແລະ​ເສຍ​ຊີວິດ​ໄປ​ແລ້ວຈໍານວນ​ນຶ່ງ.

​ແຕ່​ຢ່າງ​ໃດ​ກໍ​ຕາມ ທ່ານ ບົວ​ລີ ກໍ​ຢືນຢັນ​ວ່າ​ຮ້ານ​ກິນ​ດື່ມ​ແລະ​ບໍລິ
ການ​ນັກ​ທ່ອງ​ທ່ຽວ​ເຫຼົ່າ​ນີ້​ຈະ​ ສາມາດ​ກັບ​ຄືນ​ມາ​ເປີດ​ບໍລິການ​ໄດ້
​ອີກ​ເທື່ອ​ໃໝ່​ ​ກໍ​ຕໍ່​ເມື່ອປະຕິບັດ​ຕາມ​ກົດລະບຽບ​ຂອງ​ທາງ​ການ​
ລາວໄດ້​ຢ່າງ​ຄົບ​ຖ້ວນ​ແລ້ວ. ທັງ​ນີ້​ກໍ​ເນື່ອງຈາກ​ວ່ າ​ຖື​ເປັນພາກ
ສ່ວນ​ທີ່​ສໍາຄັນ​ທີ່​ສ້າງ​ລາຍ​ຮັບ​ໃຫ້​ ກັບ​ເມືອງ​ວັງ​ວຽງ​ໄດ້​ເພີ່ມ​ຂຶ້ນ
ຢ່າງ​ຕໍ່​ເນື່ອງ ​ໂດຍ​ຈາ​ກການ​ລາຍ​ງານ​ຂອງ​ຜະ​ແນ​ກທ່ອງ​ທ່ຽວ​
ກໍ​ໄດ້​ລະບຸ​ວ່າ ນັບ​ແຕ່​ເດືອນຕຸລາ ປີຜ່ານມາ​ເຖິງ​ເດືອນມິຖຸນາ​ປີ​ນີ້ ມີ​ນັກ​ທ່ອງ​ທ່ຽວ​ຊາວຕ່າງ
​ຊາດ​ເກືອບ​ນຶ່ງ​ແສນ​ຄົນ​ ທີ່ເດີນທາງ​ໄປ​ເມືອງ​ວັງວຽງ ​ແລະ​ພາກ​ບໍລິການ​ສາມາດ​ສ້າງ​ລາຍ
​ຮັບ ​ໄດ້​ຫຼາຍ​ກວ່າ 53 ຕື້​ກີບ.

ຫາກແຕ່​ວ່າ ​ເຂດ​ທີ່​ຖື​ວ່າ​ພາກ​ບໍລິການ​ແລະ​ທ່ອງ​ທ່ຽວ​ມີ​ການ​ຂະຫຍາຍຕົວ​ຫຼາຍ​ທີ່​ສຸດ​ ໃນ​ລາວນັ້ນ​ກໍ​ຄື​ນະຄອນ​ວຽງ​ຈັນ ​ໂດຍ​ໃນ​ຕະຫຼອດ​ປີ 2011 ທີ່​ຜ່ານ​ມາ​ນັ້ນ ກໍປາກົດ​ວ່າ​ມີ​ນັກ​
ທ່ອງ​ທ່ຽວ​ຊາວ​ຕ່າງ​ຊາດ​ຫຼາຍ​ກວ່າ 1,164,000 ຄົນ ທີ່​ໄດ້​ເດີນທາງ​ເຂົ້າມາ​ທ່ອງ​ທ່ຽວ​ໃນ​ ເຂດ​ນະຄອນ​ວຽງ​ຈັນ ຫຼືເພີ່ມ​ຂຶ້ນຫຼາຍ​ກວ່າ 30% ​ເມື່ອ​ທຽບ​ກັບ​ປີ 2010.

ຍິ່ງ​ໄປກວ່າ​ນັ້ນ ດ້ວຍ​ການ​ຂະ​ຫຍາ​ຍຕົວ​ໃນ​ລະດັບ​ດັ່ງກ່າວ​ນີ້ ກໍ​ຍັງເຮັດ​ໃຫ້​ເຊື່ອ​ວ່າ ​ໃນ​ຕະ
ຫຼອດ​ປີ 2012 ນີ້ ຈະ​ມີ​ນັກ​ທ່ອງ​ທ່ຽວ​ຊາວ​ຕ່າງ​ຊາດ​ເດີນທາງ​ເຂົ້າມາ​ທ່ອງທ່ຽວ​ໃນ​ເຂດ​ນະ
ຄອນ​ວຽງ​ຈັນ ຫຼາຍ​ກວ່າ 1.7 ລ້ານ​ຄົນ ຫຼື​ຄິດ​ເປັນ​ອັດຕາ​ຂະຫຍາຍຕົວ​ທີ່​ເພີ່ມ​ຂຶ້ນຈາກ​ປີ
2011 ​ເກີນ​ກວ່າ 40% ຊຶ່ງ​ກໍ​ຈະ​ເຮັດ​ໃຫ້​ທຸລະ​ກິດ​ພາກ​ບໍລິການ​ແລະ​ທ່ອງ​ທ່ຽວ​ໃນ​ເຂດ​ນະ
ຄອນ​ວຽງ​ຈັນ ມີ​ເງິນຕາ​ຕ່າງປະ​ເທດ​ໄຫຼ​ເຂົ້າສູ່​ລະບົບ​ທຸລະ​ກິດ​ຄິດ​ເປັນ​ມູນ​ຄ່າ​ລວມ​ເຖິງ
165 ລ້ານ​ໂດ​ລາ ​ເນື່ອງ​ຈາກ​ວ່າ​ໃນ​ຕະຫຼອດ​ປີ 2012 ນີ້ ​ເປັນ​ປີ​ການທ່ອງທ່ຽວ​ລາວ ຫຼື
Visit Lao Year ນັ້ນ ​ເອງ.



ສ່ວນ​ກ່ຽວ​ກັບ​ການ​ຕຽມ​ຄວາມ​ພ້ອມ​ໃນ​ດ້ານ​ຕ່າງໆ ​ເພື່ອ​ຮອງ​ຮັບ
​ປີ​ການທ່ອງທ່ຽວ​ລາວ​ດັ່ງກ່າວ​ນີ້ ທ່ານ​ຄໍາ​ປະດິດ ​ເຂັມ​ມານິດ ຫົວ
ໜ້າຜະ​ແນ​ກການທ່ອງທ່ຽວ​ນະຄອນ​ວຽງ​ຈັນ ກໍ​ໄດ້​ໃຫ້ການ​ຊີ້​ແຈງ
​ວ່າ:

"ພື້ນຖານ​ຮອງ​ຮັບ​ພວກ​ເຮົາ​ກໍ​ໄດ້​ເອົາໃຈ​ໃສ່​ໃນ​ການ​ພັດທະ
ນາ​ໂຄງ​ການ​ຕ່າງໆ ຕິດ​ພັນ​ກັບ​ທິດ​ນໍາ​ຂອງ​ການ​ນໍາ​ນະ
ຄອນ​ຫຼວງ​ວຽງ​ຈັນ​ ໃນ​ການ​ປະຕິບັດ​ນະ​ໂຍບາຍ 6 ສ. ກໍ​
ຄື​ການ​ສ້າງ​ພື້ນຖານ​ໂຄງ​ຫລ່າງ​ຂອງ​ຕົວ​ເມືອງ​ຫັ້ນ ​ເພື່ອ​ໃຫ້​
ສະຖານທີ່​ຕ່າງໆ ຫັ້ນ​ໄດ້​ກາຍ​ເປັນ​ທີ່​ຮອງ​ຮັບ​ແລະ​ຮັບ​ໃຊ້
ບໍລິການ​ຂອງ​ສັງຄົມ ກໍ​ຄື​ນັກ​ທ່ອງ​ທ່ຽວ ບໍ່ວ່າຈະ​ເປັນ​ຮ້ານ​ຄ້າ ຮ້ານ​ຂາຍ ກໍ​ຄື​ສະ ຖານ​ທີ່​ພັກຜ່ອນ​ແບບ​ສາທາ ລະນະ ​ໃຫ້​ມີ​ຫຼາຍບ່ອນ​ເພີ່ມ​ຂຶ້ນ."


ທາງ​ດ້ານ​ກະຊວງ​ຖະ​ແຫຼ​ງຂ່າວ ວັດທະນະ​ທໍາ ​ແລະ​ທ່ອງ​ທ່ຽວ​ຂອງ​ລາວ ກໍ​ໄດ້​ຕັ້ງເປົ້າໝາຍ​
ທີ່​ຈະ​ດຶງ​ດູດ​ເອົາ​ນັກ​ທ່ອງ​ທ່ຽວ​ຊາວ​ຕ່າງ​ຊາດ​ເພື່ອ​ໃຫ້​ພາກັນ​ເດີນທາງ​ເຂົ້າມາ​ທ່ອງ​ທ່ຽວ​ໃນ​ ລາວ​ໃຫ້ໄດ້​ບໍ່​ໜ້ອຍ​ກວ່າ 2.6 ລ້ານ​ຄົນ​ ໃນ​ຕະຫຼອດ​ປີ 2012 ນີ້ ​ໂດຍ​ໄດ້​ມີ​ການດໍາ​ເນີນ​ງານ
ເພື່ອ​ຕຽມ​ຄວາມ​ພ້ອມ​ທັງ​ໃນ​ດ້ານ​ໂຮງ​ແຮມຮ້ານ​ອາຫານ ສະຖານ​ທີ່​ທ່ອງທ່ຽວ ​ແລະ​ການບໍ
ລິການຕ່າງໆ ​ສໍາລັບ​ຮອງ​ຮັບ​ປີ​ທ່ອງ​ທ່ຽວລາວ​ໃຫ້​ໄດ້​ຢ່າງ​ມີ​ປະສິດທິພາບ ​ແລະ​ໃຫ້​ເປັນ​ທີ່​
ປະ​ທັບ​ໃຈ​ຂອງ​ນັກ​ທ່ອງ​ທ່ຽວ​ຊາວຕ່າງ​ຊາດ​ອີກ​ດ້ວຍ.

​ໃນ​ປັດຈຸບັນ​ນີ້ ທົ່ວ​ປະ​ເທດ​ລາວ​ມີ​ໂຮງ​ແຮມ 357 ​ແຫ່ງ, ບ້ານ​ພັກ 1,127 ​ແຫ່ງ, ຮ້ານ​ອາຫານ 1,246 ​ແຫ່ງ ​ແລະ​ສະຖານ​ທີ່​ທ່ອງ​ທ່ຽວ​ທໍາ​ມະ​ຊາດ ​ແລະ​ວັດທະນະ​ທໍາ 1,493 ​ແຫ່ງ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG