ລິ້ງ ສຳຫລັບເຂົ້າຫາ

ທາງການລາວ ເລີ້ມ​​ການ​ສຳ​ຫລວດ ພົນລະ​ເມືອງ ​ແລະ ທີ່ຢູ່​ອາ​ໄສ​ໃນ​ທົ່ວ​ປະ​ເທດ ຄັ້ງທີ 4


ພິທີເປີດການເດີນສຳຫລວດ ພົນລະ​ເມືອງ ​ແລະ ທີ່ຢູ່​ອາ​ໄສ​ໃນ​ທົ່ວ​ປະ​ເທດ ຄັ້ງທີ 4 ໄດ້ຈັດຂຶ້ນຢູ່ທີ່ນະຄອນຫລວງວຽງຈັນ ຢ່າງເປັນທາງການ ເມື່ອວັນທີ 9 ກຸມພາ 2015.

ພິທີເປີດການເດີນສຳຫລວດ ພົນລະ​ເມືອງ ​ແລະ ທີ່ຢູ່​ອາ​ໄສ​ໃນ​ທົ່ວ​ປະ​ເທດ ຄັ້ງທີ 4 ໄດ້ຈັດຂຶ້ນຢູ່ທີ່ນະຄອນຫລວງວຽງຈັນ ຢ່າງເປັນທາງການ ເມື່ອວັນທີ 9 ກຸມພາ 2015.

ທາງ​ການ​ລາວ​ຈັດ​ແບ່ງ​ພື້ນ​ທີ່​ ອອກ​ເປັນ 20,992 ​ເຂດ​ສຳ​ຫລັບ​
ການ​ສຳ​ຫລວດ ພົນລະ​ເມືອງ ​ແລະ ທີ່ຢູ່​ອາ​ໄສ​ໃນ​ທົ່ວ​ປະ​ເທດ​
ຄັ້ງທີ 4 ທີ່​ໄດ້​ລົງມື​ດຳ​ເນີນ​ການ​ສຳ​ຫລວດ​ຕົວ​ຈິງ ລະຫວ່າງ​
ວັນ​ທີ 1-7 ມີນາ 2015 ນີ້.

ກອງ​ເລຂາ​ຄະນະ​ຊີ້​ນຳ​ການ​ສຳ​ຫລວດ​ພົນລະ​ເມືອງ ​ແລະ​ ທີ່ຢູ່​ອາ​ໄສ​ລະດັບ​ຊາດ​ຄັ້ງທີ 4
ລາຍ​ງານ​ວ່າ ຄະນະ​ຊີ້​ນຳ​ໄດ້​ຈັດ​ແບ່ງ​ພື້ນ​ທີ່​ໃນ​ການ​ສຳ​ຫລວດ ​ອອກ​ເປັນ​ທັງ​ໝົດ 20,992
ພື້ນ​ທີ່​ໃນ​ເຂດ 8,506 ບ້ານ​ທີ່​ຕັ້ງຢູ່​ໃນ 148 ​ເມືອງ​ໃນ​ທົ່ວ​ປະ​ເທດ ​ໂດຍ​ປະມານ​ການ​ວ່າ ມີ
​ຈຳນວນ​ປະຊາກອນ​ລາວ​ໃນ 1,283,000 ກວ່າ​ຄອບຄົວ ທີ່​ເປັນ​ເປົ້າໝາຍ​ຂອງ​ການ​ສຳ​
ຫລວດ​ໃນ​ຄັ້ງນີ້.

ສຳ​ຫລັບ​ເນື້ອ​ໃນ​ສຳຄັນ ​ທີ່​ຈະ​ເປັນ​ຜົນ​ຮັບ​ຈາ​ກການ​ສຳ​ຫລວດ​ໃນ​ຄັ້ງນີ້ ກໍ​ຄື​ດັດຊະນີ​ໝາຍ​
ຕົ້ນຕໍ​ກ່ຽວກັບ​ປະຊາກອນ ດັດຊະນີ​ໝາຍ ກ່ຽວ​ກັບ​ການ​ສຶກສາ ​ແລະ​ສຸຂະ​ພາບ ດັດຊະນີໝາຍ​ ທີ່​ກ່ຽວ​ກັບ​ອັດຕາ​ການ​ເກີດ ການ​ຕາຍ ດັດຊະນີ​ໝາຍ​ ກ່ຽວ​ກັບ​ແຮງ​ງານ ຊົນ​ເຜົ່າ ສາສະໜາ ​ແລະ ສະພາບ​ທີ່ຢູ່​ອາ​ໄສ​ ຂອງ​ພົນລະ​ເມືອງ​ລາວ.

ປ້າຍໂຄສະນາ ທີ່ລົນນະລົງໃຫ້ ປະຊາຊົນ ຮ່ວມໄມ້ຮ່ວມມື ກັບພະນັກງານເດີນສຳຫລວດ ພົນລະ​ເມືອງ ​ແລະ ທີ່ຢູ່​ອາ​ໄສ​ໃນ​ທົ່ວ​ປະ​ເທດ ຄັ້ງທີ 4.

ປ້າຍໂຄສະນາ ທີ່ລົນນະລົງໃຫ້ ປະຊາຊົນ ຮ່ວມໄມ້ຮ່ວມມື ກັບພະນັກງານເດີນສຳຫລວດ ພົນລະ​ເມືອງ ​ແລະ ທີ່ຢູ່​ອາ​ໄສ​ໃນ​ທົ່ວ​ປະ​ເທດ ຄັ້ງທີ 4.

ທາງ​ດ້ານ ທ່ານ​ສະ​ໄໝ ຈັນ​ບຸບຜາ ຫົວໜ້າ​ສູນ​ສະຖິຕິ​ແຫ່ງ​ຊາດ
​ແລະ​ ຜູ້​ປະຈຳການ​ຄະນະ​ຊີ້​ນຳ ກໍ​ຖະ​ແຫລ​ງຢືນຢັນ​ວ່າ ​ໄດ້​ສຳ
​ເລັດ​ການເຝິກອົບຮົມ​ ພະນັກງານ​ລັດຖະບານ​ ທັງ​ໃນ​ຂັ້ນສູນ​ກາງ
​ແລະ ລະດັບ​ທ້ອງ​ຖິ່ນ​ ຈຳນວນ 28,000 ກວ່າ​ຄົນ ​ເພື່ອ​ໃຫ້​ຮັບຜິດ
ຊອບ​ການ​ເດີນ​ສຳ​ຫລວດ ​ແລະ​ ເກັບ​ກຳ​ຂໍ້​ມູນກ່ຽວ​ກັບ​ພົນລະ​ເມືອງ
​ແລະ ທີ່ຢູ່​ອາ​ໄສ​ໃນ​ທົ່ວ​ປະ​ເທດ​ ເມືື່ອບໍ່​ນານ​ມາ​ນີ້.

ໂດຍ​ພະນັກງານ​ລັດຖະບານ ​ທີ່​ຜ່ານການ​ເຝິກອົບຮົມ​ໃນ​ຄັ້ງນີ້
ສ່ວນ​ໃຫຍ່​ກໍ​ແມ່ນ​ຄູ ພະນັກງານ​ໃນ​ສັງກັດ​ຂອງ​ສະຫະພັນ​ແມ່ຍິງ ຊາວ​ໜຸ່ມ ​ແລະ ໜ່ວຍ​ໄກ່ເກ່ຍຂໍ້​ຂັດ​ແຍ້​ງ​ໃນ​ຂັ້ນບ້ານ ຊຶ່ງ​ມີ​ຈຳນວນ​ເກີນ​ກວ່າ 20,000 ຄົນ​ນັ້ນ ຈະ​ເປັນ​ພາກສ່ວນ​ທີ່​ຮັບຜິດຊອບ ​ໃນ​ການ​ເດີນ​ສຳ​ຫລວດ ສ່ວນ​ອີກ​ກວ່າ 6,000 ຄົນ​ທີ່​ເປັນ​ພະນັກງານ​ປະຈຳ​ສູນ​ສະຖິຕິ​ຂອງ​ເມືອງ ​ແລະ​ແຂວງ​ນັ້ນ ກໍຈະ​ຮັບຜິດຊອບ​ ໃນ​ການ​ກວດກາ​ຄວາມ​ຖືກຕ້ອງ​ຂອງຂໍ້​ມູນ ​ແລະ​ສະຖິຕິ​ທີ່​ເກັບ​ກຳມາ​ໄດ້​ນັ້ນ.

ການ​ສຳ​ຫລວດ​ພົນລະ​ເມືອງ ​ແລະ​ທີ່ຢູ່​ອາ​ໄສ​ໃນ​ທົ່ວ​ປະ​ເທດ​ລາວ ທີ່​ກຳນົດ​ຈະ​ດຳ​ເນີນ​ການ​ໃນ​ລະຫວ່າງ​ວັນ​ທີ 1-7 ມີນາ 2015 ຖື​ເປັນຄັ້ງທີ 4 ນັບ​ຈາກ​ການ​ສຳ​ຫລວດ​ຄັ້ງທຳ​ອິດ​ໃນ​ປີ 1985 ຊຶ່ງ​ຕິດຕາມ​ດ້ວຍ​ຄັ້ງທີ 2 ​ໃນ​ປີ 1995 ​ແລະ​ຄັ້ງທີ 3 ​ໃນ​ປີ 2005 ຫາກ​ແຕ່​ສຳ​ຫລັບ​ຄັ້ງທີ 4 ກໍ​ຖື​ໄດ້​ວ່າ ມີ​ຄວາມ​ສຳຄັນ​ຕໍ່​ການວາງ​ແຜນ​ພັດທະນາ​ເສດຖະກິດ-ສັງຄົມ​ລະຍະ 5 ປີ ຄັ້ງທີ 8 ຊຶ່ງ​ມີ​ເປົ້າໝາຍ​ເພື່ອ​ເຮັດ​ໃຫ້​ລາວ​ຫລຸດ​ພົ້ນ ຈາກ​ສະພາບ​ດ້ອຍ​ພັດທະນາໃຫ້​ໄດ້​ພາຍ​ໃນ​ປີ 2020.

ທັງ​ນີ້​ກໍ​ເນື່ອງ​ຈາກ​ວ່າ ຂໍ້​ມູນ​ທີ່​ໄດ້​ຈາກ​ການ​ສຳ​ຫລວດ​ນັ້ນ ຈະ​ເປັນ​ປະ​ໂຫຍ​ດຢ່າງ​ຍິ່ງ​ ຕໍ່ການ
​ກຳນົດ​ແຜນການ ​ແລະ​ນະ​ໂຍບາຍ​ດ້ານ​ປະຊາກອນ ການວາງ​ແຜນ​ພັດທະນາ​ຊັບພະຍາ
ກອນ​ມະນຸດ ​ແລະ​ແຮງ​ງານ ການ​ພັດທະນາ​ອຸດສາຫະກຳ​ ການ​ຜະລິດ​ສິນຄ້າ ການ​ດຳ​ເນີນ
​ທຸລະ​ກິດ ​ແລະ​ການ​ຕະຫລາດ ລວມ​ເຖິງ​ການ​ຕຽມ​ຄວາມ​ພ້ອມ​ ໃນ​ການ​ເຂົ້າຮ່ວມ​ໃນ​ປະຊາ​
ຄົມ​ເສດຖະກິດ​ອາ​ຊ່ຽນ​ອີກ​ດ້ວຍ.

ສຳ​ຫລັລການ​ສຳ​ຫລວດ​ໃນ​ປີ 2005 ກໍ​ປາກົດ​ວ່າ ປະ​ເທດ​ລາວ​ມີ​ພົນລະ​ເມືອງ​ຢູ່​ທັງ​ໝົດ 5
ລ້ານ 6 ​ແສນ 2 ໝື່ນຄົນ ​ໂດຍ​ຖ້າ​ຫາກ​ທຽບ​ໃສ່​ການ​ສຳ​ຫລວດ​ ໃນ​ປີ 1995 ກໍ​ປາກົດ​ວ່າ
ຈຳນວນ​ພົນລະ​ເມືອງ​ລາວ ​ໄດ້​ເພີ້​ມຂຶ້ນ 1 ລ້ານ​ກວ່າ​ຄົນ ຈຶ່ງ​ເຊື່ອ​ວ່າ ປະຊາກອນ​ລາວ​ໄດ້​
ເພີ້​ມຂຶ້ນ​ເປັນ 6 ລ້ານ 8 ​ແສນ​ກວ່າ​ຄົນ​ແລ້ວ ສ່ວນ​ໃນ​ນະຄອນ​ຫລວງວຽງຈັນ​ນັ້ນ ກໍ​ເຊື່ອ​ວ່າ
ມີ​ພົນລະ​ເມືອງ​ລາວ​ ຫຼາຍກວ່າ 1 ລ້ານຄົນ ດັ່ງ​ທີ່ ທ່ານ​ສາຍທອງ ​ແກ້ວ​ດວງ​ດີ ຮອງ​ເຈົ້າຄອງ
​ເຂດ​ນະຄອນ​ຫລວງ​ວຽງ​ຈັນ ​ໄດ້​ໃຫ້ການ​ຢືນຢັນ​ວ່າ:

“ປະຊາກອນ​ພວກ​ເຮົາ​ປັດຈຸບັນ ກໍ​ມີ​ຢູ່​ໃນ​ລະດັບ 840,000 ກວ່າ​ຄັນ ​ແລະ​ ບວກ
ໃສ່​ປະຊາກອນ​ທີ່​ເໜັງ​ຕີງ​ ຈາກ​ແຕ່ລະ​ແຂວງ ​ແຕ່​ລະ​ພາກສ່ວນ​ ເຂົ້າມາ​ເຮັດ​ທຸລະ​
ກິດການ​ຄ້າ​ການ​ຂາຍ ມາ​ທ່ອງ​ມາ​ທ່ຽວ​ນີ້ ກໍ​ປະມານ 9 ​ແສນ​ກວ່າ​ ຫຼືສູງ​ສຸດ​ໃນ​ບາງ​
ລະຍະ​ມັນ​ຂຶ້ນຮອດ​ລ້ານ.”

ນອກຈາກ​ນີ້ ການ​ສຳ​ຫລວດ​ໃນ​ປີ 2005 ຍັງ​ພົບ​ວ່າ ປະຊາກອນ​ອາຍຸ​ແຕ່ 14 ປີ​ ລົງ​ມາ ​ຄິດ​
ເປັນ 39 ​ເປີ​ເຊັນ ສ່ວນ​ອາຍຸ​ລະຫວ່າງ 15-64 ປີ ຄິດ​ເປັນ 57 ​ເປີ​ເຊັນ ​ແລະ 4 ​ເປີ​ເຊັນ ທີ່​
ເຫຼືອກໍ​ຄື​ປະຊາກອນ​ ທີ່​ມີ​ອາຍຸ​ຕັ້ງ​ແຕ່ 65 ປີ​ຂຶ້ນ​ໄປ.

ສະແດງຄວາມເຫັນໃຫ້ເບິ່ງ

XS
SM
MD
LG