ມືປືນຄົນນຶ່ງຢູ່ລັດ Louisiana ໃນພາກໃຕ້ຂອງສະຫະລັດ ໄດ້
ເປີດສາກຍິງປືນເຂົ້າໃສ່ຜູ້ຄົນ ໃນແລງວັນພະຫັດວານນີ້ ຢູ່ໃນ
ໂຮງສາຍຮູບເງົາ ເຮັດໃຫ້ສອງຄົນເສຍຊີວິດ ແລະຄົນອຶ່ນໆໄດ້
ຮັບບາດເຈັບອີກເຈັດຄົນ ກ່ອນຂ້າໂຕເອງຕາຍ.
ບັນດາເຈົ້າໜ້າທີ່ຢູ່ໃນເມືອງ Lafayette ກ່າວວ່າ ເຂົາເຈົ້າຮູ້ວ່າ
ມືປຶນນັ້ນແມ່ນໃຜ ພຽງແຕ່ເປີດເຜີຍວ່າ ລາວແມ່ນຜູ້ຊາຍອາຍຸ
58 ປີ.
ບັນດາຜູ້ເຄາະຮ້າຍຈຳນວນນຶ່ງແມ່ນໄດ້ຮັບບາດເຈັບສາຫັດ ໃນຂະນະທີ່ຄົນ ອຶ່ນໆ ໄດ້ຮັບບາດບາດເຈັບທີ່ບໍ່ຮ້າຍແຮງ.
ປະມານ 100 ຄົນ ໄດ້ຢູ່ໃນໂຮງສາຍຮູບເງົາ ເບິ່ງເລື້ອງ Trainwreck ເວລາມືປືນໄດ້ເລີ້ມຍິງເຂົ້າໃສ່ພວກທີ່ໄປເບິ່ງຮູບເງົານຳກັນ ດ້ວຍປືນສັ້ນ.
ມີການລາຍງານໃຫ້ປະທານາທິບໍດີສະຫະລັດ ທ່ານ Barack Obama ຊາບ ຢູ່ເທິງເຮືອ
ປະຈຳຕຳແໜ່ງ Air Force One ໂດຍທີ່ປຶກສາດ້ານຄວາມໝັ້ນຄົງ ພາຍໃນ ທ່ານນາງ
Lisa Monaco. ໂຄສົກຂອງທຳນຽບຂາວ ທ່ານ Josh Earnest ກ່າວວ່າ ທ່ານໂອບາມາ
ໄດ້ສັ່ງໃຫ້ຄະນະປະຕິບັດງານຂອງທ່ານຕິດ ຕາມແລະລາຍງານໃຫ້ທ່ານຮູ້ກ່ຽວກັບການ
ສືບສວນແລະອາການຂອງພວກທີ່ໄດ້ຮັບບາດໃນຈາກຖືກຍິງໂຈມຕີຄັ້ງນີ້.
ທ່ານ Earnest ກ່າວວ່າ “ຄວາມຄິດ ແລະການພາວະຂອງທຸກໆຄົນທີ່ ທຳນຽບຂາວ
ຮວມທັງທ່ານປະທານາທິບໍດີ ແລະສະຕີໝາຍເລກນຶ່ງ ແມ່ນຢູ່ກັບປະຊາ ຄົມເມືອງ
Lafayette ລັດ Louisiana ໂດຍສະເພາະກັບບັນດາຄອບຄົວຂອງ ພວກທີ່ເສຍຊີວິດ.”