ລິ້ງ ສຳຫລັບເຂົ້າຫາ

















ເກົາຫຼີ​ເໜືອ​ກໍາລັງ​ຂົ່ມຂູ່ ​ຈະ​ທໍາ​ການ​ເຄື່ອນ​ໄຫວ​ພິ​ເສດ​ຕໍ່​ເກົາຫຼີ​ໃຕ້ ​ແບບ​ທີ່ກຸງ​ພຽງຢ້າງ​ກ່າວ​ວ່າ ຈະ​ເຮັດ​ໃຫ້ລັດຖະບານ​ປະທານາທິບໍດີ Lee Myung-bak ​ດັບ​ສູນ​ໄປ ໃນ​ເວລາ 3 ຫຼື 4 ນາທີ​.

ຄໍາຂູ່​ໃນ​ວັນ​ຈັນ​ມື້​ນີ້ ​ເປັນ​ພຽງ​ຄັ້ງ​ຫຼ້າ​ສຸດ​ຂອງສໍານວນ​ໂວຫານເຕືອນທີ່​ເກົາຫລີ​ເໜືອ​ໄດ້​ກ່າວ​ອອກ​ມາ​ຢ່າງເຜັດ​ຮ້ອນ ​ຕິດ​ຕໍ່​ກັນ​ມາ​ຫຼາຍຄັ້ງ​ທີ່​ແນ​ເປົ້າ​ໝາຍ​ໃສ່​ເກົາຫຼີ​ໃຕ້ ​ແຕ່​ປາກົດ​ວ່າ​ເປັນຄໍາ​ເຕືອນ​ທີ່​ຮ້າຍ​ແຮງແລະ​ເຈາະ​ຈົງ​ຫຼາຍ​ກວ່າ​ຄັ້ງ​ກ່ອນໆ​ ນັບ​ແຕ່​ທ່ານ​ກິມຈົງ​ອຸນຂຶ້ນ​ດໍາລົງ​ຕໍາ​ແໜ່​ງ ຜູ້​ນໍາພາ​ປະເທດ​ໃນ​ປີ​ນີ້​ ເປັນ​ຕົ້ນ​ມາ.

ຄະນະ​ນໍາພາ​ຂອງ​ກຸງ​ພຽງ​ຢ້າງ​ມີ​ຄວາມ​ໂກດ​ແຄ້ນ​ຕໍ່​ອັນ​ທີ່​ພວກ​ເຂົາ​ເຈົ້າຖື​ວ່າ ​ເປັນຖ້ອຍ​ຖະ​ແຫຼ​ງທີ່​ຂາດ​ການ​ນັບຖື​ຂອງ​ເກົາຫຼີ​ໃຕ້​ກ່ຽວ​ກັບ​ການ ສະ​ເຫຼີ​ມສະຫຼອງ​ວັນ​ຄ້າຍ​ວັນ​ເກີດ​ຄົບຮອບ 100 ​ປິ​ຂອງ​ມື້​ລາງ​ຜູ້​ກໍ່​ຕັ້ງ​ປະ​ເທດເກົາຫຼີ​ເໜືອ ທ່ານ​ກິມ ອິລ ຊຸງ ​ຕະຫຼອດ​ທັງຄໍາ​ປະກາດ​ໃນ​ສັບປະດາຜ່ານ​ມາ​ທີ່​ວ່າ ປັດຈຸບັນ​ນີ້ ກຸງ​ໂຊລ​ມີ​ລູກ​ສອນ​ໄຟ​ຂີ​ປະ​ນາ​ວຸດ​ທີ່​ສາມາດຍິງ​ໃສ່​ເປົ້າ​ໝາຍ​ບ່ອນ​ໃດ​ກໍ​ໄດ້ ​ໃນ​ເກົາຫຼີ​ເໜືອ​ແລ້ວ​ນັ້ນ.

ວິທະຍຸ​ແຫ່ງ​ລັດ​ເກົາຫຼີ​ເໜືອໄດ້ອອກ​ຖະ​ແຫຼ​ງການ​ພິ​ເສດສະບັບ​ນຶ່ງເພື່ອ​ປະກາດ​ຄໍາຂູ່​ດັ່ງກ່າວ ​ໃນ​ວັນ​ຈັນ​ມື້ນີ້​.

"ສຽງພາສາເກົາຫຼີ’’

ໂຄສົກ​ວິທະຍຸ​ກ່າວ​ວ່າ “ບັດ​ນີ້ ພວກ​ເຮົາ​ປະກາດ​ໃຫ້​ຮູ້​ວ່າກໍາລັງ​ປະຕິວັດ ​ຂອງ​ພວກ​ເຮົາ​ຈະ​ທໍາ​ການ​ເຄື່ອນ​ໄຫວ​ພິ​ເສດ​ໃນ​ໄວໆ​ນີ້ ເພື່ອ​ທັບ​ມ້າງທໍາ ລາຍ ການ​ທ້າ​ທາຍທີ່​ບໍ່ລະມັດລະວັງຂອງພັກຝ່າຍ​ທີ່​ທໍລະ​ຍົດ​ຕໍ່​ຊາດ​.”

ຖະ​ແຫຼ​ງການ​ເວົ້າ​ວ່າ ອັນ​ທີ່​ເອີ້ນ​ວ່າ ການ​ເຄື່ອນ​ໄຫວ​ພິ​ເສດນັ້ນຈະ​ແນ​ເປົ້າ​ໝາຍ​ໃສ່​ພັກຂອງ​ລັດຖະບານ​ປະທານາທິບໍດີ Lee Myung-bak ທີ່​ປົກຄອງ​ເກົາຫຼີ​ໃຕ້​ໃນ​ປັດຈຸບັນ ຕະຫຼອດ​ທັງ​ພວກ​ອົງການ​ຂ່າວ​ນິຍົມ ​ແນວທາງ​ເດີມ​ແຫ່ງ​ຕ່າງໆ​ໃນ​ເກົາຫຼີ​ໃຕ້​ນັ້ນ ​ແລະ​ເວົ້າ​ຕື່ມ​ວ່າ ພວກ​ເປົ້າ​ໝາຍ​ເຫຼົ່າ​ນີ້​ຈະ​ຖືກ​ໄຟເຜົາ​ໄໝ້​ລົງ​ຈໍາ​ດິນ​ໃນ​ເວລາ​ພຽງ 3 ຫຼື 4 ນາທີ​ເທົ່າ​ນັ້ນ.

ຖະ​ແຫຼ​ງການເວົ້າ​ຕື່ມ​ວ່າ ການ​ໂຈມ​ຕີ​ທີ່​ວ່າ​ນີ້​ຈະ​ໃຊ້​ວິທີການນຶ່ງ​ດຽວ​ທີ່​ບໍ່​ເຄີຍ​ໃຊ້​ມາ​ກ່ອນ ຊຶ່ງ​ພາ​ໃຫ້​ພວກ​ນັກວິ​ເຄາະ​ເຫດການ​ບາງ​ຄົນ​ໃນ​ເກົາຫຼີ​ໃຕ້​ຕັ້ງ​ຂໍ້ສົງ​ໄສຂຶ້ນ​ມາ​ວ່າ ກຸງ​ພຽງ​ຢ້າງ​ອາດ​ຈະ​ວາງ​ແຜນ​ໂຈມຕີ​ທາງ ​ຄອມ​ພີ​ວ​ເຕີ​ກໍ​ເປັນ​ໄດ້.

ໃນ​ອະດີດ​ຜ່ານ​ມາ ​ເກົາຫຼີ​ເໜືອ​ໄດ້​ຖືກ​ກ່າວ​ຫາ​ວ່າ ​ເຂົ້າ​ໄປ​ຄົ້ນ​ເອົາ​ຂໍ້ມູນ ​ໃນຄອມ​ພີ​ວ​ເຕີຂອງ​ບັນດາສະ​ຖາ​ບັນ​ສໍາຄັນ​ຕ່າງໆ​ຂອງ​ເກົາຫຼີ​ໃຕ້ ​ແລະ​ຢ່າງ​ໜ້ອຍ​ມີ​ໂອກາດ​ນຶ່ງ ປາກົດ​ວ່າ ​ໄດ້​ເຂົ້າ​ແຊກ​ແຊງ​ກັບ​ການທໍາງານ​ຂອງ​ລະ​ບົບ GPS ​ໃນ​ເຂດ​ທະ​ເລ​ອ້ອມ​ແອ້ມ​ເກົາຫຼີ​ໃຕ້​ນັ້ນ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG