ຜູ້ນຳເກົາຫຼີເໜືອ ທ່ານ Kim Jong Un ບໍ່ໄດ້ອອກມາໃຫ້ເຫັນ
ຢູ່ໃນທີ່ສາທາລະນະ ເປັນເວລາເດືອນປາຍແລ້ວ ຊຶ່ງໄດ້ກໍ່ໃຫ້
ເກີດມີຂ່າວຊ່າລືຕ່າງໆ ກ່ຽວກັບສຸຂະພາບອັນຮ້າຍແຮງ ຫຼື
ບັນຫາຕ່າງໆ ດ້ານການເມືອງ.
ທ່ານ Kim ຜູ້ທີ່ໄດ້ສືບທອດຕຳແໜ່ງ ຈາກພໍ່ ຄືທ່ານ Kim Jong
Il ໃນປີ 2011 ໄດ້ປາກົດໃຫ້ເຫັນ ຕອນສຸດທ້າຍ ໃນວັນທີ 3
ກັນຍາ ຢູ່ໃນງານສະແດງດົນຕີຂອງວົງ Moranbong ທີ່ທ່ານ
ມັກຫລາຍນັ້ນ ຊຶ່ງເປັນວົງດົນຕີພອ໊ບຂອງສິນລະປິນຍິງລ້ວນໆ
ທີ່ປະກອບດ້ວຍຍິງສາວ 5 ຄົນ ຊຶ່ງແມ່ນທ່ານ Kim ເລືອກເອົາ
ເອງທັງໝົດ.
ພວກສັງເກດການເກົາຫຼີເໜືອມີຄວາມແປກປະຫຼາດໃຈ ໃນທ້າຍເດືອນ ກັນຍາ ເມື່ອ
ທ່ານ Kim ບໍ່ໄດ້ໄປຮ່ວມກອງປະຊຸມຂອງສະພາແຫ່ງຊາດ ຊຶ່ງທ່ານໄດ້ໄປຮ່ວມທຸກໆເທື່ອ
ໃນສອງປີທຳອິດທີ່ໄດ້ເຂົ້າຮັບຕຳແໜ່ງນັ້ນ.
2 ເດືອນກ່ອນໜ້ານີ້ ພາຍໃນວີດີໂອ ສະແດງໃຫ້ເຫັນທ່ານ Kim ທີ່ມີຮູບຮ່າງຕຸ້ຍພີ ຍ່າງ
ຂາເຄຜິດປົກກະຕິ ຢູ່ເທິງເວທີໃນພິທີຂີດໝາຍ ຄົບຮອບ 20 ປີ ຂອງການເສຍຊີວິດ
ຂອງພໍ່ປູ່ຂອງທ່ານ ຄື ທ່ານ Kim Il Sung ປະທານປະເທດ ຜູ້ສ້າງຕັ້ງເກົາຫຼີເໜືອ.
ຫຼັງຈາກນັ້ນບໍ່ດົນຕໍ່ມາ ສາລະຄະດີບົດນຶ່ງ ຂອງສື່ຂອງລັດ ໄດ້ເອີ່ຍ ແບບເວົ້າຜ່ານໆໄປ
ເຖິງ ທ່ານ Kim ຜູ້ນຳທີ່ຊາວເກົາຫຼີເໜືອເຄົາລົບບູຊາ ເກືອບເທົ່າກັບເທບພະເຈົ້ານັ້ນວ່າ
ມີອາການບໍ່ສະບາຍໂຕເລັກນ້ອຍ ແຕ່ບໍ່ໄດ້ລະບຸວ່າ ທ່ານບໍ່ສະບາຍ ເປັນຫຍັງແທ້.
ໃນເວລານີ້ ການສັນນິຖານໃດໆກ່ຽວກັບວ່າທ່ານ Kim ຢູ່ແຫ່ງໃດນັ້ນ ແມ່ນເປັນການເດົາ
ພຽງເທົ່ານັ້ນ. ບັນຫານີ້ແມ່ນສັບສົນຕື່ມອີກ ຍ້ອນສະພາບປິດລັບ ຂອງລັດຖະບານ ໃນ
ເກົາຫຼີເໜືອ ບ່ອນທີ່ການຮົ່ວໄຫລ ອອກມາຂອງຂໍ້ມູນນັ້ນ ແມ່ນມີນ້ອຍທີ່ສຸດ ນອກຈາກຂໍ້
ມູນທີ່ທາງການເປີດເຜີຍອອກເທົ່ານັ້ນ.
ສື່ຂ່າວເກົາຫຼີໃຕ້ ໄດ້ລາຍງານຂ່າວວ່າ ທ່ານ Kim ບໍ່ສະບາຍ ຍ້ອນເປັນປານດົງ ຊຶ່ງເປັນ
ພະຍາດພາຍໃນຄອບຄົວ. ນອກນັ້ນແລ້ວ ທ່ານຍັງມີ ໄຂມັນສູງ ຄວາມດັນສູງ ແລະ ເປັນ
ເບົາຫວານອີກ ຊຶ່ງທັງໝົດນັ້ນແມ່ນກ່ຽວພັນກັບ ຄວາມອ້ວນພີຂອງທ່ານ ແລະຄວາມມັກ
ກິນເນີຍແຂງ Emmantal ຂອງທ່ານ.
ທ່ານ Kim Jong Un ຢູ່ໃສ? (ວີດີໂອ/ພາບ)
