ລັດຖະມົນຕີການຕ່າງປະເທດ ສະຫະລັດ ທ່ານ John Kerry ໄດ້ພົບປະກັບເຈົ້າຊາຍ ຊາອຸດີ ອາເຣເບຍ Mohammed bin Salman ໃນເມືອງ Jeddah ໃນຕອນເຊົ້າ ວັນ ພະຫັດມື້ນີ້ ເພື່ອປຶກ ສາຫາລື ກ່ຽວກັບບັນຫາຕ່າງໆ, ຮວມທັງໃນການປະຕິບັດການ ທາງທະຫານ ຂອງ ສະຫະລັດ ໃນ ຊີເຣຍ.
ນອກນັ້ນ ທ່ານ Kerry ຍັງໄດ້ພົບກັບບັນດານັກການທູດຈາກປະເທດ ບາເຣນ ແລະ ສະພາການຮ່ວມມືໃນເຂດອ່າວເປີເຊຍ ເພື່ອໃຫ້ຂໍ້ມູນ ກ່ຽວກັບ ກອງປະຊຸມຕ່າງໆ ໃນຄັ້ງທີ່ຜ່ານມາ ກັບ ຣັດເຊຍ ກ່ຽວກັບ ການປະຕິບັດການທາງທະຫານໃນ ຊີເຣຍ.
ທ່ານ Kerry ຢາກຈະເພີ່ມການສະໜັບສະໜູນໃນໝູ່ຂອງບັນດາ ປະ ເທດໃນເຂດອ່າວ ເປີເຊຍ ຕໍ່ແຜນການ ຊີເຣຍ ກ່ອນໜ້າການປະຊຸມກັບລັດຖະມົນຕີຕ່າງປະເທດ ຣັດເຊຍ ທ່ານ Sergei Lavrov ໃນວັນສຸກມື້ອື່ນນີ້ ທີ່ນະຄອນ ເຈນີວາ ປະເທດ ສະວິດເຊີແລນ.
ໃນລະຫວ່າງການພົບປະກັບທ່ານ Lavrov, ທັງສອງຝ່າຍຈະພະຍາ ຍາມບັນລຸຂໍ້ຕົກລົງ ກ່ຽວກັບ ການຮ່ວມມືທາງທະຫານ ແລະ ການແບ່ງປັນຂໍ້ມູນ ໃນຄວາມພະຍາຍາມ ທີ່ຈະ ເອົາຊະນະພວກຫົວຮຸນແຮງ ລັດອິສລາມໃນ ຊີເຣຍ.
ການຢ້ຽມຢາມປະເທດ ຊາອູດີ ອາເຣບຍ ຂອງທ່ານ Kerry ໄດ້ມີຂຶ້ນມື້ໜຶ່ງຫຼັງຈາກ ເທີກີ ໄດ້ເປີດການບຸກໂຈມຕີເຂົ້າໄປໃນ ຊີເຣຍ ເພື່ອບັງຄັບ ໃຫ້ພວກນັກຮົບ IS ອອກຈາກ ເມືອງ Jarablus, ເຊິ່ງພວກ ຈີຮາດ ໄດ້ເຂົ້າຄວບຄຸມນັບຕັ້ງແຕ່ປີ 2014 ເປັນຕົ້ນມາ ແລະ ມັນກໍຕັ້ງຢູ່ຂ້າມ ເສັ້ນຊາຍແດນທາງພາກໃຕ້ຂອງ ເທີກີ ນັ້ນ.
ອົງການສິ້ງຊອມສິດທິມະນຸດ ຊີເຣຍ ທີ່ມີຫ້ອງການຕັ້ງຢູ່ ອັງກິດ ໄດ້ ກ່າວວ່າ ພວກນັກຮົບ ລັດອິສລາມ ໄດ້ທຳການຕໍ່ສູ້ ພຽງເລັກນ້ອຍ ກ່ອນທີ່ຈະຫຼົບໜີໄປ ໝູ່ບ້ານທີ່ຢູ່ໃກ້ຄຽງ ໃນການປະເຊີນໜ້າກັບການໂຈມຕີຂອງ ເທີກີ.
ທ່ານ Kerry ໄດ້ລົມກັບລັດຖະມົນຕີການຕ່າງປະເທດ ເທີກີ ທ່ານ Mevlut Cavutoglu ໂດຍທາງໂທລະສັບຕອນເຊົ້າຂອງວັນພະຫັດມື້ນີ້ ໃນຂະນະທີ່ລົດຖັງຕື່ມອີກ 10 ຄັນ ຂອງ ເທີກີ ໄດ້ຂ້າມເຂດຊາຍແດນ ເຂົ້າໄປໃນຊີເຣຍ ເພື່ອສົມທົບກັບກອງກຳລັງທີ່ເຂົ້າຮ່ວມ ການໂຈມຕີ ໃນຂັ້ນຕົ້ນ. ແຫຼ່ງຂ່າວທີ່ຮູ້ຈັກເລື້ອງ ກ່ຽວກັບ ການໂທລະສັບນັ້ນ ໄດ້ກ່າວວ່າ ທັງສອງທ່ານໄດ້ສັນຍາຕໍ່ກັນ ທີ່ຈະສືບຕໍ່ທຳການຕໍ່ສູ້ກັບພວກ IS ຮ່ວມກັນ.
ອ່ານຂ່າວນີ້ຕື່ມ ເປັນພາສາອັງກິດ
