ລິ້ງ ສຳຫລັບເຂົ້າຫາ

ທ່ານ Kerry ກ່າວວ່າ ມັນເປັນເວລາ ທີ່ສຳຄັນ ສຳລັບ ອີຣັກ


ລັດຖະມົນຕີການຕ່າງປະເທດສະຫະລັດ ທ່ານ John Kerry (ຂວາ) ຈັບມືກັບນາຍົກລັດຖະມົນຕີອີຣັກ ທ່ານ Haider Al-Abadi ທີ່ທຳນຽບລັດຖະບານ ກ່ອນການພົບປະກັນ. (8​ ເມສາ 2016)

ລັດຖະມົນຕີການຕ່າງປະເທດສະຫະລັດ ທ່ານ John Kerry (ຂວາ) ຈັບມືກັບນາຍົກລັດຖະມົນຕີອີຣັກ ທ່ານ Haider Al-Abadi ທີ່ທຳນຽບລັດຖະບານ ກ່ອນການພົບປະກັນ. (8​ ເມສາ 2016)

ລັດຖະມົນຕີ​ການ​ຕ່າງປະ​ເທດ​ສະຫະລັດ ທ່ານ John Kerry ​ໄດ້ເລີ້ມ​ການ​ເຈລະຈາ​ຫຼາຍ​ຮອບກັບ​ພວກ​ເຈົ້າໜ້າ​ທີ່​ອີຣັກ​ ໃນ​ວັນ​ສຸກ​ມື້ນີ້ ​ໃນ​ລະຫວ່າງ​ການຢ້ຽມຢາມ​ນະຄອນຫລວງ​ແບັກ​ແດດ​ເພື່ອເນັ້ນຢ້ຳ​ໃນ​ການ​ໃຫ້​ຄວາມ​ສະໜັບສະໜຸນຢ່າງ​ແຂງ​ຂັນ​ຂອງ​ສະຫະລັດຕໍ່​ລັດຖະບານ​ອີ​ຣັກ​ ​ຂະນະ​ທີ່ປະ​ເທດ​ດັ່ງກ່າວ ​ພວມແກ້​ໄຂ​ບັນຫາ​ທ້າ​ທາຍທາງ​ດ້ານ​ຄວາມ​ໝັ້ນຄົງ ​ເສດຖະກິດ​ແລະ​ການ​ເມືອງ.

ທ່ານ Kerry ກ່າວ​ກ່ອນ​ເລີ້ມ​ປະຊຸມ ​ກັບ​ລັດຖະມົນຕີ ​ການ​ຕ່າງປະ​ເທດ​ ທ່ານ Ibrahim al-Eshaiker al-Jaafari ວ່າ ນີ້​ແມ່ນ​ຈະ​ແຈ້ງ ມັນ​ເປັນ​ເວລາ​ທີ່​ຫລໍ່​ແຫ​ລມສຳຄັນ​ຢູ່​ທີ່​ນີ້​ ​ໃນ​ອີຣັກ.

ສ່ວນ​ທ່ານ Jaafari ກ່າວ​ວ່າ ຂ້າພະ​ເຈົ້າ​ແນ່​ໃຈ​ວ່າ​ທ່ານ​ຮູ້​ດີ ​ໃນ​ການ​ເຄື່ອນໄຫວ​ເມື່ອ​ໄວໆ​ມານີ້ ກ່ຽວ​ກັບ​ຂັ້ນຕອນ​ທາງ​ການ​ເມືອງ​ຢູ່​ທີ່ນີ້.

ທ່ານ Kerry ເດີນທາງແຕ່​ບາຫ໌​ເຣນ​ໄປ​ອີ​ຮັກໃນ​ການ​ຢ້ຽມຢາມ​ແບບ​ບໍ່​ມີ​ການ​ປະກາດ​ໃຫ້​ຊາບລ່ວງ​ໜ້າ ຊຶ່ງ​ເປັນ​ຂີດ​ໝາຍ​ຄົບຮອບ​ການ​ຢ້ຽມຢາມ​ອີຣັກ​ເທື່ອ​ທຳ​ອິດ​ຂອງ​ທ່ານ​ໃນປີ 2014.

ທ່ານ Kerry ​ຍັງ​ຈະ​ໄດ້ພົບ​ປະ​ກັບນາຍົກລັດຖະມົນຕີ​ອີຣັກ Haider al-Abadi ​ແລະ​ລັດ ຖະບານທ້ອງ​ຖິ່ນ​ໃນ​ເຂດ Kurdistan ຂອງ​ນາຍົກລັດຖະມົນຕີ Nechrivan Barzani.

ລັດຖະມົນຕີການຕ່າງປະເທດສະຫະລັດ ທ່ານ John Kerry (ຊ້າຍ) ພວມຍ່າງກັບ ເອກອັກຄະລັດຖະທູດ ສະຫະລັດ ປະຈຳອີຣັກ ທ່ານ Stuart Jones ທີ່ສະຖານທູດ ສະຫະລັດ ໃນນະຄອນຫຼວງແບັກແດດ. (8 ເມສາ 2016)

ລັດຖະມົນຕີການຕ່າງປະເທດສະຫະລັດ ທ່ານ John Kerry (ຊ້າຍ) ພວມຍ່າງກັບ ເອກອັກຄະລັດຖະທູດ ສະຫະລັດ ປະຈຳອີຣັກ ທ່ານ Stuart Jones ທີ່ສະຖານທູດ ສະຫະລັດ ໃນນະຄອນຫຼວງແບັກແດດ. (8 ເມສາ 2016)

ທ່ານ John Kirby ​ໂຄສົກ​ກະຊວງ​ການ​ຕ່າງປະ​ເທດ​ສະຫະລັດ​ກ່າວ​ວ່າ ນອກ​ຈາກ​ການ​ໃຫ້​ຄວາມ​ສະໜັບສະໜຸນ ​ຕໍ່​ລັດຖະບານ​ອີຣັກ​ແລ້ວ ຍັງ​ເປັນ​ທີ່​ຄາດກັນ​ວ່າ ທ່ານ Kerry ​ຈະ​ປຶກສາຫາລື​ກ່ຽວ​ກັບ​ການ​ປະຕິບັດ​ງານ​ຂອງ​ແນວ​ໂຮມ​ນາໆ​ຊາດເພື່ອ​ໃຫ້ການ​ສະໜັບ ສະໜຸນ​ຕໍ່​ການ​ດຳ​ເນີນ​ຄວາມ​ພະຍາຍ​າມຂອງ​ອີຣັກ​ໃນ​ການ​ເອົາ​ຊະນະ​ກຸ່ມ​ລັດ​ອິສລາມ.

ການເດີນທາງ​ໄປ​ຢ້ຽມຢາ​ມຄັ້ງນີ້ ມີ​ຂຶ້ນ​ໃນ​ຂະນະ​ທີ່​ກຳລັງ​ ພາຍ​ໃຕ້​ການ​ນຳພາ​ ຂອງອີຣັກ ພວມ​ບຸກ​ໂຈມ​ຕີ​ເພື່ອ​ເຂົ້າ​ຢຶດ​ຄືນ ເອົາເມືອງ Mosul ​ໃນ​ພາກ​ເໜືອ​ຂອງ​ປະ​ເທດ ທີ່​ຕົກ​ໄປ​ ຢູ່ໃນ​ກຳມື​ຂອງ​ພວກຫົວ​ຮຸນ​ແຮງ​ລັດ​ອິສລາມ ​ໃນ​ປີ 2014 ນັ້ນ.

ສະຫະລັດ​ອາດ​ຈະໃຫ້ການ​ສະໜັບສະໜຸນ​ເພີ້ມຕື່ມ ​ຕໍ່​ການ​ດຳ​ເນີນ​ຄວາມ​ພະຍາຍາມດັ່ງ ກ່າວ. ​ໃນຕົ້ນອາທິດ​ນີ້ ກະຊວງ​ປ້ອງ​ກັນ​ປະ​ເທດຂອງ​ສະຫະລັດ​ປະກາດ​ວ່າ ຕົນ​ຈະ​ເປີດ ຄ້າຍ​ທະຫານ​ຂະໜາດນ້ອຍ​ຂຶ້ນຕື່ມອີ​ກ​ແຫ່ງ​ນຶ່ງ.

ພົນ​ເຮືອ​ຕີ Andrew Lewis ຮອງ​ຜູ້ອຳນວຍການ​ຄະນະ​ປະຕິບັດ​ງານ​ຮ່ວມ​ຂອງ​ທຳນຽບ ຫ້າ​ແຈກ່າວ​ວ່າອາດ​ເກີດ​ສະຖານະ​ການ​ ຊຶ່ງ​ພາ​ໃຫ້​ມີ​ການຈັດຕັ້ງຫຼື​ເປີດຄືນ​ຄ້າຍ​ທະຫານ ອີກ​ແຫ່ງ​ນຶ່ງຈາກ​ໄລຍະ​ຫຼາຍ​ປີຜ່ານມາ​ທີ່ີອາດ​ຈະ​ມີ​ການ​ນຳ​ໃຊ້ ​ເພື່ອ​ເປັນ​ຖານ​ຍິງ​ສະໜັບ ສະໜຸນຢູ່​ໃນ​ເຂດ​ແນວ​ຫລັງ.

XS
SM
MD
LG