ປາກົດວ່າ ສະຫະລັດ ແລະ ຣັດເຊຍ ແກ້ໄຂບາງສ່ວນຂອງການ
ບໍ່ລົງລອຍກັນ ກ່ຽວກັບ ສົງຄາມທີ່ໄດ້ທຳລາຍປະເທດຊີເຣຍ ໂດຍ
Moscow ຮັບຮອງເອົາແຜນການ ເພື່ອການເຈລະຈາກັນ ຮອບທີ
3 ຢູ່ໃນນະຄອນ ນິວຢອກ ໃນວັນສຸກທີ່ຈະມາເຖິງນີ້ ເພື່ອປຶກສາ
ຫາລື ການປ່ຽນແປງທາງດ້ານການເມືອງ.
ຣັດເຊຍໄດ້ປະກາດ ການສະໜັບສະໜູນຂອງຕົນ ຕໍ່ແຜນການ
ດັ່ງກ່າວ ເມື່ອຕອນແລງວັນອັງຄານວານນີ້ ຫຼັງຈາກ ລັດຖະມົນຕີ
ຕ່າງປະເທດ ສະຫະລັດ ທ່ານຈອນ ແຄຣີ ໄດ້ພົບປະ ກັບປະທາ
ນາທິບໍ ວລາດີເມຍ ພູຕິນ ແລະ ລັດຖະມົນຕີຕ່າງປະເທດຣັດເຊຍ
ທ່ານເສີເກ ລາວຣັອປວ໌ ໃນນະຄອນຫຼວງມົສກູ.
ທ່ານແຄຣີ ເວົ້າວ່າ “ໃນຂະນະທີ່ພວກເຮົາ ບໍ່ເຫັນດີເຫັນພ້ອມກັນ ໃນທຸກໆດ້ານ ກ່ຽວ
ກັບ ຊີເຣຍກໍຕາມ ແຕ່ພວກເຮົາກໍມອງເຫັນຊີເຣຍຢ່າງເລິກເຊິ່ງແບບຄ້າຍຄືກັນ.” ທ່ານ
ກ່າວອີກວ່າ ສະຫະລັດ ແລະ ຣັດເຊຍ ເບິ່ງຄວາມທ້າທາຍທັງຫຼາຍ ແລະ ໄພອັນຕະລາຍ
ຕ່າງໆ ແບບດຽວກັນ ແລະ ຢາກໃຫ້ມີຜົນປາກົດອອກມາແບບດຽວກັນ.
ທ່ານ ລາວຣັອປວ໌ ກ່າວວ່າ ມົສກູ ແລະ ວໍຊິງຕັນ ໄດ້ຕົກລົງກັນ ວ່າຈະທະວີຄວາມພະຍາຍາມ
ເພື່ອຕໍ່ຕ້ານການກໍ່ການຮ້າຍ, ປະສານງານຢ່າງໃກ້ຊິດ ກ່ຽວກັບ ກິດຈະກຳທາງດ້ານທະຫານ
ແລະ ສືບຕໍ່ທຳງານ ລົງບັນຊີ ອົງການກໍ່ການຮ້າຍຕ່າງໆທີ່ມີ ຢູ່ໃນຊີເຣຍ.
ທ່ານກ່າວຕື່ມວ່າ ຫຼັງຈາກການເຈລະຈາ ມີຂຶ້ນຢູ່ໃນນະຄອນນິວຢອກ ໃນວັນສຸກ ທີ່ຈະມາ
ເຖິງນີ້ແລ້ວ ກຸ່ມສະໜັບສະໜູນຊີເຣຍສາກົນ ຫຼື ISSG ຫວັງວ່າ ຈະຍື່ນຮ່າງຂໍ້ແກ້ໄຂ ວ່າ
ດ້ວຍບົດບັນຍັດ ສຳລັບການຫັນປ່ຽນ ໃນຊີເຣຍ ຕໍ່ອົງການສະຫະປະຊາຊາດ.
ເມື່ອກາງເດືອນພະຈິກຜ່ານມາ ກຸ່ມ ISSG ໄດ້ຈັດການເຈລະຈາຮອບສອງໃນນະຄອນ
Vienna ແລະ ໄດ້ຕົກລົງກັນ ກ່ຽວກັບ ແຜນການທີ່ກວ້າງຂວາງ ສຳລັບໄລຍະຂ້າມຜ່ານ.
ບັນດາຜູ້ຕາງໜ້າ ກຸ່ມຝ່ານຄ້ານຊີເຣຍຕ່າງໆ ຍັງໄດ້ຈັດການເຈລະຈາ ແບບດຽວກັນ ເມື່ອ
ອາທິດແລ້ວນີ້ ໃນນະຄອນຫຼວງ Riyadh ຂອງຊາອຸດີ ອາຣາເບຍ.
