ລັດຖະມົນຕີຕ່າງປະເທດສະຫະລັດ ທ່ານ John Kerry ມີກຳນົດ
ຈະພົບປະກັບ ປະທານາທິບໍດີປາແລສໄຕນ໌ ທ່ານ Mahmoud
Abbas.
ໂຄສົກຍິງ ກະຊວງການຕ່າງປະເທດສະຫະລັດ ທ່ານນາງ Jen
Psaki ກ່າວວ່າ ການເຈລະຈາ ທີ່ນະຄອນຫລວງອຳມານ ປະເທດ
ຈໍແດັນ ມີທ່າທາງ ຈະເພັ່ງເລັ່ງໃສ່ ວ່າ ຈະຫລຸດຜ່ອນຄວາມເຄັ່ງຕຶງ
ກັບອິສຣາແອລ ລົງດ້ວຍວິທີໃດ ໂດຍສະເພາະແລ້ວ ແມ່ນບັນຫາ
ຂັດແຍ້ງ ທີ່ຫາກໍລະເບີດ ຂຶ້ນເມື່ອໄວໆມານີ້ກ່ຽວກັບສະຖານທີ່ສັກ
ສິດໃນນະຄອນເຈຣູຊາແລັມ.
ນອກນັ້ນ ຍັງຄາດກັນວ່າ ທັງສອງທ່ານຈະປຶກສາຫາລືກັນ ກ່ຽວກັບ ຄວາມພະຍາຍາມ
ໃນການບູລະນະສ້າງສາຄືນໃໝ່ ໃນເຂດ Gaza ບ່ອນທີ່ການໂຈມຕີ ທາງອາກາດຂອງອິສຣາແອລ ໄດ້ທຳລາຍໝູ່ບ້ານ ໝົດຄຸ້ມ ໃນລະຫວ່າງ ສົງຄາມ 50 ມື້ ທີ່ຍັງໄດ້ເຮັດໃຫ້ຊາວປາແລສໄຕນ໌ ຫຼາຍກວ່າ 2,100 ຄົນເສຍຊີວິດ.
ການເຈລະຈາ ມີຂຶ້ນນຶ່ງມື້ ຫຼັງຈາກອິສຣາແອລ ໄດ້ປະກາດ ແຜນການກໍ່ສ້າງເຮືອນໃໝ່
ໃນເຂດຊາວຢິວ ຢູ່ພາກຕາເວັນອອກຂອງເຈຣູຊາແລັມ. ຊາວປາແລສໄຕນ໌ ຄັດຄ້ານຕໍ່
ການກໍ່ສ້າງດັ່ງກ່າວ ຂອງອິສຣາແອລ ໃນບໍລິເວນທີ່ເຂົ້າເຈົ້າຕ້ອງການ ສ້າງຕັ້ງເປັນ
ປະເທດ ໃນອະນາຄົດ ລວມທັງພາກຕາເວັນອອກ ຂອງເຈຣູຊາແລັມ ຊຶ່ງເຂົາເຈົ້າ ມອງ
ເຫັນວ່າ ຈະເປັນນະຄອນຫລວງຂອງເຂົາເຈົ້າ.
ທ່ານນາງ Psaki ກ່າວໃນວັນພຸດວານນີ້ວ່າ ສະຫະລັດ ມີຄວາມກັງ ວົນຢ່າງເລິກເຊິ່ງ
ກ່ຽວກັບແຜນການກໍ່ສ້າງຂອງອິສຣາແອລຊຶ່ງ “ບິນເຂົ້າມາຕຳກະໂຕເປົ້າໝາຍ ທີ່
ໄດ້ຕັ້ງໄວ້ ເພື່ອໃຫ້ບັນລຸການແກ້ໄຂ ແບບມີສອງລັດນັ້ນ.”
