ລິ້ງ ສຳຫລັບເຂົ້າຫາ

ລັດຖະມົນຕີເຄັນຢາ ເສຍຊີວິດ ໃນອຸບັດເຫດເຮືອບິນຕົກ

  • ທອງປານ ເທບວົງສາ

ທ່ານ George Saitoti ລັດຖະມົນຕີຄວາມໝັ້ນຄົງພາຍໃນຂອງປະເທດເຄນຢາ ເປັນຜູ້ນຶ່ງ ໃນຫົກຄົນ ທີ່ເສຍຊີວິດ ໃນອຸບັດເຫດເຮືອບິນຕົກ ຢູ່ເຂດໃກ້ເມືອງຫຼວງໄນໂຣບີ ຕອນເຊົ້າ ວັນທີ 10 ເດືອນມິຖຸນາ 2012 ນີ້.

ບັນດາເຈົ້າໜ້າ​ທີ່​ຕໍາຫຼວດ​ແລະ​ລັດ​ຖະບານ​ເຄັນ​ຢາ ກ່າວ​ວ່າ ທ່ານ George Saitoti ລັດຖະມົນຕີ​ກະຊວງ​ຄວາມ​ໝັ້ນຄົງພາຍ​ໃນ​ ແມ່ນຮວມ​ຢູ່​ໃນ​ຈໍານວນ​ຜູ້​ເສຍຊີວິດຫົກ​ຄົນ ​ໃນ​ອຸບັດ​ເຫດ​ເຮືອບິນ Helicopter ຕົກ ​ເມື່ອເຊົ້າວັນ​ອາທິດ​ມື້​ນີ້ ​ໃນ​ເຂດ​ພູ Ngong ຢູ່ໃກ້​ເມືອງຫຼວງ Nairobi.

​ເຈົ້າໜ້າ​ທີ່​ກ່າວວ່າ ​ໃນ​ຈໍານວນ​ຜູ້​ເສຍ​ຊີວິດ​ ຍັງ​ມີ​ໂຮມ​ທັງ ຜູ້​ຊ່ວຍ​ຄົນ​ນຶ່ງ ແລະຜູ້​ອາລັກຂາ
ຄົນ​ນຶ່ງ​ ຂອງ​ທ່ານລັດຖະມົນຕີ Saitoti ນໍາ.

ທ່ານ Saitoti ​ເຄີຍ​ດໍາລົງ​ຕໍາ​ແໜ່​ງຮອງ​ປະທານາທິບໍດີ​ມາ​ກ່ອນ ແລະໄດ້​ວາງ​ແຜນການ​ວ່າ​
ຈະ​ສະມັກ​ປະທານາທິບໍດີ​ໃນ​ການ​ເລືອກ​ຕັ້ງ​ເດືອນ​ມີນາ ປີໜ້າ​ນີ້.

ຊື່​ຂອງ​ຜູ້​ເສຍ​ຊີວິດຄົນ​ອື່ນໆ​ອີກ ​ຍັງ​ບໍ່​ໄດ້​ຮັບ​ການຢືນຢັນ. ພວກ​ເຫັນ​ເຫດການ​ກ່າວ​ວ່າ
ສົບ​ຜູ້​ເສຍ​ຊີວິດ​ຖືກ​ເຜົາ​ໄໝ້​ຈົນບໍ່​ສາມາດ​ຮູ້​ໄດ້​ວ່າ​ເປັນ​ຜູ້​ໃດ.

​ສາ​ເຫດ​ຂອງ​ອຸບັດ​ເຫດ​ເຮືອບິນ​ຕົກ​ນີ້ ຍັງ​ຢູ່​ພາຍ​ໃຕ້​ການ​ສືບສວນ​ສອບ​ສວນຢູ່.

XS
SM
MD
LG