ລິ້ງ ສຳຫລັບເຂົ້າຫາ

ບໍ່ມີຫຼັກຖານ ສະແດງວ່າ ການໂຈມຕີ ທາງອາກາດ ຂອງ ຈໍແດັນ ສັງຫານ ແມ່ຍິງອາເມຣິກັນ


ເຮືອບິນກອງທັບອາກາດຈໍແດັນ ໂຈມຕີເມືອງ Raqqa ໃນຊີເຣຍ ເມື່ອວັນທີ 5 ກຸມພາ 2015.

ເຈົ້າໜ້າທີ່ທຳນຽບຂາວ ກ່າວໃນວັນສຸກວານນີ້ວ່າ ຕົນບໍ່ສາມາດ
ໃຫ້ການຢືນຢັນ ກ່ຽວກັບການກ່າວອ້າງ ຂອງກຸ່ມລັດອິສລາມທີ່
ວ່າ ການໂຈມຕີທາງອາກາດຂອງຈໍແດັນໄດ້ສັງຫານພະນັກງານ ໃຫ້ຄວາມຊ່ອຍເຫຼືອແມ່ຍິງອາເມຣິກັນຄົນນຶ່ງ ທີ່ຖືກຈັບເປັນໂຕ
ປະກັນໂດຍກຸ່ມດັ່ງກ່າວ.

ທ່ານນາງ Bernadett Meehan ໂຄສົກ ຂອງສະພາຄວາມໝັ້ນ
ຄົງແຫ່ງຊາດສະຫະລັດກ່າວວ່າ “ພວກເຮົາແມ່ນຈະແຈ້ງມີຄວາມ ເປັນຫ່ວງຢ່າງເລິກເຊິ່ງໃນລາຍງານຂ່າວເຫຼົ່ານີ້. ພວກເຮົາຍັງບໍ່ມີ ຫລັກຖານໃດໆໃນເວລານີ້ເທື່ອ ເພື່ອໃຫ້ການສະໜັບສະໜຸນ ຕໍ່ ການກ່າວອ້າງຂອງກຸ່ມລັດອິສລາມ.”

ເຈົ້າໜ້າທີ່ຈໍແດັນ ເອີ້ນການກ່າວອ້າງ ຂອງກຸ່ມລັດອິສລາມວ່າ ເປັນການໂຄສະນາຊວນ ເຊື່ອຂອງພວກອາຊະຍາກອນ. ລັດຖະມົນຕີການຕ່າງປະເທດຂອງຈໍແດັນທ່ານ Nasser Judeh ກ່າວຜ່ານທາງ Twitter ວ່າ ມັນເປັນກົນອຸບາຍທີ່ເກົ່າໆແລະໜ້າລັງກຽດທີ່ພວກ ກໍ່ການຮ້າຍ ແລະພວກກົດຂີ່ຜະເດັດການ ເຄີຍໃຊ້ມາແລ້ວ ເປັນເວລາຫຼາຍໆທົດສະວັດ ໂດຍກ່າວອ້າງວ່າ ໂຕປະກັນທີ່ຖືກຈັບໄວ້ເປັນເຄື່ອງກຳບັງນັ້ນ ໄດ້ຖືກສັງຫານໂດຍການ ໂຈມຕີທາງອາກາດ.

ຈໍແດັນ ໄດ້ທຳການໂຈມຕີທາງອາກາດຕໍ່ເປົ້າໝາຍຕ່າງໆ ຂອງກຸ່ມລັດອິສລາມຫລັງຈາກ
ພວກກໍ່ການຮ້າຍຈຸນີ້ ໄດ້ສັງຫານນັກບິນຈໍແດັນ ທີ່ຖືກຈັບໄດ້ ຢູ່ຊີເຣຍ ໃນເດືອນທັນວາປີ
ກາຍ. ການກ່າວອ້າງຂອງກຸ່ມລັດອິສລາມທີ່ວ່າ ແມ່ຍິງອາເມຣິກັນຄົນນີ້ ຖືກສັງຫານໂດຍ ການໂຈມຕີທາງອາກາດນັ້ນໄດ້ພາໃຫ້ມີຄວາມສົງໄສບໍ່ແນ່ໃຈ ຫລັງຈາກເຈົ້າໜ້າທີ່ຈໍແດັນ ກ່າວວ່າ ນັກບິນຂອງຕົນ ໄດ້ຖືກຂ້າຕາຍເດືອນນຶ່ງ ກ່ອນທີ່ກຸ່ມລັດອິສລາມ ຈະນຳວີີດີໂອ ອອກເຜີຍແຜ່ກ່ຽວກັບການເສຍຊີວິດຂອງຜູ້ກ່ຽວ.

ພະນັກງານໃຫ້ຄວາມຊ່ອຍເຫຼືອອາເມຣິກັນຄົນນີ້ ຖືກລະບຸໂຕໂດຍຄອບຄົວວ່າແມ່ນນາງ Kayla Mueller ຈາກເມືອງ Prescott ໃນລັດ Arizona. ພວກທີ່ເຄີຍຮູ້ຈັກນາງ Kayla
ກ່າວວ່ານາງໄດ້ຮັບການກະຕຸ້ນຢ່າງແຮງຈາກຄວາມທຸກທໍລະມານຂອງພວກພົນລະເຮືອນ ທີ່ຕົກຢູ່ໃນຄວາມທຸກຍາກຍ້ອນສົງຄາມແລະການກໍ່ການຮ້າຍ. ນາງໄດ້ເຮັດຢູ່ໃນປະເທດ ຊີເຣຍ ແລະເຄີຍເປັນອາສາສະໝັກ ຂອງອົງການໃຫ້ຄວາມຊ່ອຍເຫຼືອໃນເຂດຝັ່ງຕາເວັນ
ຕົກຂອງແມ່ນ້ຳຈໍແດັນແລະປະເທດອິນເດຍມາກ່ອນ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG