ອົງການພະຍາກອນອາກາດຂອງຍີ່ປຸ່ນກ່າວວ່າ ຄື້ນຟອງສຸນາມິຂະນາດ ນ້ອຍໆລູກນຶ່ງ ໄດ້ພັດເຂົ້າປະທະຝັ່ງມະຫາສະມຸດປາຊິຟິກ ທາງພາກເໜືອ ຂອງຍີ່ປຸ່ນໃນວັນອາທິດມື້ນີ້ ຫລັງຈາກໄດ້ເກີດແຜ່ນດິນໄຫວຮຸນແຮງບັ້ນນຶ່ງ ໃນເຂດທີ່ໄດ້ຮັບຄວາມເສຍຫາຍຢ່າງໜັກ ຈາກເຫດແຜ່ນດິນໄຫວຄັ້ງຍິ່ງໃຫຍ່ແລະຄື້ນຟອງສຸນາມິ ໃນເດືອນມີນາຂອງປີນີ້.
ອົງການພະຍາກອນອາກາດກ່າວວ່າ ເມືອງທ່າ Ofunato ໃນແຂວງ Iwate ໄດ້ປະເຊີນກັບຄື້ນຟອງສຸນາມິລູກນ້ອຍໆ ທີ່ມີຄວາມສູງຂະໜາດ 10 ເຊັນຕິແມດ ໃນຕອນ 10:44 ໂມງຕອນເຊົ້າ ຕາມເວລາທ້ອງຖິ່ນ ກ່ອນສັນຍານຕຸກເຕືອນໄພຈະຖືກຍົກເລີກນັ້ນ. ອົງ ການດັ່ງກ່າວໄດ້ທໍານາຍວ່າ ຄື້ນຟອງສຸນາມິອາດຈະສູງ ເຖິງ 50 ເຊັນຕິແມດກໍໄດ້.
ອົງການພະຍາກອນອາກາດໄດ້ອອກຄໍາເຕືອນໃຫ້ລະວັງຄື້ນຟອງສຸນາມິ ຫລັງຈາກເກີດ ເຫດແຜ່ນດິນໄຫວ ແຮງຂະໜາດ 7 ຣິກເຕີ ໃນເຂດມະຫາສະມຸດປາຊິຟິກ ນອກຝັ່ງ ທະເລຂອງເກາະໃຫຍ່ Honshu ຂອງຍີ່ປຸ່ນ ໃນ ຕອນເຊົ້າວັນອາທິດມື້ນີ້.
ຍັງບໍ່ມີລາຍງານໃນທັນທີນີ້ເທື່ອ ກ່ຽວກັບຜູ້ທີ່ໄດ້ຮັບບາດເຈັບ ຫລືຜົນເສຍຫາຍໃດໆຈາກ ແຜ່ນດິນໄຫວຄັ້ງນີ້.
ໄພແຜ່ນດິນໄຫວຄັ້ງໃຫຍ່ ແລະຄື້ນຟອງສຸນາມິເມື່ອເດືອນມີນາຜ່ານມານັ້ນ ໄດ້ສ້າງຄວາມ ເສຍຫາຍຢ່າງໜັກ ສ່ວນໃຫຍ່ແມ່ນຢູ່ໃນເຂດຝັ່ງທະເລທາງພາກເໜືອຂອງຍີ່ປຸ່ນ ແລະພ້ອມ ທັງຍັງຜົນໃຫ້ມີຜູ້ເສຍຊີວິດ ຫລືຫາຍສາບ ສູນປະມານ 23,000 ຄົນ ນອກນີ້ແລ້ວໄພ ຫາຍະນະທີ່ເກີດຂຶ້ນພ້ອມໆ ກັນນີ້ ຍັງໄດ້ເຮັດໃຫ້ເກີດວິກິດການນີວເຄລຍຂອງຍີ່ປຸ່ນ ນໍາອີກ ຢູ່ທີ່ໂຮງໄຟຟ້ານີວເຄລຍໃນເມືອງ Fukushima ທີ່ໄດ້ຮັບຄວາມເສຍຫາຍຢ່າງໜັກທີ່ສຸດ ນັ້ນ.
