ລິ້ງ ສຳຫລັບເຂົ້າຫາ

ນາຍົກຍີ່ປຸ່ນ ກ່າວວ່າ ທ່ານມີ ຄວາມເຊື່ອໝັ້ນ ຢ່າງສູງ ໃນຕົວ ທ່ານ Donald Trump


ນາຍົກລັດຖະມົນຕີຍີ່ປຸ່ນ ທ່ານ Shinzo Abe (ຂວາກາງ) ພວມຖະແຫຼງຕໍ່ພວກນັກຂ່າວ ຫຼັງຈາກພົບປະ ກັບປະທານາທິບໍດີທີ່ໄດ້ຮັບເລືອກໃໝ່ ທ່ານ Donald Trump ທີ່ນະຄອນນິວຢອກ. (17 ພະຈິກ 2016)​

ນາຍົກລັດຖະມົນຕີຍີ່ປຸ່ນ ທ່ານ Shinzo Abe (ຂວາກາງ) ພວມຖະແຫຼງຕໍ່ພວກນັກຂ່າວ ຫຼັງຈາກພົບປະ ກັບປະທານາທິບໍດີທີ່ໄດ້ຮັບເລືອກໃໝ່ ທ່ານ Donald Trump ທີ່ນະຄອນນິວຢອກ. (17 ພະຈິກ 2016)​

ນາຍົກລັດຖະມົນຕີຍີ່ປຸ່ນ ທ່ານ Shinzo Abe ​ເອີ້ນປະທານາທິບໍດີ ​ທີ່​ຖືກ​ເລືອກ​ໃໝ່​ຂອງ​ສະຫະລັດ ທ່ານ Donald Trump ວ່າ ເປັນຜູ້ນຳ​ ທີ່​ທ່ານສາມາດ​ ມີ​ຄວາມເຊື່ອ​ໝັ້ນເປັນ ຢ່າງ​ສູງ.

ທ່ານ Abe ​ແມ່ນ​ຜູ້ນຳ​ຂອງ​ໂລກ​ຄົນ​ທຳ​ອິດ ທີ່​ໄດ້​ພົບ​ປະ​ກັບ​ທ່ານ Trump ນັບແຕ່​ທ່ານ​ໄດ້​ຮັບ​ໄຊຊະນະ ​ໃນ​ການ​ເລືອກ​ຕັ້ງປະທານາທິບໍດີ​ສະຫະລັດ. ບຸກຄົນທັງ​ສອງ​ໄດ້​ພົບ​ປະກັນ​ທີ່​ຕຶກ Trump Tower ​ໃນ​ນະຄອນ​ນິວຢອກ.

ທ່ານ Abe ​ເອີ້ນການ​ໂອ້​ລົມ​ສົນທະນາ​ກັບ​ທ່ານ Trump ຊຶ່ງ​ບາງ​ຄັ້ງບາງ​ຄາວ ໄດ້​ມີ​ການ​ໃຊ້​ຖ້ອຍ​ຄຳ​ທີ່ແຮງ​ນັ້ນວ່າ ​ຈິງ​ໃຈ​ແບບ​ເພື່ອ​ນມິດ​ແທ້ໆ.

ພະນັກງານ ຂອງ ບໍລິສັດແລກປ່ຽນ ເງິນຕາຕ່າງປະເທດ ພວມເບິ່ງໂທລະພາບ ທີ່ສະແດງ ໃຫ້ເຫັນວ່າ ປະທານາທິບໍດີ ທີ່ໄດ້ຮັບເລືອກໃໝ່ ສຫລ ທ່ານ Donald Trump ພວມຖະແຫຼງ ໃນລາຍການຂ່າວ ຢູ່ໂຕກຽວ. (9 ພະຈິກ 2016)

ພະນັກງານ ຂອງ ບໍລິສັດແລກປ່ຽນ ເງິນຕາຕ່າງປະເທດ ພວມເບິ່ງໂທລະພາບ ທີ່ສະແດງ ໃຫ້ເຫັນວ່າ ປະທານາທິບໍດີ ທີ່ໄດ້ຮັບເລືອກໃໝ່ ສຫລ ທ່ານ Donald Trump ພວມຖະແຫຼງ ໃນລາຍການຂ່າວ ຢູ່ໂຕກຽວ. (9 ພະຈິກ 2016)

ທ່ານ Abe ກ່າວ​ວ່າ “ຂ້າພະ​ເຈົ້າ​ເຊື່ອ​ວ່າ ຖ້າ​ບໍ່ມີ​ຄວາມ​ເຊື່ອ​ໝັ້ນລະຫວ່າງ​ປະ​ເທດ​ທັງ​ສອງ​ແລ້ວ ການ​ເປັນ​ພັນທະ​ມິດ​ກໍ​ຈະ​ຄົງ​ຕົວ​ຢູ່​ບໍ່​ໄດ້​ໃນ​ອະນາຄົດ​ແລະ​ໃນ​ຖານະ​ທີ່​ເປັນ​ຜົນ​ຂອງ​ການ​ໂອ້​ລົມ​ກັນ​ໃນ​ມື້ນີ້ ຂ້າພະ​ເຈົ້າ​ຈຶ່ງ​ເຊື່ອ​ວ່າ ທ່ານ Trump ​ເປັນ​ຜູ້ນຳ ທີ່​ຂ້າພະເຈົ້າສາ ມາດມີ​ຄວາມ​ເຊື່ອ​ໝັ້ນ ເປັນຢ່າງ​ສູງ.”

ທ່ານ Abe ກ່າວ​ຕື່ມ​ວ່າ ທ່ານ​ແລະ​ທ່ານ Trump ​ໄດ້​ໂອ້​ລົມ​ກັນ ​ກ່ຽວ​ກັບ​ບັນຫາ​ພື້ນຖານ​ຕ່າງໆແຕ່​ບໍ່​ໄດ້​ໃຫ້​ລາຍ​ລະອຽດ​ໃດໆ. ສ່ວນທ່ານ Trump ບໍ່​ໄດ້​ໃຫ້​ຄວາມ​ເຫັນ​ຫຍັງກ່ຽວ​ກັບ​ການ​ພົບ​ປະກັນ​ໃນ​ເທື່ອ​ນີ້.

​ໃນ​ລະຫວ່າງ​ການ​ໂຄສະນາ​ຫາ​ສຽງ​ນັ້ນ ທ່ານ Trump ​ໄດ້​ຕັ້ງຄຳ​ຖາມ​ ກ່ຽວ​ກັບຄວາມ​ສຳ ພັນ​ພື້ນຖານຫຼາຍໆ​ຢ່າງໂດຍ​ສະ​ເໜີ​ແນະ​ວ່າ ສະຫະລັດ​ໄດ້​ດຳ​ເນີນການ​ຫຼາຍ​ເກີນ​ໄປ​ໃນ​ການ​ສະໜອງ​ການ​ປ້ອງ​ກັນ​ປະ​ເທດ​ໃຫ້​ແກ່​ຍີ່ປຸ່ນ. ທ່ານ​ໄດ້ນຳ​ສ​ະ​ເໜີ​ແນວ​ຄິດໃນການ​ອະ ນຸຍາດ​ໃຫ້​ຍີ່ປຸ່ນ​ແລະ​ປະ​ເທດອື່ນໆ ຢູ່​ໃນ​ພາກພື້ນສາມາດ​ມີ​ອາວຸດ​ນິວ​ເຄລຍ​ໄດ້ ​ແລະ​ບັງ ຄັບ​ໃຫ້ປະເທດເຫຼົ່ານັ້ນ ​ເພີ້ມການໃຊ້​ຈ່າຍ ​ເພື່ອ​ສະໜັບສະໜຸນ​ກຳລັງ​ສະຫະລັດ​ທີ່​ປະຈຳ ການ​ຢູ່​ໃນ​ປະ​ເທດ​ເຂົາເຈົ້າ.

ສະຫະລັດ​ມີ​ກຳລັງ​ທະຫານ​ປະມານ 53,000 ຄົນ ​ຢູ່​ໃນ​ປະ​ເທດ​ຍີ່ປຸ່ນ ​ແລະສະມາຊິກ​ໃນ​ຄອບ​ຄົວ​ອີກ 43,000 ຄົນ ພ້ອມ​ດ້ວຍ​ພະນັກງານ​ພົນລະ​ເຮືອນ​ຂອງກະຊວງ​ປ້ອງ​ກັນ​ປະ​ເທດ 5,000 ຄົນ​ຢູ່​ທີ່​ນັ້ນ.

ພວກ​ສະໜັບສະໜຸນ​ຕໍ່​ການ​ເປັນ​ພັນທະ​ມິດ​ດ້ານ​ປ້ອງ​ກັນ​ປະ​ເທດໂຕ້ຖຽງ​ວ່າ ນອກ​ເໜືອ​ໄປ​ຈາກ​ຜົນ​ປະ​ໂຫຍ​ດທີ່​ຍີ່ປຸ່ນ​ໄດ້​ຮັບ​ແລ້ວສະຫະລັດ​ກໍ​ໄດ້​ຮັບ​ຜົນ​ປະໂຫຍ​ດທາງ​ດ້ານ​ຍຸດ​ທະ​ສາດ​ເຊັ່ນ​ກັນ ​ໂດຍ​ມີ​ກອງ​ກຳລັງ​ປະຈຳການ​ຢູ່​ໃນ​ພາກພື້ນສ່ວນ​ນັ້ນຂອງ​ໂລກ.

ນອກນັ້ນ ທ່ານ Trump ຍັງ​ຂົ່ມຂູ່​ວ່າ ຈະ​ທັບ​ມ້າງ​ຂໍ້​ຕົກລົງການ​ຄ້າ​ພາຄີ​ຂ້າມ​ມະຫາ​ສະມຸດ​ປາຊີ​ຟິກ ທີ່​ຍີ່ປຸ່ນ​ໃຫ້ການ​ສະໜັບສະໜຸນ​.

ອ່ານຂ່າວນີ້ຕື່ມເປັນພາສາອັງກິດ

ສະແດງຄວາມເຫັນໃຫ້ເບິ່ງ

XS
SM
MD
LG